ەسبول سۇلتانوۆ – پاريج وليمپياداسىندا تۋنيس ەلىنە تاەكۆوندادان 2 تاريحي جۇلدە الىپ بەرگەن جاتتىقتىرۋشى. بىلتىردان بەرى باس باپكەر قىزمەتىن اتقارىپ كەلە جاتقان قازاق ازاماتىنىڭ شاكىرتتەرى ءبىر دەمدە العاش رەت التىن جانە قولا مەدالداردى ەنشىلەدى. ەسبول سۇلتانوۆ «ادىرنا» تىلشىسىنە بەرگەن سۇقباتىندا تۋنيسكە ارنايى شاقىرتۋمەن بارعانىن ايتتى.
بۇعان دەيىن وتانداسىمىز سپورتشى رەتىندە 2006-2007 جىلدارى بەيجىڭ، دوحا، بانگكوكتە وتكەن جارىستاردا ەل نامىسىن قورعاعان بولاتىن. كەيىن باپكەرلىككە اۋىسىپ، تاەكۆوندادان قازاقستاننىڭ كادەتتەر قۇراماسىندا، ۇلتتىق قۇراما ساپىندا كومەكشى جاتتىقتىرۋشى بولىپ جۇمىس ىستەدى.
تۋنيسكە تارتقان جول
ەسبول سۇلتانوۆ ءوزىنىڭ تۋنيس كومانداسىنا قالاي باپكەر بولعانىن ايتىپ بەردى.
- وتكەن جىلدىڭ قىركۇيەگىندە تۋنيس تاەكۆوندو فەدەراتسياسىنىڭ شاقىرۋىمەن وسى ەلدىڭ ۇلتتىق قۇراما كومانداسىنىڭ تىزگىنىن قولعا الدىم. نەگىزىنەن قۇراما سپورتشىلارىمەن وقۋ-جاتتىعۋ جيىندارىندا بىرنەشە رەت كەزدەسكەنبىز. ولار 2020 جىلى توكيو وليمپياداسىنىڭ الدىندا الماتىعا كەلىپ، نەگىزگى جاتتىعۋ جيىنىن وتكىزدى. سول كەزدەن بەرى جاقسى قارىم-قاتىناستا بولدىق. بىلتىرعى الەم چەمپيوناتىندا تۋنيس جاقسى ناتيجە كورسەتە الماي، مەدالسىز قالدى. كەيىن باس باپكەرلەرىن اۋىستىرىپ، ونىڭ ورنىنا جاڭا ماماندى ىزدەدى. بىرنەشە ۇمىتكەردىڭ اراسىنان مەنى تاڭداپ، جۇمىسىمىزدى باستاپ كەتتىك، - دەيدى ول.
17 جىلدىق تاجىريبەسى بار مامان قازىرگى تاڭدا وزگە ەلدەردەن ءتۇرلى ۇسىنىستىڭ ءتۇسىپ جاتقانىن مالىمدەدى.
- تامىز ايىندا كەلىسىمشارتىم اياقتالدى. ءبىز پاريج وليمپياداسىنا دەيىن بىرگە جۇمىس ىستەيمىز دەپ كەلىسكەن بولاتىنبىز. تاريحي كورسەتكىشتەن كەيىن تۋنيس پرەزيدەنتى كەلىسىمشارتتى سوزدىرۋ، جالاقىنى ءوسىرۋ ماسەلەلەرىن كوتەرە وتىرىپ، قايتا ۇسىنىس تاستادى. تاعى ءبىر-ەكى ەلدەن دە حابارلاسىپ، جۇمىس ۇسىنعاندار بولدى. ال قازاقستانعا كەلسەك، ازىرگە مەنىمەن ەشكىم بايلانىسپادى. ۇسىنىستار ءتۇسىپ جاتسا، ارينە، قاراستىرامىز عوي، - دەيدى باپكەر.
سىرتتاعى قازاق باپكەرىنىڭ قازاقستان كومانداسىنا باعاسى
ەسبول سۇلتانوۆ پاريج وليمپياداسىنا قاتىسقان قازاقستاندىق تاەكۆوندوشىلار تۋرالى دا ايتتى.
