قالا اكىمى پرەزيدەنت جولداۋىن جۇزەگە اسىرۋ بويىنشا ەڭبەكشى اۋدانىنىڭ اكتيۆىمەن كەزدەستى

1262
Adyrna.kz Telegram

شىمكەنت قالاسىنىڭ «سايرام» شاعىناۋدانى № 65 جالپى ورتا مەكتەپتە قر پرەزيدەنتىنىڭ حالىققا جولداۋىن ناسيحاتتاۋ بويىنشا ەڭبەكشى اۋدانىنىڭ اكتيۆ ءماجىلىسى ءوتتى. جيىنعا قالا اكىمى مۇرات ايتەنوۆ قاتىسىپ، «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى ستراتەگيالىق قۇجاتتاعى باسىم باعىتتارعا توقتالىپ ءوتتى. اكتيۆ جيىنىنا پرەزيدەنت اكىمشىلىگىنىڭ مەملەكەتتىك ينسپەكتورى مارات جۇندىباەۆ تا ارنايى قاتىستى.

القالى جيىندا بىرقاتار بايانداماشىلار جارىسسوزگە شىعىپ، جولداۋ اياسىندا بەرىلگەن تاپسىرمالار مەن اتقارىلاتىن جۇمىستار جونىندە ءوز ويلارىن ورتاعا سالدى. الدىمەن م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ پرورەكتورى، دوتسەنت ساكەن ماجىنبەكوۆ جولداۋدىڭ نەگىزگى باعىتتارى بويىنشا بايانداما جاسادى.

– پاندەميا جاعدايىنداعى مەملەكەتتىڭ دامۋىنىڭ جاڭا باعىتتارىن ايقىندايتىن ۇلتتىق جوبالار قۇندى بولىپ تابىلادى. جولداۋداعى باستى نازار ەلدىڭ ەكونوميكالىق جاعدايىن ارتتىرۋعا باعىتتالعان. مەملەكەت باسشىسى «پاندەميادان كەيىنگى كەزەڭدەگى ەكونوميكالىق دامۋ»، «وڭىرلىك ساياساتتى جەتىلدىرۋ»،  «ەڭبەك نارىعىندا ءتيىمدى ەكوجۇيە قالىپتاستىرۋ» باعىتتارىندا  ماڭىزدى شارالار ۇسىنىپ وتىر، – دەدى ساكەن ارالبايۇلى.
سونىمەن قاتار، وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ پرورەكتورى بارشاگۇل يسابەك بيىلعى جولداۋ قوعام مۇشەلەرىنىڭ، ونىڭ ىشىندە ءبىلىم ارقىلى وركەنيەتكە ۇمتىلعان مىڭداعان جاستاردىڭ كەلەشەككە دەگەن سەنىمىن كۇشەيتە تۇسكەنىن اتاپ ءوتتى.

قالا اكىمى جولداۋ اياسىندا شاھاردا جۇزەگە اساتىن ناقتى شارالاردان حاباردار ەتتى.
– پرەزيدەنت جولداۋدا 70-كە جۋىق تاپسىرما بەردى.  قۇجاتتا كورىنىس تاپقان 7 باعىتتى قالا كولەمىندە جۇزەگە اسىرۋ بويىنشا ناقتى شارالار قابىلدانادى. «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارىنىڭ مەرزىمى ءبىر جىلعا ۇزارتىلدى. بۇل باعىتتا شاھاردا جۇيەلى جۇمىستار قولعا الىنعان. شيكىزاتتىق ەمەس سەكتوردا 62 جوبا ىرىكتەلىپ، ەكسپورتتىق الەۋەت 608 ملرد تەڭگەگە جەتەدى. شەتەلدىك ينۆەستورلاردىڭ قاتىسۋىمەن كەمىندە 15 جوبا ىسكە اسادى، 2 مىڭ ادام جۇمىسپەن قامتىلادى. اۋىلشارۋاشىلىق ونىمدەرىن تەرەڭ وڭدەۋدە «بوزارىق» تاماق ونەركاسىبى يندۋستريالدى ايماعى قۇرىلۋدا. ەكسپورتتىق الەۋەتتى ارتتىرۋدا كوپتەپ ينۆەستيتسيا تارتۋ كەرەك. بۇل رەتتە يندۋستريالىق ايماقتاردىڭ ماڭىزى زور.
مەملەكەت باسشىسى ينفاقۇرىلىم ماسەلەسىن شەشۋدى تاپسىردى. ءبىزدىڭ بۇل باعىتتا 5 جىلعا ناقتى جوسپارىمىز بار. ءبىرىنشى قاجەتتى ازىق-تۇلىك تاۋارلارىنىڭ باعاسىن تۇراقتاندىرۋعا جەرگىلىكتى بيۋدجەتتەن قوماقتى قارجى بولىنەدى. بۇگىندە 3 الەۋمەتتىك دۇكەن جۇمىس ىستەيدى. جىل سوڭىنا دەيىن تاعى دا الەۋمەتتىك دۇكەندەر اشۋدى جوسپارلاپ وتىرمىز، – دەدى قالا اكىمى.

سونداي-اق، شاھار باسشىسى ساۋدا-لوگيستيكا ايماعىندا قوسىمشا قويمالار قۇرىلىسى جوسپارلانىپ جاتقانىن مالىمدەدى. جيىندى قورىتىندىلاعان قالا اكىمى جولداۋدا بەرىلگەن تاپسىرمالاردى بىرلەسە ورىنداۋعا شاقىردى.

پىكىرلەر