قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ قازاقستانداعى ەڭبەك نارىعىنداعى جاعداي تۋرالى ايتتى، دەپ حابارلايدى "ادىرنا" ءتىلشىسى.
ونىڭ ايتۋىنشا، ەڭبەك نارىعىن بىرتىندەپ قالپىنا كەلتىرۋ جالعاسۋدا، ونىڭ كورسەتكىشتەرى وڭ ديناميكا كورسەتىپ وتىر. ماسەلەن، ۇلتتىق ستاتيستيكا بيۋروسىنىڭ مالىمەتى بويىنشا، اعىمداعى جىلدىڭ ەكىنشى توقسانىندا جۇمىس كۇشى سانى 9,3 ميلليون ادامدى قۇرادى، ونىڭ ىشىندە جۇمىسپەن قامتىلعاندار سانى 73 مىڭ ادامعا ءوستى.
پاندەميا باستالعاننان بەرى جۇمىس ىستەمەيتىن جۇمىسشىلاردىڭ سانى 12,2%-دان 7,4%-عا تومەندەدى. جۇمىسسىزدىق دەڭگەيى 4,9 پايىز دەڭگەيىندە ساقتالدى، ال جاستار اراسىنداعى جۇمىسسىزدىق دەڭگەيى وتكەن جىلمەن سالىستىرعاندا تومەندەپ، 3,7 پايىزدى قۇرادى، – دەدى سەرىك شاپكەنوۆ ۇكىمەت وتىرىسىندا.
مينيسترلىك بيىلعى جىلى 1,2 ميلليون ادامدى، ونىڭ ىشىندە «ەڭبەك» مەملەكەتتىك باعدارلاماسى بويىنشا 700 مىڭ ادامدى، «جۇمىسپەن قامتۋ جول كارتاسى» بويىنشا 2 مىڭ ادامدى، باسقا مەملەكەتتىك باعدارلامالار بويىنشا تاعى 440 مىڭ جاڭا جۇمىس ورنىن اشۋدى جوسپارلاپ وتىر. ءۇش باعىت بويىنشا قولداۋ شارالارى قازىردىڭ وزىندە 1 ميلليونعا جۋىق ادامعا جەتتى.
"ادىرنا" ۇلتتىق پورتالى
