شىمكەنتتە كوممۋنالدىق ينفراقۇرىلىم ماسەلەسى شەشىلىپ كەلەدى

1210
Adyrna.kz Telegram

شىمكەنتتە العاشقى جارتىجىلدىقتا ەكونوميكانىڭ بازالىق سەكتورلارى بويىنشا تۇراقتى ءوسىم قامتاماسىز ەتىلدى. قالا ەكونوميكاسىنىڭ قۋات الۋى ىشكى رەزەرۆىمىزدى جۇيەلەپ، ينفراقۇرىلىمدىق جوبالاردى تابىستى ىسكە اسىرۋعا مۇمكىندىك بەردى.

قازىرگى كەزدە قالاداعى 81 شاعىناۋدان مەن تۇرعىن الاپتىڭ ىشىندە 5 ەلدى مەكەن اۋىز سۋ جۇيەلەرىمەن جارتىلاي قامتىلعان بولسا، 7 ەلدى مەكەننىڭ تۇرعىندارى – اۋىز سۋ تاسىمالىنا تاۋەلدى بولىپ وتىر. بيىل اۋىز سۋمەن قامتۋ بويىنشا 16 ملرد تەڭگەگە 14 جوبانىڭ قۇرىلىسى باستالدى. ونىڭ ىشىندە اۋىز سۋ تاسىمالىنا تاۋەلدى بولىپ وتىرعان 7 ەلدى مەكەننىڭ تۇرعىندارى مەن سۋ جۇيەلەرىمەن جارتىلاي قامتىلعان 2 ەلدى مەكەنگە سۋ جەتكىزەتىن 3 ماگيسترالدى جۇيەلەردىڭ جانە 11 ەلدى مەكەندە ىشكى ورامدىق سۋ جۇيەلەرىنىڭ قۇرىلىستارى جۇرگىزىلۋدە.

كارىز جۇيەلەرى بويىنشا 7 ملرد تەڭگەگە 13 نىساننىڭ قۇرىلىستارى قولعا الىندى. ونىڭ ىشىندە 3 ماگيسترالدى جانە 10 ىشكى ورامدىق كارىز جۇيەلەرى سالىنىپ، ورتالىقتاندىرىلعان كارىز جۇيەلەرىمەن قامتىلعان تۇرعىندار ۇلەسى 54 پايىزعا جەتپەك.         ساپالى ەلەكتر ەنەرگياسىمەن قامتۋدا بيىلعى جىلى 9,6 ملرد تەڭگەگە 14 نىساننىڭ قۇرىلىسى باستالدى. ەلەكتر جەلىلەرىن جاڭارتۋ جۇمىستارى ەڭ الدىمەن ەلەكتر ەنەرگياسىنىڭ ساپاسى تومەن بولىپ وتىرعان 16 ەلدى مەكەندى قامتيدى.

بۇگىنگى تاڭدا قالادا 33 ەلدى مەكەننىڭ تۇرعىندارى تابيعي گازبەن جارتىلاي قامتىلعان بولسا، 8 ەلدى مەكەنگە گاز جۇيەلەرى تارتىلماعان. بيىلعى جىلى حالىقتى گازبەن قامتۋ سالاسىنا 6,2 ملرد تەڭگە قارالىپ، 18 نىساننىڭ قۇرىلىسى باستالدى. ناتيجەسىندە گاز تاراتۋ ستانتسياسى ىسكە قوسىلىپ، 11 مىڭعا جۋىق تۇرعىن گاز جۇيەلەرىمەن قامتىلماق. جىل سوڭىنا دەيىن قالا تۇرعىندارىن گازبەن قامتۋ كورسەتكىشىن 93 پايىزعا جەتكىزۋ كوزدەلگەن.

كولىك ينفراقۇرىلىمىن دامىتۋ مىندەتتەرى شەڭبەرىندە بيىلعى جىلى 163 كوشەنى كۇردەلى جانە ورتاشا جوندەۋدەن وتكىزۋ جۇمىستارى باستالدى. قالاداعى باستى ترانسپورتتىق ارتەريا – د.قوناەۆ داڭعىلىنىڭ جالعاسىن سالۋ جۇمىستارى قارقىندى تۇردە ىسكە اسىرىلۋدا. ۇزىندىعى 31,6 شاقىرىمدى قۇرايتىن ا-2 اۆتوماگيسترالى قايتا قۇرىلىمداۋدان وتكىزىلىپ وتىرسا، وڭتۇستىك جانە شىعىس اينالما جولدارىنىڭ جانە 2 جولايىرىقتىڭ قۇرىلىستارى جۇرگىزىلۋدە.    بۇل جۇمىستاردىڭ بارلىعى قالانىڭ كوممۋنالدىق ينفراقۇرىلىمىنىڭ ساپاسىن ماقسات تۇتىپ، كولىك ينفراقۇرىلىمىن دامىتۋعا سەرپىن بەرمەك.

 

اۆت. پەريزات

پىكىرلەر