وتكەن جىلى قاماۋعا الىنعان تۇركىستاندىق كاسىپكەر حالي سارمانوۆتىڭ تۋىستارى قر پرەزيدەنتى ق.توقاەۆتان اراشا سۇراپ، بەينەۇندەۋ جولدادى دەپ حابارلايدى «ادىرنا» ۇلتتىق پورتالى.
— قۇرمەتتى قاسىم-جومارت كەمەلۇلى، سىزگە ۇندەۋ جولداۋعا ءماجبۇرمىز. سەبەبى مەنىڭ قاريا، دەنساۋلىعىندا سىرقاتى بار، ءۇش رەت ينسۋلت العان اكەم حالي سارمانوۆتى تۇركىستان وبلىسىنىڭ پوليتسياسى جانە پروكۋراتۋراسى زاڭسىز قىلمىستىق قۋدالاۋدا. اكەم باس بوستاندىعىنان ايرىلىپ، زارداپ شەگۋدە. ءسىزدى ءبىزدىڭ ماسەلەمىزگە قۇلاق اسۋىڭىزدى ءبىر جىل بويى ءوتىنىپ كەلەمىز. كوپتەگەن حاتتار، بىرنەشە رەت 500-دەن اسا قول قويعان پەتيتسيا جولدانعان بولاتىن. 200-دەي ىزالانعان حالي سارمانوۆتىڭ جاناشىرلارى تۇركىستان وبلىستىق سوتىنا جانە پروكۋراتۋرا عيماراتىنا كەلىپ، زاڭسىزدىقتاردى، قۋدالاۋدى توقتاتۋدى تالاپ ەتتى. الايدا قىسىم ارتىپ، زاڭسىزدىقتار جالعاسىن تابۋدا. اكەمدى باس بوستاندىعىنان ايىرۋدان باسقا رەيدەرلىك تاركىلەۋ ارەكەتتەرى كۇشەيۋدە. ەستيتىن مەملەكەت قاعيداسى تۋرالى ايتىلىپ كەلەدى، بىراق ءجۇز مىڭداعان ادام زاڭسىزدىققا جەلىدە كۋا بولۋدا. سىزگە ءوتىنىپ، جالىنۋعا ءماجبۇرمىز.
قۇرمەتتى قاسىم-جومارت كەمەلۇلى، ءسىزدى جوعارى سوتقا جانە باس پروكۋراتۋراعا تۇركىستان وبلىسىنداعى زاڭسىزدىقتارعا ارنايى تەكسەرۋ جۇرگىزۋدى تالاپ ەتۋىڭىزدى سۇرايمىز، — دەدى كاسىپكەردىڭ ۇلى.
ايتا كەتۋ كەرەك، تۇركىستاندىق كاسىپكەر حالي سارمانوۆ ءبىر جىلدان بەرى قاماۋدا وتىر. ول 2020 جىلدىڭ 2 قازانىندا تۇركىستان وبلىستىق تەرگەۋ سۋدياسىنىڭ سانكتسياسىمەن قاماۋعا الىنعان. سەنىپ تاپسىرىلعان باسقا تۇلعانىڭ مۇلكىن يەلەندى دەگەن كۇدىككە ىلىنگەن كاسىپكەردى تەرگەۋشى مەن سۋديا سوت ءىسىن جۇرگىزۋگە كەدەرگى كەلتىرەدى نەمەسە تەرگەۋدەن، سوتتان جاسىرىنادى دەپ كۇدىكتەنىپ، كەپىل تۇرىندەگى بۇلتارتپاۋ شاراسىنىڭ ورنىنا قاماۋعا العان.
حالي سارمانوۆ قازىر 69 جاستا. كاسىپكەر «قاينار استىق» وندىرىستىك كووپەراتيۆىنىڭ باسشىسى بولعان.
بۇعان دەيىن تۇركىستانداعى كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستە كاسىپكەر كەزىندە اۋىل اقساقالدارىنىڭ وتىنىشىمەن كووپەراتيۆكە جەرلەردى كىرگىزىپ، اۋىلدىڭ ءال-اۋقاتىن كوتەرۋگە كۇش سالعانىن، سول وندىرىستىك ۇجىمعا قاتىسى جوق ازاماتتار بىرنەشە جىل بويى بىرىككەن شارۋاشىلىقتىڭ جىلجىمايتىن مۇلكىن يەلەندى دەپ وزىنە جالا جاپقانىن ايتقان بولاتىن.
"ادىرنا" ۇلتتىق پورتالى.
