تاۋەلسىزدىكتىڭ 30 جىلى ىشىندە ءبىلىم سالاسىنداعى جاڭاشىلدىقتى يگەرگەن ءبىلىمدى ماماندار ەل يگىلىگىنە ەڭبەك ەتۋدە. سونداي سالانىڭ ءبىرى – ءىت سالاسى.
شىمكەنت قالاسىندا م.وتەباەۆ اتىنداعى جوعارى جاڭا تەحنولوگيالار كوللەدجىنىڭ وقۋ ىستەرى بويىنشا ديرەكتوردىڭ ورىنباسارى، PhD دوكتورانت ديلارام باۋمۋراتوۆا شاكىرتتەرىن كەلەشەگى كەمەل سالاعا باعىتتاپ كەلەدى.
العاشقى ەڭبەك جولىن 2009 جىلى وسى كوللەدجدە ارنايى ءپان مۇعالىم رەتىندە باستاعان جاس مامان ءاۋ باستان ءوزىنىڭ ىزدەنىمپازدىعى مەن بىلىمپازدىعىمەن كوزگە ءتۇستى. كوپ ۋاقىت وتپەي كافەدرا تىزگىنىن قولعا الىپ، ءىت سالاسىنا قاتىستى باعدارلاما ازىرلەي باستادى.
ول 2016 جىلدان باستاپ جۇمىسپەن قامتۋ ورتالىعى مەن كاسىپكەرلەر پالاتاسى ءۇشىن «ەسەپتەۋ تەحنيكاسى جانە باعدارلامالىق قامتاماسىز ەتۋ» ماماندىعى مەن «ەەم وپەراتورى» بىلىكتىلىگى بويىنشا كاسىپتىك ءبىلىم بەرۋ باعدارلاماسىن دايىنداعان.
پەداگوگتەردىڭ تسيفرلىق بىلىمدەرىن دامىتۋعا جانە قاشىقتان ءبىلىم بەرۋدى جەتىلدىرۋگە 7 باعدارلامانى قولدانىسقا ەنگىزدى.
2020 جىلدان باستاپ «Talap» كەاق باستاماسىمەن م. وتەباەۆ كوللەدجى بازاسىندا ستۋدەنتتەر مەن مۇعالىمدەردىڭ كاسىبي جەتىلۋىنە ىقپال ەتەتىن «CISCO ACADEMY» قۇرىلعان بولاتىن. اكادەمياعا وسى سالانىنىڭ بىلىكتى مامانى د.باۋمۋراتوۆاعا جەتەكشىلىك ەتۋدە.
ۇستاز ءوزى ىزدەنۋمەن شاكىرتتەرىن دە باسەكەگە قابىلەتتى، ساپالى مامان بولىپ شىعۋىنا بەلسەنە اتسالىسىپ ءجۇر. ستۋدەنتتەرى «WorldSkills Kazakhstan-2019» رەسپۋبليكالىق چەمپيوناتىندا «جەلىلىك جانە جۇيەلىك باسقارۋ» قۇزىرەتتىلىگى بويىنشا ءىىى دارەجەلى ديپلوممەن ماراپاتتالعان.
تىنىمسىز ەڭبەكتىڭ ارقاسىندا ديلارام بەكبولاتقىزى قر ءبىلىم جانە عىلىم مينيسترلىگىنىڭ «قۇرمەت گراموتاسى» ماراپاتتالسا، بيىل «ۇزدىك پەداگوگ-2021» بايقاۋىنىڭ قالالىق كەزەڭىندە جەڭىمپاز اتاندى.
شىمكەنت قالاسى اكىمدىگىنىڭ ءباسپاسوز قىزمەتى
