9 قىركۇيەكتە الماتى قالاسىندا «دومبىراشىلار وداعى» رەسپۋبليكالىق قوعامدىق بىرلەستىگىنىڭ اشىلۋ سالتاناتى ءوتتى، دەپ حابارلايدى «ادىرنا» ءتىلشىسى.
جيىنعا «دومبىراشىلار وداعىنا» مۇشە بولعان ەلىمىزدىڭ تانىمال ءداستۇرلى انشىلەرى، كۇيشىلەرى قاتىسىپ، ءسوز سويلەدى.
«دومبىراشىلار وداعى» رەسپۋبليكالىق قوعامدىق بىرلەستىگى - 2021 جىلى، تامىز ايىنىڭ 10-شى جۇلدىزىندا قۇرىلدى. قوعامدىق بىرلەستىكتىڭ نەگىزگى ماقساتى ۇلتتىق ونەردى كەڭىنەن دارىپتەپ، جاستاردىڭ ءداستۇرلى ونەرگە قىزىعۋشىلىعىن وياتىپ، ۇلتتىق قۇندىلىعىمىزدى دامىتۋ جولىندا ەڭبەك ەتۋ .
«دومبىراشىلار وداعى» رەسپۋبليكالىق قوعامدىق بىرلەستىگىنىڭ نەگىزگى شارتى – بىرلەستىكتىڭ مۇشەلىگىنە ءداستۇرلى انشىلەر، جىرشىلار مەن تەرمەشىلەر قابىلدانادى.
«دومبىراشىلار وداعىنىڭ» اتقارار نەگىزگى مىندەتى-حالقىمىزدىڭ ءداستۇرلى ءان ونەرىن، كۇي ونەرىن جانداندىرۋ، جاس بۋىن وكىلدەرىنىڭ شىعارماشىلىعىن قولداۋ. ءتۇرلى بايقاۋلار، باعدارلامالار، كونتسەرتتەر ۇيىمداستىرۋ، سونىمەن قاتار، ءداستۇرلى ءاندى دامىتۋ ماقساتىندا ەكسپەديتسياعا شىعىپ، كۇي ونەرىن دارىپتەۋ.
پرەسس-كونفەرەنتسيا بارىسىندا الماتى قالاسىنىڭ ونەر وكىلدەرىنە «دومبىراشىلار وداعى» رەسپۋبليكالىق قوعامدىق بىرلەستىگىنىڭ كۋالىكتەرى مەن سەرتيفيكاتتارى تابىستالدى. جيىندا رامازان ءومىرالىۇلى ستامعازيەۆ، ساۋلە ستاحانشىلقىزى جانپەيىسوۆا، نۇرجان قابيمولداۇلى جانپەيىسوۆ، بايبوسىنوۆا ۇلجان ماليكايدارقىزى، گۇلميرا ءنالىباي جانە «دومبىرا» ۇلتتىق تەلەارناسىنىڭ باسشىسى قانات قۇدايبەرگەنۇلى ەرجىگىتوۆ ءسوز سويلەدى.
بىرلەستىكتىڭ ماقساتىن، جاسايتىن جۇمىستارىن، قازىرگى تاڭدا ءداستۇرلى ونەرىمىزگە قاتىستى بولىپ جاتقان ماسەلەلەردىڭ شەشىمىن قاراستىرۋ جولدارىن تالقىلاپ، جۋرناليستەردىڭ سۇراقتارىنا جاۋاپ بەردى. مۇشەلىككە قابىلدانۋ شارتتارى تالقىلاندى. سونىمەن قاتار، جيىنداعىلاردىڭ كوتەرگەن باستى ماسەلەسى – «دومبىرا» ۇلتتىق تەلەارناسىنىڭ تىكەلەي جەرسەرىكتىك حابار تاراتاتىن OTAU TV قىزمەتىنە قوسۋ، ۇلتتىق ونەردى شالعاي مەكەندەگى حالىققا دا كورسەتۋ، تانىتۋ.
