تاۋەلسىزدىك جەمىسى: شىمكەنتتە بالالارىن تەگىن سپورتتىق سەكتسياعا قاتىستىرۋ ءۇشىن 3 مىڭنان استام اتا-انادان ءوتىنىم تۇسكەن

96

بۇگىن شىمكەنت قالاسى اكىمىنىڭ ورىنباسارى م.يساحوۆتىڭ قاتىسۋىمەن ءوزى جەتەكشىلىك ەتەتىن سالالارداعى بىرقاتار نىساندارعا ءباسپاسوز تۋرى ۇيىمداستىرىلدى. قالا اكىمىنىڭ ورىنباسارى باق وكىلدەرىن مەملەكەتتىك تاپسىرىسپەن جان باسىنا قارجىلاندىرۋ جوباسىنا قامتىلعان بىرقاتار جەكەمەنشىك سپورتتىق نىساندارمەن تانىستىردى.

ىرىكتەۋدەن وتكەن بىلىكتى ءونىم بەرۋشىلەردىڭ ءبىرى «ەتالون كلينينگ» جشس-گى. كاسىپكەر «STRONG» فيتنەس ورتالىعىن جالعا الۋ ارقىلى مەملەكەتتىك تاپسىرىسپەن جۇمىس جاساپ وتىر. سپورت كەشەنىنىڭ جالپى اۋدانى 950 شارشى مەتردى قۇرايدى. كاسىپكەر بوكس جانە تاەكۆوندو سپورت تۇرىنەن 160 بالاعا ءوتىنىم جولداپ، وسى جىلدىڭ 3 شىلدەسىنەن باستاپ جۇمىس جاساۋدا. قازىرگى تاڭدا 110 اتا-انادان ءوتىنىم ءتۇسىپ، اتا-انا مەن كاسىپكەر اراسىندا كەلىسىم-شارت جاسالعان.

قالا اكىمنىڭ ورىنباسار مەملەكەت باسشىسى قاسىم-جومارت توقاەۆتىڭ بالالار سپورتىن دامىتۋ بويىنشا بەرگەن تاپسىرماسى نەگىزىندە جۇزەگە اسىرىلىپ وتىرعان جوبا تۋرالى ءتۇسىندىرىپ ءوتتى.

«جاڭا جوبا بويىنشا 4 جاستان 18 جاسقا دەيىنگى بالالار، ونىڭ ىشىندە ەرەكشە قاجەتتىلىگى بار بالالار مەملەكەتتىك تاپسىرىسپەن كەز-كەلگەن سپورت سەكتسياسىنا، شىعارماشىلىق ۇيىرمەسىنە تەگىن بارا الادى. جاڭا جوباعا سايكەس اتا-انالاردان سپورتتىڭ 71 ءتۇرى بويىنشا وتىنىشتەر قابىلدانادى. قازىر سپورتتىڭ بوكس، فۋتبول، گرەك-ريم كۇرەسى، ءجۇزۋ سپورتى، ۇستەل تەننيسى، كاراتە، تاەكۆوندو، دزيۋدو، باسكەتبول تۇرلەرى بويىنشا اتا-انالاردان 3347 ءوتىنىم تۇسكەن. جوبانى ىسكە اسىرۋعا بيىلعا 339,8 ملن تەڭگە قارالىپ، 4096 بالانىڭ سپورتتىق سەكتسيالارعا بارۋىنا مۇمكىندىك بەرىلگەن»،-دەدى م.يساحوۆ.

مەملەكەتتىك تاپسىرىستى جۇزەگە اسىرۋ ماقساتىندا 2021 جىلدىڭ مامىر ايىندا «بالا» ساندىق پلاتفورماسى ىسكە قوسىلدى. بۇل پلاتفورماعا artsport.edu.kz مەكەنجايى ارقىلى كاسىپكەرلەر، جاتتىقتىرۋشىلار جانە قالانىڭ ءاربىر تۇرعىنى اتا-انا رەتىندە ءوتىنىم جولداي الادى. اتا-انا بالاعا ارنالعان شىعارماشىلىق نەمەسە سپورتتىق ۇيىرمەگە ءوتىنىش بەرىپ، ۆاۋچەر (بىرەگەي ءنومىر) الادى.

پىكىرلەر
رەداكتسيا تاڭداۋى