بۇگىن اقپاراتتىق-كوممۋنيكاتسيالىق ورتالىعىندا قر مەملەكەتتىك قىزمەت ىستەرى اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى ءالي كومەكباەۆ جانە قر پرەزيدەنتى جانىنداعى مەملەكەتتىك باسقارۋ اكادەمياسى شىمكەنت قالاسى بويىنشا فيليالىنىڭ ديرەكتورى ادىلەت نىسانباەۆتىڭ قاتىسۋىمەن بريفينگ ءوتتى.
ءباسپاسوز ماجىلىسىندە ءالي امانتايۇلى پرەزيدەنتتىك جاستار كادر رەزەرۆىنە ىرىكتەۋ تۋرالى ايتتى.
– مەملەكەت باسشىسىنىڭ تاپسىرماسىنا سايكەس، پرەزيدەنت جانىنداعى جاستار كادر رەزەرۆى جونىندەگى ۇلتتىق كوميسسيا رەزەرۆكە جانە ونى وتكىزۋ جوسپارىنا قاتىستى ىرىكتەۋ ءتارتىبىن بەكىتتى. ياعني، وسى جىلدىڭ 1 قىركۇيەگىنەن باستاپ رەزەرۆكە كەزەكتى ىرىكتەۋ باستالادى. ونىڭ قورىتىندىسى بويىنشا مەملەكەتتىك سەكتور ءۇشىن 50 رەزەرۆشى ىرىكتەلەدى. نەگىزگى تالاپتار: ازاماتتىعى، جاسى، ءبىلىمى جانە جۇمىس ءوتىلى، – دەدى دەپارتامەنت باسشىسى.
سپيكەردىڭ سوزىنشە، كونكۋرسقا قاتىسۋعا 35 جاستان اسپاعان، جوعارى ءبىلىمى جانە كەمىندە بەس جىل ەڭبەك ءوتىلى بار قر-نىڭ ازاماتتارى جىبەرىلمەك. بۇل ىرىكتەۋدىڭ الدىڭعى ىرىكتەۋدەن ايىرماشىلىعى – رەكرۋتينگ پروتسەسى تالاپ ەتىلەتىن ءبىلىمدى، داعدىلاردى انىقتاۋعا عانا ەمەس، سونىمەن قاتار، كانديداتتاردىڭ شىنايى موتيۆتەرى مەن ولاردىڭ قۇندىلىق باعدارلارىن باعالاۋعا باعىتتالعان.
بريفينگ بارىسىندا ادىلەت ادىلبەكۇلى رەزەرۆكە الۋ ءۇشىن ۇمىتكەرلەرگە ءوتۋ كەرەك كەزەڭدەردى مالىمدەدى.
– رەزەرۆكە الۋ ءۇشىن ۇمىتكەرلەرگە بىرنەشە جۇيەلى كەزەڭدەردەن ءوتۋ كەرەك. ولار: كانديداتتاردىڭ قۇجاتتارىن قابىلداۋ، ساندىق جانە ماتىندىك اقپاراتپەن جۇمىس ىستەۋ قابىلەتىن باعالاۋ، سيتۋاتسيالىق تاپسىرمالاردى شەشۋ، قۇزىرەتتەردى باعالاۋ، ساراپتامالىق كوميسسيادا قاتىسۋشىلارمەن اڭگىمەلەسۋ، كادر رەزەرۆى جونىندەگى ۇلتتىق كوميسسيادا قاتىسۋشىلاردىڭ كانديداتۋرالارىن قاراۋ. كوپتەگەن كەزەڭ ونلاين رەجيمىندە وتەدى. العاشقى ەكى بلوكتان ءوتۋ ناتيجەلەرى بويىنشا ۇمىتكەرلەردى باعالاۋ ۆەريفيكاتسيالاۋعا جىبەرىلەدى. ياعني، ناتيجەلەر راستالادى. تەستىلەۋدى ۆەريفيكاتسيالاۋعا ەڭ جوعارى ناتيجە كورسەتكەن 1 000 كانديدات جىبەرىلەدى، – دەدى فيليال ديرەكتورى.
ادىلەت نىسانباەۆتىڭ ايتۋىنشا، «قۇزىرەتتەردى باعالاۋ» كەزەڭىنە 250 ادام، ال كەلەسى ساراپشىلىق كوميسسيادا اڭگىمەلەسۋگە جوعارى كورسەتكىشتەگى 100 كانديدات جىبەرىلمەك. ساراپشىلىق كوميسسيا وتىرىسىنىڭ قورىتىندىسى بويىنشا ۇلتتىق كوميسسيانىڭ وتىرىسىندا قاراۋ ءۇشىن ۇسىنىلاتىن 65 كانديداتتان اسپايتىن ءتىزىم قۇرىلماق. ۇلتتىق كوميسسيا وتىرىسىنىڭ قورىتىندىسى بويىنشا پرەزيدەنتتىك جاستار كادر رەزەرۆىنە 50-دەن اسپايتىن كانديداتتى قابىلداۋ تۋرالى شەشىم قابىلدانادى.
ەسكەرتەتىن جايت، بيىلعى جاستار پرەزيدەنتتىك كادر رەزەرۆىنە ىرىكتەۋدىڭ جاڭاشىلدىعىنىڭ ءبىرى ۇمىتكەرلەرگە مەملەكەتتىك ءتىلدى ءبىلۋ دەڭگەيىن راستايتىن قۇجات تالاپ ەتىلەدى. ۇمىتكەرلەرگە مەملەكەتتىك ءتىلدى ءبىلۋدى راستايتىڭ كازتەست نەمەسە قازاق رەسمي تەست سەرتيفيكاتتارى بولۋى شارت.
ايتا كەتەيىك، كازتەست وفلاين فورماتتا ءوتۋى قاجەت بولسا، قازاق رەسمي تەستى ۇمىتكەرلەر وزدەرىنە ىڭعايلى ۋاقىتتا ونلاين تاپسىرا الادى. ول ءۇشىن ۆەب كامەراسى، ميكروفونى جانە ينتەرنەتى بار كومپيۋتەر بولۋى كەرەك. سونداي-اق، پرەزيدەنتتىك جاستار كادر رەزەرۆىنە ىرىكتەۋگە قاتىساتىن ۇمىتكەرلەر ءۇشىن 13–25 قىركۇيەك ارالىعىندا QAZAQ RESMI TEST-كە دايىندىق كۋرستارى ۇيىمداستىرىلادى. تەگىن ونلاين كۋرس ساعات 19:00-دەن 21:00-گە دەيىن اكادەميانىڭ YouTube ارناسىندا وتەدى. اقىلى كۋرستار ساعات 13:00-دەن 14:30-عا دەيىن Teams پلاتفورماسىندا (الدىن الا تىركەلۋ قاجەت) وتەدى.
ەسكە سالساق، پرەزيدەنتتىك رەزەرۆكە ىرىكتەۋ بويىنشا تولىق اقپاراتتى «pkrezerv.gov.kz» سايتىنان الۋعا بولادى. رەزەرۆتە بولۋ مەرزىمى 3 جىلدى قۇرايدى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو: ەرنار مامىر
