ەل تاۋەلسىزدىگىنىڭ 30 جىلدىعى اياسىندا شىمكەنتتىك جاستار اراسىندا ءتۇرلى سالادا جەتىستىككە جەتكەن تالانتتى ازاماتتارمەن كەزدەسۋ ۇيىمداستىرىلۋدا. بۇگىن قالا جاستارى بەلگرادتا وتكەن الەم چەمپيوناتىنىڭ كۇمىس جۇلدەگەرى ماحمۇد سابىرحانمەن جۇزدەستى.
بۇعان دەيىن قازاقستاننىڭ بەس دۇركىن، سونداي-اق، ازيانىڭ چەمپيونى اتانعان ماحمۇد سپورتتا جەڭىستىڭ وڭايلىقپەن كەلمەيتىنىن، تىڭعىلىقتى ەڭبەكتەنۋ كەرەكتىگىن ايتتى. كەزدەسۋ ەركىن سۇحبات الاڭىندا ءوتتى. سوندىقتان جينالعاندار وزدەرىن قىزىقتىرعان سۇراقتارىنا جاۋاپ الدى.
– سپورتقا اكەمنىڭ جەتەلەۋىمەن كەلدىم. 7-سىنىپ وقىپ جۇرگەنىمدە اۋىلىمىزدا سپورت ۇيىرمەسى اشىلدى. اكەم – سپورتشى. ونى ەستىپ، ماعان كۇرەسكە بارۋعا كەڭەس بەردى. اكەم ەكەۋىمىز كۇرەسكە جازىلامىز دەپ بارىپ، بوكستان ءبىر-اق شىقتىق. اقىلداسا كەلە بوكسپەن شۇعىلداناتىن بولىپ كەلىستىك. اۋىل، اۋدان كولەمىندە جارىستاردا جەڭىسكە جەتىپ، كوزگە ءتۇستىم. سودان 2015 جىلى جاسوسپىرىمدەر اراسىندا ەل چەمپيونى اتاندىم. ال ەرەسەكتەر اراسىنداعى العاشقى ۇلكەن جارىسىم الەم چەمپيونى بولدى، - دەدى جۇلدەگەر.
بايراقتى باسەكەدە كۇمىس جۇلدەگە يە بولعان 20 جاستاعى جەرلەسىمىز الداعى جوسپارلارى تۋرالى دا ايتىپ ءوتتى.
–كەزىندە 2000 جىلى سيدنەيدە بەكزات ساتتارحانوۆ اعامىز 20 جاسىندا وليمپيادا شىڭىن باعىندىردى. سول سەكىلدى 2013 جىلى جانىبەك ءالىمحانۇلى 20 جاسىندا الماتىدا الەم چەمپيونى بولدى. مەن دە سول اعالارىمنىڭ جولىن قۋسام دەيمىن. كەلەسى جىلى ازيا ويىندارى بار. ودان كەيىن 2023 جىلى وزبەكستان استاناسى تاشكەنت قالاسىندا الەم چەمپيوناتى وتەدى. سول جارىستاردان تەك التىن اكەلۋگە تىرىسامىز. كەتكەن ەسەنى قايتارامىز. بارلىق سپورتشىنىڭ ارمانى وليمپيادا شىڭىن باعىندىرۋ عوي. بۇيىرسا، الداعى جارىستاردا سول ارمانىما تاعى جاقىنداي تۇسەمىن. وليمپيادا ليتسەنزياسىن الىپ، ەلىمىزدىڭ نامىسىن قورعاپ، كوك تۋىمىزدى جەلبىرەتىپ، ءان ۇرانىمىزدى شىرقاتۋعا بار كۇش-جىگەرىمدى سالامىن. ءالى ۋاقىت بار، كوپ ەڭبەكتەنىپ، جاتتىعۋلاردى ۇزبەي جاساۋ كەرەك، - دەدى ماحمۇد.
جاستارمەن وتكەن كەزدەسۋىندە ماحمۇد سابىرحان جەتكەن جەتىستىكتەرىن بايانداپ، زامانداستارىن سالاۋاتتى ءومىر سالتىن ۇستانۋعا شاقىردى. ال ۇيىمداستىرۋشىلار وسىنداي كەزدەسۋلەر جاستاردىڭ پاتريوتتىق سەزىمىن وياتىپ، ۇلتتىق قۇندىلىقتارىنىڭ قالىپتاسۋىنا سەپتىگىن تيگىزەدى دەپ سەنەدى.
