شىمكەنت قالاسىنىڭ اكىمى م.ايتەنوۆ تامىز كونفەرەنتسياسىندا ءبىلىم سالاسى قىزمەتكەرلەرىنە وقۋشىلاردىڭ ءبىلىم ساپاسىن ارتتىرۋدى، ۇستازداردىڭ ءوز ءبىلىمىن جەتىلدىرۋدە ۇنەمى ىزدەنىستە بولۋىن جانە كاسىبي تۇرعىدان جان-جاقتى دايىندالۋ كەرەكتىگىن جۇكتەگەن بولاتىن.
بۇگىنگى وقۋشى – ەرتەڭگى قالا تۇرعىنى ەكەنىن ەسكەرسەك، شاھاردا جاستايىنان ءبىلىم مەن عىلىمعا، مادەنيەتتىلىككە دەن قويىپ، باسەكەگە قابىلەتتى ۇرپاق ءوسىرۋ ماڭىزدى مىندەت. وسىنداي دارىندى بالالاردى تاربيەلەپ، ءبىلىم مەكەمەسىن قالادا وزىق دەڭگەيگە جەتكىزگەن ۇستازدىڭ ءبىرى – ارمان ورىنبەكوۆ. بۇگىندە ول №90 دارىندى بالالارعا ارنالعان مامانداندىرىلعان مەكتەپتىڭ ديرەكتورى، ءارى تاريح ءپانىنىڭ مۇعالىمى قىزمەتىن اتقارادى.
2012 جىلى اسار شاعىن اۋدانىنداعى №90 مەكتەپتىڭ باسشىلىق تىزگىنىن قولعا العاننان قازىرگە دەيىن ءبىلىم ورداسىنان 60 «التىن بەلگى» مەن 40 «ۇزدىك اتتەستات» يەگەرى شىقسا، 9-سىنىپ وقۋشىلارىنىڭ 60-ى «ۇزدىك اتتەستات» العان. سونداي-اق، اتالعان مەكتەپتىڭ 700 تۇلەگى مەملەكەتتىك گرانتتى يەلەنگەن. مۇنداي جوعارى كورسەتكىشپەن №90 مەكتەپ-گيمنازيا قالاداعى ەڭ ۇزدىك مەكتەپ قاتارىنا ەندى.
العاش اشىلعاندا، «ورتا مەكتەپ» دەڭگەيىندەگى ءبىلىم ورداسى ايتۋلى جەتىستىكتەر ناتيجەسىندە 2020 جىلى «مەكتەپ-گيمنازيا»، ارى قاراي «دارىندى بالالارعا ارنالعان مامانداندىرىلعان مەكتەپ-گيمنازياسى» مارتەبەسىنە كوتەرىلدى.
ا.ورىنبەكوۆتىڭ ءوزى 15 جاسىندا مەكتەپ ءبىتىرىپ، 19 جاسىندا جوو-نى اياقتاعان. ۇستازدار ديناستياسىنىڭ وكىلى بۇگىندە شەبەر پەداگوگ، پەداگوگيكا عىلىمىنىڭ ماگيسترى، قازاقستان پەداگوگيكالىق اكادەمياسىنىڭ پروفەسسورى. ول 2019 جىلى ەلىمىزدىڭ «ۇزدىك پەداگوگ» بايقاۋىنىڭ 10 ءفيناليسىنىڭ قۇرامىنا كىرسە، 2020 جىلى TEACHER PRIZE KAZAKHSTAN ۇيىمداستىرعان «الەم مۇعالىمى-2020»، «الەم مۇعالىمى -2021» الەمدىك جۇلدەلەرىنىڭ ىرىكتەۋ كەزەڭدەرىنە قاتىستى.
بيىل مەملەكەت باسشىسى ق.توقاەۆتىڭ جارلىعىمەن «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن تۇڭعىش رەت يەلەنگەن ۇستاز ارمان ورىنبەكوۆ بولاتىن.
«ى.التىنسارين» توسبەلگىسىنىڭ يەگەرى، شىمكەنت قالاسىنىڭ «ۇزدىك مەكتەپ ديرەكتورى» نوميناتسيا مەن «ءبىلىم سالاسىنىڭ ۇزدىگى»، وقو «ۇزدىك ۇستاز -2009»، شىمكەنت قالاسىندا «ۇزدىك ۇستاز-2007» جانە «ۇزدىك جاس ۇستاز-2006» نوميناتسيالارىنىڭ جەڭىمپازى. ارمان شىمبايۇلىنىڭ «قازاقستان تاريحى» پانىنەن شىعارعان 20 اۆتورلىق وقۋلىق، وقۋ-ادىستەمەلىك قۇرالدارىن ەلىمىزدىڭ ۇستازدارى پايدالانىپ كەلەدى.
العاش ەڭبەك جولىن باستاعان 1997 جىلدان بۇگىنگە دەيىن قالالىق، وبلىستىق، رەسپۋبليكالىق، حالىقارالىق ءپان وليمپيادالارى، عىلىمي جوبا، ءتۇرلى بايقاۋلاردا 150-دەن استام وقۋشىسى جۇلدەلى ورىندارعا يە بولعان.
شىمكەنتتىڭ ءبىلىم كورسەتكىشىن ارتتىرۋ – ستراتەگيالىق ماقسات رەتىندە قاراساق، باستى كاپيتالى – ول ادام. شاھاردا جاڭا سيپاتتا ويلايتىن، ءبىلىمدى، باسەكەگە قابىلەتتى ۇرپاقتى تاربيەلەۋ جۇمىسى ايقىندالىپ، ادام كاپيتالىن ارتتىرۋ مىندەتتەلگەن.
شىمكەنت قالاسى اكىمدىگىنىڭ ءباسپاسوز قىزمەتى
