شىمكەنتتىڭ قۇرىلىس سالاسى جاڭا دەڭگەيگە شىعۋى ءتيىس

1030
Adyrna.kz Telegram

شىمكەنت قالاسىنىڭ اكىمى مۇرات ايتەنوۆ قالالىق قۇرىلىس باسقارماسىنىڭ جارتى جىلدىق ەسەبىن تىڭدادى. باسقارما تاراپىنان بيىلعى جىلى 113 قۇرىلىس جوباسى ىسكە اسىرىلۋدا. مەكەمە قىزمەتىنىڭ تيىمدىلىگىن باعالاۋ 8 ماقساتتى كورسەتكىشتەر بويىنشا جۇرگىزىلەدى. ونىڭ ىشىندە ەڭ نەگىزگى ينديكاتور – جىل سوڭىنا دەيىن پايدالانۋعا بەرىلەتىن تۇرعىن ۇيلەردىڭ جالپى اۋماعىن 1 ملن. شارشى مەترگە جەتكىزۋ. جاڭادان سالىنىپ جاتقان باسپانالاردىڭ ىشىندە 570 مىڭ شارشى مەترى – كوپ قاباتتى تۇرعىن ۇيلەر بولسا، 430 مىڭ م2 – جەكە تۇرعىن ۇيلەردىڭ ۇلەسىندە. سالىستىرمالى تۇردە ايتار بولساق، بىلتىر شىمكەنت قالاسى اۋماعىندا جەكە جانە كوپقاباتتى تۇرعىن ۇيلەر ساناتىنان 649,1 مىڭ شارشى مەتر تۇرعىن ءۇي پايدالانۋعا بەرىلگەن بولاتىن. ءبىرىنشى جارتىجىلدىقتا 276,3 مىڭ شارشى مەتر تۇرعىن ءۇي پايدالانۋعا بەرىلىپ، بىلتىرعى جىلدىڭ ءتيىستى كەزەڭىمەن سالىستىرعاندا 101,9 پايىزعا ارتقان.

تۇرعىن ءۇي قۇرىلىسىنىڭ بارىسىمەن مۇقيات تانىسقان قالا اكىمى مۇرات ايتەنوۆ اتقارىلىپ جاتقان جۇمىستاردى قاداعالاۋدى ۇتىمدى ۇيىمداستىرۋ كەرەكتىگىنە نازار اۋداردى. بۇل باعىتتا جاڭا تەحنولوگيالاردى قولدانىپ، سالىنىپ جاتقان نىساندارعا ونلاين رەجيمدە ترانسلياتسياعا جاساۋعا مۇمكىندىگى بار كامەرالار قويۋعا بولاتىنىن اتاپ ءوتتى. تاپسىرىس بەرۋشى – قۇرىلىس باسقارماسى وسىلايشا اتقارىلىپ جاتقان جۇمىستاردىڭ ساپاسىن كۇندەلىكتى باقىلاپ، وندىرىستىك كەستەنىڭ ساقتالۋىنا كەپىل بولماق. قۇرىلىس نىساندارىمەن تىكەلەي ەفيردە بايلانىسا وتىرىپ، جۇمىس جيىندارىن دا وتكىزۋگە بولاتىنىن اتاپ ءوتتى.باسقارمانىڭ التى ايدا اتقارعان جۇمىستارى جونىندە ەسەپ بەرگەن باسقارما باسشىسىنىڭ مىندەتىن اتقارۋشى ب.كۇزدەۋباەۆتىڭ ايتۋىنشا، قۇرىلىس جۇمىستارى كولەمىنىڭ جىلدىق جوسپارى 135,6 ملرد تەڭگە بولىپ بەلگىلەنگەن. ءبىرىنشى جارتىجىلدىقتا اتقارىلعان قۇرىلىس كولەمى 50,1 ملرد تەڭگەگە جەتىپ، بىلتىرعى جىلدىڭ سايكەس كەزەڭىمەن سالىستىرعاندا ناقتى كولەم يندەكسى 115,6 پايىز بولىپ وتىر.

