ءموبيلدى بريگادالار كۇنىنە مىڭنان اسا شاقىرتۋعا بارادى

751
Adyrna.kz Telegram

شىمكەنت قالاسىنداعى مەملەكەتتىك جانە جەكەمەنشىك ەمحانا جانىنان قۇرىلعان ءموبيلدى بريگادالار كۇنىنە مىڭنان اسا شاقىرتۋعا بارادى. ەپيدەميولوگيالىق جاعدايدىڭ كۇردەلەنۋىنە بايلانىستى امبۋلاتوريالىق كومەك كورسەتەتىن بريگادا ماماندارىنا تۇسەتىن شاقىرتۋلار سانى ارتىپ وتىر. بۇل تۋرالى شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ مالىمدەدى.

باسقارما باسشىسىنىڭ ايتۋىنشا، قازىرگى تاڭدا 39 مەملەكەتتىك جانە جەكەمەنشىك ەمحانادا 205 ءموبيلدى بريگادا جۇمىس ىستەۋدە. اتالعان بريگادا قىزمەتكەرلەرى  Covid-19, پنەۆمونياعا شالدىققان، ءجىتى رەسپيراتورلىق اۋرۋدىڭ بەلگىلەرى بار  پاتسيەنتتەرگە ۇيدە امبۋلاتوريالىق-ەمحانالىق كومەك كورسەتىپ، كوۆيدكە  كۇدىكتى پاتسيەنتتەردەن جەدەل جانە پتر-تەستىلەۋ الادى.

باقىتجان پوزيلوۆ – شىمكەنت قالاسى دەنساۋلىق ساقتاۋ باسقارماسىنىڭ باسشىسى

قازىرگى تاڭدا 4 313 ناۋقاس ەمدەلىپ جاتىر، ونىڭ ىشىندە 2 551 ناۋقاس ءۇي جاعدايىندا امبۋلاتورلىق ەم قابىلداۋدا. وسى امبۋلاتوريالىق ەم قابىلداپ جاتقاندارعا ءموبيلدى بريگادا قىزمەتكەرلەرى كومەك كورسەتۋدە. قالادا جىل باسىنان بەرى كوروناۆيرۋس جۇقتىرعان 13 521 ناۋقاس انىقتالعان.  وكىنىشكە قاراي، 248 ناۋقاس قايتىس بولعان. سوڭعى ءبىر ايدا كوز جۇمعانداردىڭ سانى كۇرت كوبەيگەن.

سونداي-اق، قاۋىپتى دەرتكە شالدىققاندار قاتارىندا جۇكتى ايەلدەردىڭ دە قاتارى ازايماي تۇر.  قازىرگى تاڭدا ينفەكتسيالىق ستاتسيوناردا  كوروناۆيرۋسكە شالدىققان 121 جۇكتى ايەل ەمدەلۋدە. ينفەكتسيا جۇقتىرعان 2 جۇكتى ايەلدىڭ جاعدايى اۋىر، -دەيدى باقىتجان پوزيلوۆ.

باقىتجان پوزيلوۆ – شىمكەنت قالاسى دەنساۋلىق ساقتاۋ باسقارماسىنىڭ باسشىسى

ايتا كەتەيىك، وتكەن تاۋلىكتە COVID-19 ينفەكتسياسىن جۇقتىرۋدىڭ 418 جاعدايى تىركەلدى. قازىر ينفەكتسيالىق ستاتسيونارلارداعى جانساقتاۋ بولىمىندە 171 ناۋقاس ەمدەلۋدە. توسەك-ورىن تولىمدىلىعى 64% قۇرايدى. باسقارما باسشىسى، دەلتا شتاممىنا بايلانىستى بارشا قالا تۇرعىندارىن ساقتىق شارالارىن ءجىتى ۇستانۋعا شاقىرادى.

 

پەريزات ورتاي                                           

پىكىرلەر