اقتاۋ اكىمىنە تۇرمىستىق قالدىقتى توگۋ ناشار ۇيىمداستىرىلعانى جانە قالانى تازالاۋ جۇمىستارى دۇرىس جۇرگىزىلمەگەنى ءۇشىن سوگىس جاريالاندى. ءبۇل تۋرالى ماڭعىستاۋ وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، 9 تامىزدا وتكەن اپپارات كەڭەسىندە قالالار مەن اۋدانداردىڭ تۇرمىستىق قاتتى قالدىقتارىن توگۋ جانە وندا سانيتاريالىق تازالىق جۇرگىزۋ ماسەلەسى قارالعان. جيىنعا ءوڭىر باسشىسى نۇرلان نوعاەۆ تا قاتىسقان.
وڭىردە سانيتاريا جاعدايى جانە ەلدى مەكەندەردەگى قاتتى تۇرمىستىق قالدىقتاردى ۋاقىتىلى شىعارۋ ماسەلەسى وزەكتى بولىپ تۇر. تۋريستەر مەن تۇرعىندار ماڭعىستاۋدىڭ تاريحي-مادەني جانە تابيعي كورىكتى جەرلەرىنە تاماق قالدىقتارىن تاستاپ كەتەدى. كەيىنگى ۋاقىتتا وبلىس ورتالىعىنىڭ تۇرعىندارىنان قوقىس جينالىپ قالۋىنا قاتىستى شاعىم سانى ايتارلىقتاي وسكەن. قتق ۋاقتىلى شىعارىلماۋى جاقىن ماڭداعى اۋدانداردىڭ، ياعني مۇنايلى اۋدانى مەن تۇپقاراعان اۋدانى اقشۇقىر اۋىلىنىڭ تۇرعىندارىن دا الاڭداتىپ وتىر.
"ەلدى مەكەندەردىڭ سانيتاريا جاعدايى الاڭداتادى. اقتاۋدىڭ لاستانۋىنا جول بەرۋگە بولمايدى. Telegram-ارناعا تۇسكەن شاعىمداردىڭ كوپشىلىگى قوقىس جيناۋ جانە ونى توگۋ پروبلەماسىنا بايلانىستى بولىپ وتىر. قالدىقتاردى ۋاقتىلى جيناماۋ قالا سۇلۋلىعى مەن تۇرعىنداردىڭ دەنساۋلىعىنا كەرى اسەرىن تيگىزەدى. بۇل - قالا اكىمى جۇمىسىنىڭ دۇرىس ۇيىمداستىرىلماۋىنىڭ ناتيجەسى", - دەدى نۇرلان نوعاەۆ.
جۇمىستى دۇرىس ۇيىمداستىرماعانى ءۇشىن ايماق باسشىسى اقتاۋ اكىمىنە، ونىڭ ورىنباسارىنا جانە تكش ءبولىمىنىڭ باستىعىنا سوگىس جاريالاعان.
”ادىرنا” ۇلتتىق پورتالى