بيىل «نۇرلى جەر» باعدارلاماسى بويىنشا 4832 پاتەرلى 79 كوپقاباتتى تۇرعىن ۇيلەردىڭ قۇرىلىستارى باستالعان. ونىڭ ىشىندە 1224 پاتەرلى 18 تۇرعىن ءۇي – ارەندالىق باسپانالار بولسا، 3608 پاتەرلى 61 ءۇي – تۇرعىن ءۇي نەسيەسىن العاندارعا تابىستالماق.اكىمشىلىك ىسكەرلىك ورتالىعىندا كوپقاباتتى 12 ءۇي بيىل پايدالانۋعا بەرىلسە، 9-قاباتتى سەگىز ءۇيدىڭ قۇرىلىسى كەلەسى جىلى اياقتالادى. جاڭادان سالىنعان نىساندارعا ينجەنەرلىك ينفراقۇرىلىم تارتۋ بويىنشا 15 جوبانى ىسكە اسىرۋ كوزدەلىپ، ونىڭ 6 نىسانى پايدالانۋعا بەرىلگەن. ءبىلىم سالاسى بويىنشا 11 نىساننىڭ قۇرىلىسىنا قارجى بولىنگەن. ونىڭ ىشىندە 4 مەكتەپتىڭ عيماراتى جاڭا وقى جىلىنا دەيىن ىسكە قوسىلادى. مادەنيەت جانە سپورت سالالارىندا 5 نىساننىڭ قۇرىلىستارى جوسپارلانىپ، ونىڭ ەكى نىسانى پايدالانۋعا بەرىلدى.جوبا-سمەتالىق قۇجاتتامالار ازىرلەۋ بويىنشا ەكى مەديتسينالىق ۇيىم مەن سايرام تۇرعىن الابىندا ءورت ءسوندىرۋ دەپوسىنىڭ قۇرىلىستارىن جۇرگىزۋ جوسپارلانىپ، ىسكە اسىرۋدا.

باسقارمانىڭ التى ايدا ايتقارعان جۇمىستارىن تالداعان مۇرات دۇيسەنبەكۇلى قۇرىلىس قالانىڭ دامۋىنا ىقپال ەتەتىن ماڭىزدى سالا ەكەندىگىنە توقتالدى. قۇرىلىس جۇرگىزۋ قالا ەكونوميكاسىنىڭ دامۋىنا تۇتاستاي اسەر ەتىپ، بيزنەستىڭ قۇرىلىس نارىعىنا بەيىمدەلۋى جۇزەگە اساتىنىن، ونىڭ ىشىندە قۇرىلىس ماتەريالدارىنىڭ ءوندىرىسى قارقىن الاتىنىن اتاپ ءوتتى. قالانىڭ تىرشىلىگى جىلجىمايتىن مۇلىك نارىعى ارقىلى ءوربيتىنىن ەسكە سالعان قالا باسشىسى، قۇرىلىس جۇمىستارىن جوسپارلاۋدا ناقتىلىق كەرەكتىگىنە كوڭىل ءبولدى. بۇل باعىتتا باسقارمانىڭ جوسپارلاۋ قىزمەتى قۇرىلىمىنىڭ جۇمىسىن جۇيەلەۋدى تاپسىردى..ەسەپ بەرۋ جيىنىن قورىتىندىلاعان قالا اكىمى مۇرات ايتەنوۆ كەلەشەكتە شىمكەنت تازا قالا بولۋى كەرەكتىگىن نازارعا الىپ، قالادا شاڭى شىعىپ جاتقان جەرلەر بولماۋى كەرەكتىگىن تاعى دا ەسكەرتتى. ول ءۇشىن قۇرىلىس الاڭدارىنا كىرىپ-شىعاتىن تەحنيكالاردىڭ لايدان تۇگەلدەي تازارتىلىپ وتىرۋىن مىندەتتەدى.

 

اۆت. ايگەرىم

پىكىرلەر