شىمكەنت قالاسىنىڭ «اسار» شاعىناۋدانىنداعى № 90 مەكتەپتە قر پرەزيدەنتىنىڭ قازاقستان حالقىنا ارناعان جولداۋىن ناسيحاتتاۋ بويىنشا قاراتاۋ اۋدانىنىڭ اكتيۆ ءماجىلىسى ءوتتى. قالا اكىمى مۇرات ايتەنوۆ وسى ماقساتتا بۇعان دەيىن قالا اكتيۆىمەن، 3 اۋداننىڭ تۇرعىندارىمەن كەزدەسكەن بولاتىن. مۇرات دۇيسەنبەكۇلى قاراتاۋ اۋدانى تۇرعىندارىنا دا جولداۋدىڭ باسىم باعىتتارىن ءتۇسىندىرىپ، الداعى جوسپارلاردان حاباردار ەتتى.
جيىنعا زيالى قاۋىم وكىلدەرى مەن ارداگەرلەر، ءماسليحات دەپۋتاتتارى، ازاماتتىق قوعام وكىلدەرى، قۇقىق قورعاۋ ورگانى قىزمەتكەرلەرى قاتىستى.
جيىندا الدىمەن م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ پرورەكتورى، دوتسەنت ساكەن ماجىنبەكوۆ بايانداما جاسادى. ساكەن ارالبايۇلى ەلىمىز ساياسي جانە الەۋمەتتىك-ەكونوميكانى قالپىنا كەلتىرىپ، ۇلتتىق ماڭىزدى الەۋمەتتىك-ەكونوميكالىق جوبالاردى ىسكە اسىرىپ جاتقانىنا توقتالىپ ءوتتى.
قالا اكىمى م. ايتەنوۆ ماجىلىستە جولداۋ اياسىندا شاھاردا جۇزەگە اساتىن جۇمىس جوسپارلارىن باياندادى.
– مەملەكەت باسشىسى جولداۋدا 70-كە جۋىق تاپسىرما بەردى. جولداۋدا ايتىلعان 7 باعىتتى قالا كولەمىندە جۇزەگە اسىرۋ بويىنشا ناقتى شارالار قابىلدانادى. ەكونوميكانى ءارتاراپتاندىرۋ مىندەتتەلىپ وتىر. قالا ەكونوميكاسىن دامىتۋ ماقساتىندا كاسىپكەرلىكتى قولداۋعا 7 ملرد تەڭگە باعىتتالىپ، 2250 بيزنەس وكىلىنە قولداۋ كورسەتىلەتىن بولادى. «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارى اياسىندا بۇگىنگە دەيىن 57,4 ملرد تەڭگەگە 1 788 جوبا قارجىلاندىرىلىپ، 7,2 مىڭ جۇمىس ورنى اشىلدى. ياعني، قالادا اشىلعان ءاربىر ءۇشىنشى جوبا اتالعان باعدارلاما اياسىندا ىسكە استى. «قاراپايىم زاتتار ەكونوميكاسى بويىنشا بيىلعا جوسپارلانعان 80 جوبانىڭ 61 جوباسى قارجىلاندىرىلدى. قالانىڭ ەكسپورتتىق الەۋەتىن ارتتىرۋ ماقساتىندا «جۇلدىز» يندۋستريالدىق ايماعىندا 60 ءىرى جوبا، «ستاندارت» جەكە يندۋستريالدىق ايماقتا 30 جوبا ىسكە اسىرۋ كوزدەلۋدە. حالىقتى ازىق-تۇلىك ونىمىمەن تولىق قامتاماسىز ەتۋ ماقساتىندا قالادا 2 اگرويندۋستريالدى ايماقتىڭ قۇرىلىسى باستالدى. اۋىلشارۋاشىلىق ونىمدەرىن تەرەڭ وڭدەۋدە «بوزارىق» تاماق ونەركاسىبى يندۋستريالدى ايماعى قۇرىلىپ، قۇنى 23 ملرد تەڭگەنى قۇرايتىن 21 جوبا ىسكە اسادى، – دەدى قالا اكىمى.
پرەزيدەنت جولداۋى – ستراتەگيالىق قۇجات. قالا اكىمى جولداۋدى ىسكە اسىرۋعا بارلىق مەملەكەتتىك ورگاندار، قوعامدىق ۇيىمدار جۇمىلاتىنىن مالىمدەدى. جولداۋدا قامتىلعان باسىمدىقتاردى حالىققا جەتكىزۋدە ارنايى توپتار قۇرىلۋدا. ولاردىڭ قۇرامىنا اۋدان اكىمدەرى، ءماسليحات دەپۋتاتتارى، زيالى قاۋىم وكىلدەرى جانە باسقا دا بەلسىندى ازاماتتار ەنگىزىلىپ وتىر.
