بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە قازاقستان مۇسىلماندارى ءدىني باسقارماسى «حالال دامۋ» جشس-ءنىڭ ديرەكتورى ايبەك اتاشەۆ مالىمدەدى.
– ەلىمىزدە قر تاۋەلسىزدىگىنىڭ 30 جىلدىعىنا وراي تۇڭعىش رەت حالىقارالىق «Halal expo 2021» كورمەسى ۇيىمداستىرىلىپ وتىر. بۇل شاراعا الەمدىك جانە وتاندىق كاسىپكەرلەر مەن ينۆەستورلار، حالال يندۋسترياسىنداعى بەلدى كاسىپورىندار مەن حالىقارالىق سەرتيفيكاتتاۋ ورگاندارى، ءدىن قايراتكەرلەرى، مەملەكەتتىك مەكەمە باسشىلارى، زيالى قاۋىم، ساراپشىلار جانە باق وكىلدەرى قاتىسادى. كورمەدە زيالى قاۋىم وكىلدەرى مەن ءدىن عالىمدارى، حالىقارالىق ساراپشىلار بايانداما جاسايدى. سونداي-اق، ۇزدىك كاسىپورىنداردى قمدب توراعاسى، باس ءمۇفتي ناۋرىزباي قاجى تاعانۇلى ماراپاتتايتىن بولادى، – دەدى ايبەك اسقاربەكۇلى.
سپيكەردىڭ سوزىنشە، تۇتىنۋشىلار كورمەدە حالال ءونىمدى تىكەلەي وندىرۋشىدەن نارىقتىق باعادان دا تومەن الا الادى.
ايتا كەتەيىك، جارمەڭكە قالالىق كورمە ورتالىعىندا 11-12 قازان ارالىعىندا وتەدى. بۇل - وتاندىق جانە شەت ەلدىك كاسىپورىندارعا ءوز ونىمدەرى مەن قىزمەتىن ۇسىنۋعا مۇمكىندىك بەرەتىن حالال يندۋسترياسىنداعى ەڭ ۇزدىك كورمە.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
