اقتاۋ قالاسىندا ەكى جاسار قىزعا جۇقپالى اۋرۋلار اۋرۋحاناسىندا جارامدىلىق مەرزىمى ءوتىپ كەتكەن ءدارى ەگىلدى، دەپ حابارلايدى "ادىرنا" ۇلتتىق پورتالى.
دارىگەرلەر قاڭتاردان بەرى قىزدىڭ دەنە قىزۋى نەگە 38-دەن تۇسپەي جاتقانىن جانە اراسىندا ۇستامالارىنىڭ سەبەبى نەدە ەكەنىن انىقتاي المادى. ناقتى دياگنوز – تسيتامەگالوۆيرۋس. دياگنوز تەك قىركۇيەكتە ءۇشىنشى گوسپيتاليزاتسيا كەزىندە، جەكە زەرتحانانىڭ ماماندارى شاقىرىلعان كەزدە عانا قويىلعان.
بۇل اۋرۋعا ارنالعان پرەپارات نۇسقاۋلاردى قاتاڭ ساقتاۋدى تالاپ ەتەدى. سەبەبى، ول جارامسىز بولىپ، ەش اسەر ەتپەي قالۋى مۇمكىن.
– بۇل پرەپارات تەك 24 ساعات جۇمىس ىستەيدى. ياعني، بالا 24 ساعات ىشىندە 2 رەت قابىلداۋى كەرەك. ولار ونى ساعات 2-دە اشتى، سوندىقتان ونى تۇنگى 2-دە بەرۋ كەرەك. كەلەسى كۇنگە قالدىرماي لاقتىرۋ كەرەك. ولار كەشە پايدالانعان ءدارىنى بۇگىندە قولداندى. ياعني، جارامدىلىق مەرزىمى ءوتىپ كەتكەن ءدارىنى سالدى، – دەيدى اقتاۋ قالاسىنىڭ تۇرعىنى جۇلدىز تادجەنوۆا.
ءبۇلدىرشىننىڭ اناسى «جارامسىز دارىدەن كەيىن ونىڭ جاعدايى كۇرت ناشارلادى» دەيدى. ءبىر كۇندە بالانىڭ دەنە قىزۋى 39 گرادۋسقا بىرنەشە رەت كوتەرىلگەن. اۋرۋحانا ەش قارسىلاسپادى. قىزمەتكەرلەردىڭ ءبىرى ءوز كىناسىن مويىندادى.
مەديتسينا قىزمەتكەرىنىڭ كەشىرىمىن وبلىستىق دەنساۋلىق ساقتاۋ باسقارماسى قابىلدادى. مەدبيكەگە سوگىس جاريالاندى.
– ازىرشە، سوگىس، ويتكەنى ول مۇنداي جاعدايعا ءبىرىنشى رەت تاپ بولدى. مەدبيكە ءبارىن مويىنداپ، بالانىڭ اكەسىنەن كەشىرىم سۇرادى. جوق، ونىڭ تەمپەراتۋراسى بولادى، ويتكەنى تسيتومەگالوۆيرۋستىق ينفەكتسيانىڭ ءوزى وسىلاي سەزىلەدى. دەنە قىزۋى ۇزاققا دەيىن ساقتالا الادى. ينفەكتسيانىڭ ءوزى سونداي، – دەپ ءتۇسىندىردى ماڭعىستاۋ بالالار اۋرۋحاناسى ديرەكتورىنىڭ ەمدەۋ-پروفيلاكتيكالىق جۇمىستارى جونىندەگى ورىنباسارى گۇلجان ەرمەكباەۆا.
الايدا، زارداپ شەككەن قىزدىڭ اناسى سوگىس تۇرىندەگى جازاعا قاناعاتتانبادى. ول مەديتسينا قىزمەتكەرىنىڭ جۇمىستان بوساتىلۋىنا قول جەتكىزىپ، بالاعا ساپالى مەديتسينالىق كومەك كورسەتۋ ءۇشىن ەلورداداعى انا مەن بالا ۇلتتىق ورتالىعىنا كۆوتا الۋعا نيەتتى.
"ادىرنا" ۇلتتىق پورتالى
