شىمكەنت الەۋمەتتىك ماڭىزى بار تاۋارلارىنىڭ 4 ءتۇرى بويىنشا ءوزىن-ءوزى قامتاماسىز ەتىپ وتىر

1866
Adyrna.kz Telegram

قالا حالقىن ازىق-تۇلىكپەن تولىققاندى قامتاماسىز ەتۋ ءارى ساپالى ءونىمدى ءوندىرۋ ماڭىزدى ماقساتتىڭ ءبىرى. بارلىق رەسۋرستاردى نازارعا الساق، قازاقستان اگروونەركاسىپتىك كەشەندەگى الەۋەتى جوعارى مەملەكەت رەتىندە ەسەپتەلەدى. شىمكەنت قالاسىنىڭ اۋىل شارۋاشىلىعى جانە ۆەتەريناريا باسقارماسى قالا حالقىن ازىق-تۇلىكپەن قامتۋ تۋرالى مالىمدەدى. ايتۋلارىنشا شىمكەنت الەۋمەتتىك ماڭىزى بار ازىق-تۇلىك تاۋارلارىنىڭ 4 ءتۇرى بويىنشا ءوزىن-ءوزى قامتاماسىز ەتىپ وتىر.

ستاتيستيكاعا سۇيەنسەك، شىمكەنت قالاسىنىڭ حالقى ءبىر جىلدا ءبىرىنشى سۇرىپتى ۇننان – 14 256 توننا، قالىپتى بولكە ناننان – 77 529, قاراقۇمىق جارماسىنان – 2 193 توننا تۇتىنادى. ودان بولەك، 9 321 توننا- كۇرىش، 104 177 توننا –كارتوپ جانە ءسابىز بەن جۋادان – 21 932 توننا ساتىپ الادى. ال،  كۇنباعىس مايىنان جىلىنا – 7 676 توننا قاجەت ەكەن. ايتىپ وتەيىك مۇنىڭ بارلىعى الەۋمەتتىك ماڭىزى بار ازىق-تۇلىكتەر. جالپى العاندا  بۇل ساناتتاعى ونىمدەرىنىڭ تىزىمىنە 19 ءتۇرلى ازىق-تۇلىك ءونىمى كىرەدى. قولدا بار مالىمەتكە سۇيەنسەك مەگاپوليس  4 ءتۇرلى تاۋار ونىمىمەن ياعني، ءبىرىنشى سۇرىپتى ۇن، روجكي، كۇنباعىس مايى جانە تاۋىق جۇمىرتقاسىمەن ءوزىن 100 ءجۇز پايىز قامتي الادى.   ال ءسۇت ونىمدەرىمەن – 50 پايىزعا، تاۋىق ەتىمەن – 41, سيىر ەتىمەن – 65 پايىزعا جانە كوكونىس ونىمدەرىمەن – 10-15 پايىزعا قامتاماسىز ەتۋگە قاۋقارلى.

ماماندار  تۇز، قاراقۇمىق جارماسى، كۇرىش جانە شەكەر سەكىلدى ازىق-تۇلىك تاۋارلارىنىڭ قالامىزدا وندىرىلمەۋىنە بايلانىستى ولار كورشىلەس وبلىستاردان جانە شەت مەملەكەتتەردەن تاسىمالداناتىنىن ايتىپ وتىر. سونىمەن بىرگە ولار قالادا الەۋمەتتىك ماڭىزى بار ازىق-تۇلىك تاۋارلارىنىڭ قورى، تاۋار وندىرۋشىلەردى، قويمالار مەن ساۋدا نىساندارىن قوسقاندا جەتكىلىكتى جانە دە تاپشىلىق بويىنشا ەشقانداي قاۋىپ جوق ەكەنىن مالىمدەدى.

پىكىرلەر