بۇگىن اقپاراتتىق-كوممۋنيكاتسيالىق ورتالىعىندا شىمكەنت قالالىق ءبىلىم باسقارماسىنىڭ باسشىسى جانات تاجيەۆانىڭ قاتىسۋىمەن بريفينگ ءوتتى.
ءباسپاسوز ماجىلىسىندە جانات ارىسبەكقىزى جاڭا وقۋ جىلىنىڭ باستالۋى تۋرالى ءسوز قوزعادى.
– بيىلعى وقۋ جىلىندا قالادا ءبىلىم بەرۋ ۇيىمدارى 17-گە ارتىپ، 785 مەكەمەدە 350 مىڭعا جۋىق ءبىلىم الۋشىمەن باستالعالى وتىر. ونىڭ ىشىندە 1-سىنىپقا 25 005 بالا قابىلداندى. مەكتەپ تابالدىرىعىن اتتاعان بۇل بۇلدىرشىندەرگە «الىپپە» وقۋلىعى تابىستالادى. وسى ورايدا العاشقى قوڭىراۋ مەرەكەسى مەكتەپ اۋلاسىندا وتەدى. ال وقۋشىلار جاڭا وقۋ جىلىن ءداستۇرلى فورماتتا باستايدى. بۇل رەتتە مەكتەپ فورماسىنا قويىلاتىن تالاپتار ساقتالادى. بىراق ءبىلىم ورداسىنا كلاسسيكالىق ستيلدەگى ىڭعايلى كيىممەن كەلۋگە دە رۇقسات ەتىلەدى. ايتا كەتەتىن جايت، بيىل مەكتەپ فورماسى ءۇشىن ءبىر رەتتىك قارجىلاي كومەك 30 000 تەڭگە كولەمىندە 57 466 بالاعا بەرىلدى، – دەدى باسقارما باسشىسى.
بريفينگتە بەلگىلى بولعانداي، قالاداعى ءبىلىم ۇيىمدارىندا كۇندەلىكتى تەرمومەتريا، كۆارتستاۋ، جەلدەتۋ، دەزينفەكتسيا جانە بەتپەردە رەجيمى ساقتالادى. ال بارلىق ءبىلىم ۇيىمىندا «Ashyq» جوباسى تولىق قوسىلعان. وسى ورايدا پەداگوگتەر مەن تەحنيكالىق پەرسونالدار 100% (مەديتسينالىق قارسى كورسەتىلىمدەرى بار ادامداردى قوسپاعاندا) ۆاكتسينا العان.
سپيكەردىڭ سوزىنشە، ءبىلىم الۋشى اۋىرعان جاعدايدا سىنىپ قاشىقتىقتان وقىتۋعا جىبەرىلمەك. ناۋقاس جانە بايلانىستا بولعان اتا-انالار جاعدايىندا بالالار قاشىقتىقتان ءبىلىم الادى. سونداي-اق، «ءبىر سىنىپ – ءبىر كابينەت» تالاپتارى ساقتالادى.
سونىمەن قاتار، شىمكەنت قالاسىنىڭ مەكتەپتەرىندەگى جالپى كومپيۋتەر سانى – 56 746 دانا. قازىرگى تاڭدا قالا بويىنشا مەكتەپتەردە ورتا ەسەپپەن 1 كومپيۋتەرگە كەلەتىن وقۋشى سانى 4-ءتى قۇرايدى. ال بۇگىندە بەينەباقىلاۋ، تۋرنيكەت جانە دابىل باتىرمالارىن ورناتۋ جۇمىستارى جۇرگىزىلۋدە.
ايتا كەتەيىك، ءۇشىنشى مەگاپوليستە 2021-2022 وقۋ جىلىندا مەكتەپتەردى جاڭا موديفيكاتسيالانعان جابدىقتارمەن قامتاماسىز ەتۋ ماقساتىندا 263 كابينەت، 178 ينتەراكتيۆتى تاقتا (50-فيزيكا، 95-حيميا، 82-بيولوگيا، 13-STEM, 23-روبوتوتەحنيكا كابينەتتەرىن) ورناتۋ جۇمىستارى جۇرگىزىلۋدە. ناتيجەسىندە، جاڭا موديفيكاتسيالانعان جابدىقتارمەن قامتىلعان ءپان كابينەتتەر ۇلەسى 62,5 پايىزدى قۇراماق.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو: ەرنار مامىر
جانات تاجيەۆا شىمكەنت قالاسىنىڭ ءبىلىم باسقارماسى باعلان ورالحانۇلى
