Búgin Shymkent qalasy ákiminiń orynbasary M.Isahovtyń qatysýymen ózi jetekshilik etetin salalardaǵy birqatar nysandarǵa baspasóz týry uıymdastyryldy. Qala ákiminiń orynbasary BAQ ókilderin memlekettik tapsyryspen jan basyna qarjylandyrý jobasyna qamtylǵan birqatar jekemenshik sporttyq nysandarmen tanystyrdy.
Irikteýden ótken bilikti ónim berýshilerdiń biri «Etalon Klınıng» JShS-gi. Kásipker «STRONG» fıtnes ortalyǵyn jalǵa alý arqyly memlekettik tapsyryspen jumys jasap otyr. Sport kesheniniń jalpy aýdany 950 sharshy metrdi quraıdy. Kásipker boks jáne taekvondo sport túrinen 160 balaǵa ótinim joldap, osy jyldyń 3 shildesinen bastap jumys jasaýda. Qazirgi tańda 110 ata-anadan ótinim túsip, ata-ana men kásipker arasynda kelisim-shart jasalǵan.
Qala ákimniń orynbasar Memleket basshysy Qasym-Jomart Toqaevtyń balalar sportyn damytý boıynsha bergen tapsyrmasy negizinde júzege asyrylyp otyrǵan joba týraly túsindirip ótti.
«Jańa joba boıynsha 4 jastan 18 jasqa deıingi balalar, onyń ishinde erekshe qajettiligi bar balalar memlekettik tapsyryspen kez-kelgen sport sekııasyna, shyǵarmashylyq úıirmesine tegin bara alady. Jańa jobaǵa sáıkes ata-analardan sporttyń 71 túri boıynsha ótinishter qabyldanady. Qazir sporttyń boks, fýtbol, grek-rım kúresi, júzý sporty, ústel tennısi, karate, taekvondo, dzıýdo, basketbol túrleri boıynsha ata-analardan 3347 ótinim túsken. Jobany iske asyrýǵa bıylǵa 339,8 mln teńge qaralyp, 4096 balanyń sporttyq sekııalarǵa barýyna múmkindik berilgen»,-dedi M.Isahov.
Memlekettik tapsyrysty júzege asyrý maqsatynda 2021 jyldyń mamyr aıynda «Bala» sandyq platformasy iske qosyldy. Bul platformaǵa artsport.edu.kz mekenjaıy arqyly kásipkerler, jattyqtyrýshylar jáne qalanyń árbir turǵyny ata-ana retinde ótinim joldaı alady. Ata-ana balaǵa arnalǵan shyǵarmashylyq nemese sporttyq úıirmege ótinish berip, vaýcher (biregeı nómir) alady.