«دومبىراشىلار وداعى» رەسپۋبليكالىق قوعامدىق بىرلەستىگىنىڭ اشىلۋ سالتاناتىندا قازاقستاننىڭ ەڭبەك سىڭىرگەن ءارتىسى رامازان ستامعازيەۆ:
«دومبىرا ۇلتتىق ارناسىن OTAU TV-عا كىرگىزۋ كەرەك. ءداستۇر جولىندا جۇرگەن انشىلەردى حالىققا دارىپتەۋىمىز ءتيىس»، دەپ ءوز ويىن بىلدىرسە، ساۋلە جانپەيىسوۆا «بىرلىك كەرەك. ءداستۇرلى ونەر يەلەرىنىڭ بىرلىگى كەرەك. وداقتىڭ اشىلۋىنداعى باستى ماقسات تا سول»-دەدى.
سونىمەن قاتار، «دومبىراشىلار وداعى» رەسپۋبليكالىق قوعامدىق بىرلەستىگىنىڭ تورەاعاسى قانات قۇدايبەرگەنۇلى ەرجىگىتوۆ OTAU TV ماسەلەسىنە باسا نازار اۋدارىپ، «ءداستۇرلى ونەردى تىڭداۋشى كورەرمەنىمىز-اۋىلدا!»- دەپ، قازاقستاندا 5000 اۋىل بار ەكەندىگىن تىلگە تيەك ەتتى.
ۇلجان بايبوسىنوۆا «ونەردەگى جاۋاپكەرشىلىك-ءومىرىمىزدىڭ سوڭىنا دەيىنگى جاۋاپكەرشىلىك»، دەپ بايانداسا، قازاقستاننىڭ ەڭبەك سىڭىرگەن قايراتكەرى نۇرجان جانپەيىسوۆ «وزگە وداقتار سەكىلدى بۇل وداقتىڭ دا اتقاراتىن قىزمەتى وتە كوپ»-دەپ ءوز ويىن ءبىلدىردى.
قازاقستاننىڭ مادەنيەت قايراتكەرى، جۋرناليست گۇلميرا ءنالىباي دا «ارنانىڭ OTAU TV-عا قوسىلۋى شارت. سەبەبى، ارنا-ۇلتتىق ارنا، ۇلتقا قىزمەت ەتەتىن ارنا» دەپ ءوز پىكىرىن ءبىلدىردى.
«دومبىراشىلار وداعىن قۇرۋ – وڭاي شارۋا بولعان جوق. بۇگىندە جاس ۇرپاق بىراز قوردالانىپ قالعان. ويتكەنى ءبىزدىڭ ۇلتتىق ونەرىمىزدىڭ قامىتىن كيىپ، ونەردىڭ كوكپارىندا جۇرگەن، تالاي ەڭبەك ءسىڭىرىپ جۇرگەن، الدىڭعى، ورتاڭعى جانە كەيىنگى بۋىنداعى قانشاما ءبىزدىڭ ونەرپازدارىمىزدىڭ ايتاتىن، كورسەتەتىن، جەتكىزەتىن دۇنيەسى قاراپايىم حالىققا جەتپەي جاتىر. كوپتەگەن تۇستا ءۇنسىز قالىپ، كورىنبەي دە قالىپ جاتتىق. سوندىقتان قازاقستانداعى بارلىق دومبىراشىلار بولسىن، دومبىراشى-انشىلەر بولسىن، جىرشىلار، تەرمەشىلەردىڭ بارلىعى ۇلتتىق ونەردى ناسيحاتتاۋى مىندەت. ەندى بۇگىندە «دومبىراشىلار وداعى» قۇرىلدى. رەسپۋبليكانىڭ دومبىرا ۇستاعان جاندارىنىڭ ءبارى وداققا مۇشەلىكككە وتسە، الدىعا قويعان ۇلكەن بەلەستەردى باعىندىراتىنىمىزعا سەنەمىز!» دەپ قوستى رامازان ستامعازيەۆ.
«ادىرنا» ۇلتتىق پورتالى
