شىمشاھاردىڭ «وڭتۇستىك» يندۋستريالدى ايماعىندا ورنالاسقان تەمىر-بەتون بۇيىمدارىنىڭ 120-دان استام تۇرلەرىن شىعاراتىن زاۋىت بار. ءونىمى جوعارى ساپاسىمەن ەرەكشەلەنەدى. كاسىپورىندا، بۇگىندە كۇردەلىلىگى مەن گەومەترياسى ءارتۇرلى ستاندارتتى ەمەس قۇرىلىس ماتەريالدارى وندىرىلەدى. اتالمىش ونەركاسىپتىڭ تىنىس-تىرشىلىگىمەن ارىپتەسىم بالنۇر ءجۇمادىللا تانىسىپ قايتتى.
«ادىلەت قۇرىلىس LTD» سەرىكتەستىگىنىڭ نەگىزى 2011 جىلدىڭ كۇزىندە ەلباسى قولداۋىمەن قالانعان. زاۋىت اۋماعى 7 گەكتار جەردى الىپ جاتىر. جىلدىق قۋاتتىلىعى 20-25 مىڭ كۋب بەتون. ءوندىرىس وشاعىنداعى تەحنيكالاردىڭ بارلىعى شەتەلدىك. ارنايى تاپسىرىسپەن يسپانيادان اكەلىنگەن. ارقايسىسى 15 ءونىم ءتۇرىن شىعارۋعا قاۋقارلى. ءبىر قۋانارلىعى كاسىپورىنداعى قوندىرعىلاردا جەرگىلىكتى حالىق جۇمىس ىستەيدى.
ارمان ءاشىروۆ – «ادىلەت قۇرىلىس LTD» ءجشس–نىڭ شەبەرى
كاسىپورىننان 150-گە جۋىق ادام ازامات ناپاقاسىن ايىرىپ وتىر. جۇمىس ۋاقىتى 2 اۋىسىمعا بولىنگەن. زاۋىت باسشىسى جۇمىسشىلارعا ىڭعايلى جاعداي جاساعان. جوعارى جالاقى، جاتىن ورىن، ۋاقىتىلى بەرىلەتىن 3 مەزگىل تاماق.
شاۆكات ابدۋجاليلوۆ – زاۋىت وپەراتورى
ءوندىرىس پروتسەسى زەرتحانانىڭ قاتاڭ باقىلاۋىندا. تەمىربەتون بۇيىمدارىنىڭ ءار كومپونەنتى الدىن-الا سىناۋدان وتەدى. وسىلايشا، ءوندىرىس وشاعىنا تەك جوعارى ساپالى شيكىزات تاڭدالادى. قاجەتتى شيكىزات وڭتۇستىك ءوڭىر مەن رەسەيدان جەتەدى. شىعارىلعان ءونىمنىڭ 70%-ى تاراز، شىمكەنت، قىزىلوردا، استانا جانە الماتى قالالارىنا تاسىمالدانادى. زاۋىت باسشىسى الداعى ۋاقىتتا نارىققا جاڭا ءونىم ءتۇرىن ۇسىنۋدى كوزدەپ وتىر. سونداي-اق جۇمىس ورىندارىن كوبەيتىپ، جىلدىق قۋاتتىلىعىن ارتتىرۋ دا جوسپارداعى ءىس.
نۇركەن جاكيپوۆ - «ادىلەت قۇرىلىس LTD» جشس زاۋىتىنىڭ ديرەكتورى
سۋ وتكىزۋ قۇبىرلارى، تەمىربەتون قادالار، تىرەكتەر، پورتال قابىرعالارى، جيەكتەستار، قورشاۋ جانە بەتون بلوكتارىنىڭ بارلىعى دا وسى جەردەن شىعادى. باعاسى دا قولجەتىمدى. تەمىربەتون بۇيىمدارىن ءوندىرۋ ءۇشىن كومپانيا بەرىكتىك پەن جوعارى ساپالى ونىمگە كەپىلدىك بەرەتىن ارنايى قوسپالارىلاردى تۇتىنادى. ايتا كەتەيىك، بۇل كاسىپورىن وڭىردەگى ەلەكترلەندىرۋ، سۋمەن جابدىقتاۋ، قۇرىلىستار مەن اۆتوجولدار سالۋ ءۇشىن پايدانىلاتىن قۇرىلىس زاتتارىن وندىرەتىن جالعىز زاۋىت.
بالنۇر ءجۋمادىللا
