Shymkent qalasynyń «Saıram» shaǵynaýdany № 65 jalpy orta mektepte QR Prezıdentiniń halyqqa Joldaýyn nasıhattaý boıynsha Eńbekshi aýdanynyń aktıv májilisi ótti. Jıynǵa qala ákimi Murat Áıtenov qatysyp, «Halyq birligi jáne júıeli reformalar – el órkendeýiniń berik negizi» atty strategııalyq qujattaǵy basym baǵyttarǵa toqtalyp ótti. Aktıv jıynyna Prezıdent Ákimshiliginiń memlekettik ınspektory Marat Júndibaev ta arnaıy qatysty.
Alqaly jıynda birqatar baıandamashylar jaryssózge shyǵyp, Joldaý aıasynda berilgen tapsyrmalar men atqarylatyn jumystar jóninde óz oılaryn ortaǵa saldy. Aldymen M.Áýezov atyndaǵy Ońtústik Qazaqstan Ýnıversıtetiniń prorektory, doent Sáken Májinbekov Joldaýdyń negizgi baǵyttary boıynsha baıandama jasady.
– Pandemııa jaǵdaıyndaǵy memlekettiń damýynyń jańa baǵyttaryn aıqyndaıtyn ulttyq jobalar qundy bolyp tabylady. Joldaýdaǵy basty nazar eldiń ekonomıkalyq jaǵdaıyn arttyrýǵa baǵyttalǵan. Memleket basshysy «Pandemııadan keıingi kezeńdegi ekonomıkalyq damý», «Óńirlik saıasatty jetildirý», «Eńbek naryǵynda tıimdi ekojúıe qalyptastyrý» baǵyttarynda mańyzdy sharalar usynyp otyr, – dedi Sáken Aralbaıuly.
Sonymen qatar, Ońtústik Qazaqstan memlekettik pedagogıkalyq ýnıversıtetiniń prorektory Barshagúl Isabek bıylǵy Joldaý qoǵam músheleriniń, onyń ishinde bilim arqyly órkenıetke umtylǵan myńdaǵan jastardyń keleshekke degen senimin kúsheıte túskenin atap ótti.
Qala ákimi Joldaý aıasynda shaharda júzege asatyn naqty sharalardan habardar etti.
– Prezıdent Joldaýda 70-ke jýyq tapsyrma berdi. Qujatta kórinis tapqan 7 baǵytty qala kóleminde júzege asyrý boıynsha naqty sharalar qabyldanady. «Bıznestiń jol kartasy» jáne «Qarapaıym zattar ekonomıkasy» baǵdarlamalarynyń merzimi bir jylǵa uzartyldy. Bul baǵytta shaharda júıeli jumystar qolǵa alynǵan. Shıkizattyq emes sektorda 62 joba iriktelip, eksporttyq áleýet 608 mlrd teńgege jetedi. Sheteldik ınvestorlardyń qatysýymen keminde 15 joba iske asady, 2 myń adam jumyspen qamtylady. Aýylsharýashylyq ónimderin tereń óńdeýde «Bozaryq» tamaq ónerkásibi ındýstrıaldy aımaǵy qurylýda. Eksporttyq áleýetti arttyrýda kóptep ınvestıııa tartý kerek. Bul rette ındýstrııalyq aımaqtardyń mańyzy zor.
Memleket basshysy ınfaqurylym máselesin sheshýdi tapsyrdy. Bizdiń bul baǵytta 5 jylǵa naqty josparymyz bar. Birinshi qajetti azyq-túlik taýarlarynyń baǵasyn turaqtandyrýǵa jergilikti bıýdjetten qomaqty qarjy bólinedi. Búginde 3 áleýmettik dúken jumys isteıdi. Jyl sońyna deıin taǵy da áleýmettik dúkender ashýdy josparlap otyrmyz, – dedi qala ákimi.
Sondaı-aq, shahar basshysy saýda-logıstıka aımaǵynda qosymsha qoımalar qurylysy josparlanyp jatqanyn málimdedi. Jıyndy qorytyndylaǵan qala ákimi Joldaýda berilgen tapsyrmalardy birlese oryndaýǵa shaqyrdy.
