El Táýelsizdiginiń 30 jyldyǵy aıasynda shymkenttik jastar arasynda túrli salada jetistikke jetken talantty azamattarmen kezdesý uıymdastyrylýda. Búgin qala jastary Belgradta ótken Álem Chempıonatynyń kúmis júldegeri Mahmud Sabyrhanmen júzdesti.
Buǵan deıin Qazaqstannyń bes dúrkin, sondaı-aq, Azııanyń chempıony atanǵan Mahmud sportta jeńistiń ońaılyqpen kelmeıtinin, tyńǵylyqty eńbektený kerektigin aıtty. Kezdesý erkin suhbat alańynda ótti. Sondyqtan jınalǵandar ózderin qyzyqtyrǵan suraqtaryna jaýap aldy.
– Sportqa ákemniń jeteleýimen keldim. 7-synyp oqyp júrgenimde aýylymyzda sport úıirmesi ashyldy. Ákem – sportshy. Ony estip, maǵan kúreske barýǵa keńes berdi. Ákem ekeýimiz kúreske jazylamyz dep baryp, bokstan bir-aq shyqtyq. Aqyldasa kele bokspen shuǵyldanatyn bolyp kelistik. Aýyl, aýdan kóleminde jarystarda jeńiske jetip, kózge tústim. Sodan 2015 jyly jasóspirimder arasynda el chempıony atandym. Al eresekter arasyndaǵy alǵashqy úlken jarysym álem chempıony boldy, - dedi júldeger.
Baıraqty básekede kúmis júldege ıe bolǵan 20 jastaǵy jerlesimiz aldaǵy josparlary týraly da aıtyp ótti.
–Kezinde 2000 jyly Sıdneıde Bekzat Sattarhanov aǵamyz 20 jasynda Olımpıada shyńyn baǵyndyrdy. Sol sekildi 2013 jyly Jánibek Álimhanuly 20 jasynda Almatyda álem chempıony boldy. Men de sol aǵalarymnyń jolyn qýsam deımin. Kelesi jyly Azııa oıyndary bar. Odan keıin 2023 jyly Ózbekstan astanasy Tashkent qalasynda álem chempıonaty ótedi. Sol jarystardan tek altyn ákelýge tyrysamyz. Ketken eseni qaıtaramyz. Barlyq sportshynyń armany olımpıada shyńyn baǵyndyrý ǵoı. Buıyrsa, aldaǵy jarystarda sol armanyma taǵy jaqyndaı túsemin. Olımpıada lıenzııasyn alyp, elimizdiń namysyn qorǵap, kók týymyzdy jelbiretip, án uranymyzdy shyrqatýǵa bar kúsh-jigerimdi salamyn. Áli ýaqyt bar, kóp eńbektenip, jattyǵýlardy úzbeı jasaý kerek, - dedi Mahmud.
Jastarmen ótken kezdesýinde Mahmud Sabyrhan jetken jetistikterin baıandap, zamandastaryn salaýatty ómir saltyn ustanýǵa shaqyrdy. Al uıymdastyrýshylar osyndaı kezdesýler jastardyń patrıottyq sezimin oıatyp, ulttyq qundylyqtarynyń qalyptasýyna septigin tıgizedi dep senedi.
