ستراسبۋرگتەگى ەۋروپانىڭ ادام قۇقىقتارى جونىندەگى سوتى ماسكەۋدە قۇلدىقتا بولعان قازاقستان جانە وزبەكستان ازاماتتارىنىڭ شاعىمدارىن قارايدى. بۇل جونىندە سوتتىڭ رەسمي سايتى حابارلادى، دەپ مالىمدەيدى "ادىرنا" ۇلتتىق پورتالى.
سوت بەس جابىرلەنۋشىنىڭ ەكى شاعىمىن بىرىكتىرگەن. ءبىرىنشى شاعىم قازاقستان ازاماتتارى فاتيما جانە ءاليا مۇساباەۆا مەن وزبەكستان ازاماتتارى گۇلجانار نازانوۆا جانە باكيا قاسىموۆادان 2016 جىلى تۇسكەن. ەكىنشى شاعىم 2018 جىلى قازاقستان ازاماتى نەسىبەلى يبراگيموۆادان جولدانعان.
ايەلدەردىڭ سوتتا قۇقىعىن "مەموريال" قۇقىق قورعاۋ ورتالىعىنىڭ زاڭگەرلەرى قورعايدى. ولار "گراجدانسكوە سودەيستۆيە" كوميتەتىمەن بايلانىستا وتىر. سوت رەسەيگە ءىس بويىنشا سۇراقتار جىبەرەدى دەدى كوميتەت وكىلدەرى.
- ەۋروپانىڭ ادام قۇقىعى جونىندەگى سوتى جاۋاپكەر رەسەيگە ادام قۇقىقتارى جونىندەگى ەۋروپا كونۆەنتسياسىنىڭ بۇزىلۋىنا بايلانىستى سۇراقتار جولدايدى. جاۋاپكەردىڭ شاعىم بەرۋشى تاراپپەن بەيبىت كەلىسىم جاساۋعا قۇقىعى بار. ايتپەسە ءىس قارالا باستايدى، - دەدى زاڭگەر يۆان نوۆيكوۆ.
ميگرانتتاردى قۇلدىقتا ۇستاعان ازىق-تۇلىك دۇكەندەر جەلىسى ماسكەۋدىڭ گوليانوۆو اۋدانىنداعى ۋرالسكايا، پاركوۆايا جانە نوۆوسيبيرسكايا كوشەلەرىندە ورنالاسقان. دۇكەندەرگە ەرلى-زايىپتىلار مەن ولاردىڭ تۋىستارى يەلىك ەتەدى.
"گراجدانسكوە سودەيستۆيە" قورىنىڭ اقپاراتىنا قاراعاندا، كاسىپكەرلەر ايەلدەردىڭ قۇجاتتارىن تارتىپ الىپ، ولاردى ەڭبەك ميگرانتى رەتىندە تىركەۋدەن باس تارتقان. ەڭبەكاقىسىن بەرمەي، دۇكەن اۋماعىنان اتتاپ قادام باسۋعا تىيىم سالعان. ميگرانتتار جەرتولەلەردە ۇيىقتاعان.
- دۇكەن يەلەرى مەن قىزمەتكەرلەرى قازاقستان جانە وزبەكستان ازاماتتارىن جىلدار بويى اقىسىز ەڭبەككە جەگىپ، زورلاعان، ۇرىپ-سوققان. قۇقىق قورعاۋ ورگاندارىمەن قۋدالايمىز دەپ قوقان-لوقى كورسەتكەن، - دەپ جازدى كوميتەت وكىلدەرى.
كوميتەتتىڭ ايتۋىنشا، پوليتسەيلەر مەن تەرگەۋشىلەر جابىرلەنۋشىلەردىڭ شاعىمىنا بايلانىستى ءىس قوزعاۋدان باس تارتقان.
"ادىرنا" ۇلتتىق پورتالى
