Shymkent qalasynyń ákimi M.Áıtenov tamyz konferenııasynda bilim salasy qyzmetkerlerine oqýshylardyń bilim sapasyn arttyrýdy, ustazdardyń óz bilimin jetildirýde únemi izdeniste bolýyn jáne kásibı turǵydan jan-jaqty daıyndalý kerektigin júktegen bolatyn.
Búgingi oqýshy – erteńgi qala turǵyny ekenin eskersek, shaharda jastaıynan bilim men ǵylymǵa, mádenıettilikke den qoıyp, básekege qabiletti urpaq ósirý mańyzdy mindet. Osyndaı daryndy balalardy tárbıelep, bilim mekemesin qalada ozyq deńgeıge jetkizgen ustazdyń biri – Arman Orynbekov. Búginde ol №90 daryndy balalarǵa arnalǵan mamandandyrylǵan mekteptiń dırektory, ári tarıh pániniń muǵalimi qyzmetin atqarady.
2012 jyly Asar shaǵyn aýdanyndaǵy №90 mekteptiń basshylyq tizginin qolǵa alǵannan qazirge deıin bilim ordasynan 60 «Altyn belgi» men 40 «Úzdik attestat» ıegeri shyqsa, 9-synyp oqýshylarynyń 60-y «Úzdik attestat» alǵan. Sondaı-aq, atalǵan mekteptiń 700 túlegi Memlekettik Grantty ıelengen. Mundaı joǵary kórsetkishpen №90 mektep-gımnazııa qaladaǵy eń úzdik mektep qataryna endi.
Alǵash ashylǵanda, «orta mektep» deńgeıindegi bilim ordasy aıtýly jetistikter nátıjesinde 2020 jyly «mektep-gımnazııa», ary qaraı «daryndy balalarǵa arnalǵan mamandandyrylǵan mektep-gımnazııasy» mártebesine kóterildi.
A.Orynbekovtiń ózi 15 jasynda mektep bitirip, 19 jasynda JOO-ny aıaqtaǵan. Ustazdar dınastııasynyń ókili búginde sheber pedagog, pedagogıka ǵylymynyń magıstri, Qazaqstan pedagogıkalyq akademııasynyń professory. Ol 2019 jyly elimizdiń «Úzdik pedagog» baıqaýynyń 10 fınalısiniń quramyna kirse, 2020 jyly TEACHER PRIZE KAZAKHSTAN uıymdastyrǵan «ÁLEM MUǴALIMI-2020», «ÁLEM MUǴALIMI -2021» álemdik júldeleriniń irikteý kezeńderine qatysty.
Bıyl Memleket basshysy Q.Toqaevtyń Jarlyǵymen «QAZAQSTANNYŃ EŃBEK SIŃIRGEN USTAZY» qurmetti ataǵyn tuńǵysh ret ıelengen ustaz Arman Orynbekov bolatyn.
«Y.Altynsarın» tósbelgisiniń ıegeri, Shymkent qalasynyń «Úzdik mektep dırektory» nomınaııa men «Bilim salasynyń úzdigi», OQO «Úzdik ustaz -2009», Shymkent qalasynda «Úzdik ustaz-2007» jáne «Úzdik jas ustaz-2006» nomınaııalarynyń jeńimpazy. Arman Shymbaıulynyń «Qazaqstan tarıhy» páninen shyǵarǵan 20 avtorlyq oqýlyq, oqý-ádistemelik quraldaryn elimizdiń ustazdary paıdalanyp keledi.
Alǵash eńbek jolyn bastaǵan 1997 jyldan búginge deıin qalalyq, oblystyq, respýblıkalyq, halyqaralyq pán olımpıadalary, ǵylymı joba, túrli baıqaýlarda 150-den astam oqýshysy júldeli oryndarǵa ıe bolǵan.
Shymkenttiń bilim kórsetkishin arttyrý – strategııalyq maqsat retinde qarasaq, basty kapıtaly – ol adam. Shaharda jańa sıpatta oılaıtyn, bilimdi, básekege qabiletti urpaqty tárbıeleý jumysy aıqyndalyp, adam kapıtalyn arttyrý mindettelgen.
Shymkent qalasy ákimdiginiń baspasóz qyzmeti