- سپورتشىلاردى كادەت قۇراماسىن دايىنداپ جۇرگەن كەزدە كورگەنمىن. باتىرحان تولەۋعالي – جاسوسپىرىمدەر اراسىنداعى الەم چەمپيوناتىنىڭ قولا جۇلدەگەرى، ساميرحون اباباكىروۆ – G-1 Turkish Open ءتۋرنيرىنىڭ كۇمىس جۇلدەگەرى، ەرەسەكتەر اراسىنداعى تۋرنيرلەردە شيرەك فينالدارعا شىعىپ ءجۇر. ارينە، ءۇمىت كۇتتىك. ونەرلەرىنە كەلەتىن بولساق، ساميرحوندا مۇمكىندىك بولدى. الايدا تاجىريبە جەتىسپەي قالدى. ال باتىرحان ءالى جاس سپورتشى عوي. ونىڭ شيرەك فينالعا جەتۋىنىڭ ءوزى جاقسى باستاما دەپ ويلايمىن. سپورتتا ءارتۇرلى جاعداي بولاتىنىن ەسكەرگەن ءجون. كەيدە بابى ساي كەلمەيدى، كەيدە باعى جانبايدى. الدىڭعى وليمپيادالاردا ەركىن كۇرەس شەبەرلەرى جاقسى ونەر كورسەتتى. بۇل جولى گرەك-ريم، دزيۋدو، سپورتتىق گيمناستيكادان قاتىسقان سپورتشىلاردىڭ باعى جاندى. وليمپياداعا ەشكىم ۇتىلامىن دەپ بارمايدى. ءبارى مىقتى دايىندىقپەن، ۇلكەن ىنتا-جىگەرمەن قاتىسادى. قازاقستاندا سپورتپەن اينالىسۋعا جاقسى جاعداي جاسالعان. سىرتتا جۇرگەندىكتەن، بۇل سالاداعى ماسەلەلەردى ايتا المايمىن. ارنايى كوميتەت ماماندارى قورىتىندى جاساپ، ستراتەگيالىق باعدارلامالارمەن جۇمىس ىستەسە، ناتيجە بولارى انىق، - دەپ پىكىر ءبىلدىردى ول.
جەتىستىكتىڭ جەكە تاجىريبەسى
قازاق باپكەرىنىڭ پىكىرىنشە، الەمدىك دودالاردا توپ جارۋ ءۇشىن كوپ نارسەگە نازار اۋدارۋ قاجەت.
- جاقسى ناتيجەنىڭ كىلتى كەشەندى جۇمىستا دەپ ايتار ەدىم. ەڭ الدىمەن، مىقتى كوماندا جيناۋعا ءمان بەرۋ كەرەك. جاتتىقتىرۋشىلار قۇراماسى، پسيحولوگتار، مەديتسينا قىزمەتكەرلەرى مەن مەنەدجەرلەر اسا ماڭىزدى ءرول اتقارادى. ماسەلەن، بارسەلونا، مانچەستەر سيتي سىندى فۋتبول كلۋبتارىندا باس باپكەردەن بولەك، كوزگە كورىنبەيتىن مىقتى ماماندار جۇرەدى. ولار ءار سپورتشىمەن جۇمىس ىستەيدى. باپكەر مىقتى بولىپ، باسقا ماماندار جۇمىسىن ناشار اتقارسا، ناتيجە شىقپايدى. نەمەسە باپكەر ءوز ءىسىنىڭ شەبەرى بولماسا، فەدەراتسيانىڭ كوپ اقشا بولگەنىنەن دە ەش پايدا بولمايدى. سول ءۇشىن دە توپتىق جۇمىسقا نازار اۋدارۋ كەرەك. مەن تۋنيسكە بارعاننان كەيىن كومانداعا قاجەت مامانداردى ءوزىم تاڭدادىم. تۇيىندەمەلەرىن قاراپ، بۇعان دەيىن قول جەتكىزگەن ناتيجەلەرىنە ءمان بەردىم. جۇمىسقا العاننان كەيىن كوڭىلىم تولماي، ءبىر اپتادان سوڭ ورنىنا باسقا ادامدى قابىلداعان كەزدەرىم دە بولدى. ءبىر جىل ءۇي كورمەي، بىرلەسە قىزمەت اتقاردىق. ەندى، مىنە، جۇمىلا ىستەگەن جۇمىسىمىزدىڭ ناتيجەسىن كورىپ وتىرمىز،- دەپ ءسوزىن قورىتىندىلادى ەسبول سۇلتانوۆ.
ديانا اسان
«ادىرنا» ۇلتتىق پورتالى
