فوتو: br.az
كانادالىق اقىن ەنن كارسون ادەبيەت سالاسىنداعى نوبەل سىيلىعىنىڭ لاۋرەاتى اتاندى. ماراپات وعان كلاسسيكالىق داستۇرمەن شىعارماشىلىق ديالوگ ورناتىپ، قازىرگى ادەبيەتتىڭ جاڭا فورمالارىن قالىپتاستىرعانى ءۇشىن بەرىلگەنى حابارلاندى. بۇل تۋرالى ۆۆس جازدى، دەپ حابارلايدى “ادىرنا”.
«ەنن كارسون بۇكىل شىعارماشىلىق جولىندا ادەبي ەڭبەكتى اۋدارماشىلىق قىزمەتپەن جانە ءتۇرلى ۋنيۆەرسيتەتتەردە ساباق بەرۋمەن ۇشتاستىرىپ كەلەدى. ونىڭ شىعارمالارىنىڭ بارلىعى دەرلىك ەكى باستاۋ توعىسقان تۇستا دۇنيەگە كەلگەن: فيلولوگتىڭ سوزگە دەگەن قۇشتارلىعى مەن اقىننىڭ جاڭا ماعىنالاردى تابۋعا دەگەن ۇمتىلىسى»، – دەپ اتاپ ءوتتى شۆەتسيا اكادەمياسىنىڭ ساراپشىلار كوميسسياسى.
76 جاستاعى ەنن كارسون 1950 جىلى 21 ماۋسىمدا تورونتودا دۇنيەگە كەلگەن. ول اقىن، اۋدارماشى ءارى ادەبيەت زەرتتەۋشىسى رەتىندە تانىمال. شىعارماشىلىعىندا پوەزيا مەن پروزانى ۇشتاستىرىپ، كونە گرەك ادەبيەتىنىڭ داستۇرلەرىن زاماناۋي تاسىلدەرمەن جاڭعىرتقان. سونداي-اق كونە گرەك تىلىنەن اۋدارما جاساپ، 30 جىلدان استام ۋاقىت بويى ۋنيۆەرسيتەتتەردە انتيكالىق فيلولوگيادان ساباق بەرگەن.
شۆەتسيا اكادەمياسىنىڭ مالىمەتىنشە، كارسون شىعارمالارىنىڭ باستى ەرەكشەلىگى — تىلگە تەرەڭ فيلولوگيالىق كوزقاراس پەن جاڭا ماعىنا ىزدەۋگە باعىتتالعان پوەتيكالىق ىزدەنىستىڭ ۇيلەسۋى. ونىڭ تۋىندىلارى وقىرمانعا دايىن قورىتىندى ۇسىنباي، ءماتىندى ءوز بەتىنشە تۇسىندىرۋگە مۇمكىندىك بەرەدى.
2026 جىلعى سىيلىققا ۇمىتكەرلەر قاتارىندا امەريكالىق جازۋشى دجامايكا كينكەيد پەن قىتايلىق قالامگەر تسان سيۋە دە اتالعان. الايدا ادەبيەت سىنشىلارى مەن بۋكمەكەرلەر ەنن كارسوندى نەگىزگى فاۆوريتتەردىڭ ءبىرى رەتىندە قاراستىرعان.
ادەبيەت سالاسىنداعى نوبەل سىيلىعى جازۋشىنىڭ ءومىر بويعى شىعارماشىلىق ەڭبەگى ءۇشىن بەرىلەدى. لاۋرەاتقا 12 ميلليون شۆەد كرونى كولەمىندە سىياقى تابىستالادى.
