شىمكەنتتەگى فيلارمونيا عيماراتىندا ەلىمىزدەگى تۇڭعىش زاعيپ تەلەجۇرگىزۋشى رەتىندە قازاقستاننىڭ كينەس رەكوردتار كىتابىنا جانە «التىن كىتابىنا» ەنگەن، ارنايى توسبەلگى يەمدەنگەن اقىن، «عاني مۇراتباەۆ سىيلىعىنىڭ» يەگەرى ەربەك باكيەۆتىڭ «تاعدىرىما ءتانتىمىن» اتتى پوەزيالىق جىر كەشى ءوتتى. تاۋەلسىزدىكتىڭ 30 جىلدىعىنا ورايلاستىرىلعان كەشتى قر مادەنيەت قايراتكەرى گۇلبالا ءابۋوۆا جۇرگىزىپ، كونتسەرتتە اقىننىڭ ولەڭىنە جازىلعان اندەر مەن جىرلارى ورىندالدى.
– بۇگىنگى كەشكە جينالىپ، قولداۋ كورسەتكەندەرىڭىز ءۇشىن كوپ راحمەت! «اناسى بار ادامدار، ەشقاشان قارتايمايدى»، كەشىمە انامنىڭ دا قاتىسىپ وتىرعانىنا شەكسىز قۋانىشتىمىن، – دەگەن ە.باكيەۆ اناسىنا ارناپ جازعان ءانىن ورىنداپ، گۇل شوقتارىن سىيلادى.
كەش بارىسىندا اقىننىڭ ءوزى تامامداعان «ءۇمىت» مەكتەپ-ينتەرناتىنىڭ ۇجىمى اتىنان ەربەك باكيەۆكە العىس حات تابىستالدى. سودان كەيىن فەريزات يزىمباەۆا، نۇرجان تورەباەۆ، بالتاش ەڭسەپباەۆ، مادينا ەرماحانوۆا، رۇستەم كەنجەۇلى، اينۇر سماندياروۆا، باعداۋلەت قۇرال جانە «ءۇمىت» مەكتەپ-ينتەرناتىنىڭ شاكىرتتەرى –اقمارال باسىمبەك، ماقسات جانپەيىسوۆ سەكىلدى تالانت يەلەرى ونەر كورسەتتى. سونىمەن قوسا كەش بارىسىندا كوپشىلىك اقىننىڭ جىر كىتابىن تاماشالاۋعا مۇمكىندىك الدى.
