بۇگىن «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ ۇيىمداستىرۋىمەن «ۇلتتىق رۋحاني جاڭعىرۋ» ۇلتتىق جوباسىنىڭ باعىتتارى جانە ىسكە اسىرۋ تەتىكتەرىن ءتۇسىندىرۋ بويىنشا ونلاين فورماتتا سەمينار ءوتتى. سەمينارعا ەلىمىزدىڭ بارلىق وڭىرلەرىنىڭ ىشكى ساياسات باسقارماسىنىڭ باسشىلارى جانە «رۋحاني جاڭعىرۋ» وڭىرلىك جوبالىق كەڭسەلەرىنىڭ باسشى، قىزمەتكەرلەرى قاتىستى.
ونلاين كەزدەسۋدە جوبانىڭ باعىتى، ماقساتى، مىندەتتەرى جانە ىسكە اسىرۋ تەتىكتەرى تانىستىرىلدى. ۇلتتىق جوبانىڭ ءبىرىنشى باعىتى «رۋحاني جاڭعىرۋ» قۇندىلىقتارىن ىلگەرىلەتۋ جانە مەملەكەتتىك ءتىلدى دامىتۋ» باعىتى. بۇل باعىت بويىنشا 38 ءىس-شارا، 8 كورسەتكىش كوزدەلگەن. ەكىنشى «ەل رۋحى» باعىتى – مادەنيەت سالاسىندا قولجەتىمدىلىك پەن ساپانى ارتتىرۋ، 13 ءىس-شارا مەن 5 كورسەتكىشكە جەتۋ جوسپارلانعان. ءۇشىنشى «تاۋەلسىزدىك ۇرپاقتارى» باعىتى. بۇل – جاستار ءۇشىن جاڭا مۇمكىندىكتەر اشۋ جانە ولاردى قوعامدىق پايدالى ىستەرگە تارتۋ مىندەتتەرىن قامتيدى.
ايتا كەتەيىك، «ۇلتتىق رۋحاني جاڭعىرۋ» جوباسى – اقپارات جانە قوعامدىق دامۋ، مادەنيەت جانە سپورت جانە ءبىلىم جانە عىلىم مينيسترلىكتەرىمەن جۇزەگە اسىرىلادى. جوبانىڭ نەگىزگى ماقساتى – ۇلتتىق كودتى ساقتاپ، مادەني بىرەگەيلىكتى جاڭعىرتۋ، ۇلتتىق قۇندىلىقتار مەن سالت ءداستۇردى ناسيحاتتاۋ ارقىلى- قوعامنىڭ مادەني دەنگەيىن، تالعامىن جانە رۋحىن كوتەرۋ.
«ادىرنا» ۇلتتىق پورتالى
