پارلامەنتتەگىلەردىڭ مەملەكەتتىك ءتىلدى مەڭگەرۋى ءۇشىن ميلليونداعان قارجى ءبولىنىپ جاتىر، دەپ حابارلايدى "ادىرنا" پورتالى Ulysmedia.kz سايتىنا سىلتەمە جاساپ.
«ماتەريالدىق-تەحنيكالىق قامتاماسىز ەتۋ باسقارماسى» دەگەن مەكەمە مەملەكەتتىك ءتىل بويىنشا ترەنينگتەر وتكىزۋ ءۇشىن 27 ملن تەڭگە جۇمساماق.
مەملەكەتتىك ساتىپ الۋ پورتالىنىنىڭ دەرەگىنشە، مەكەمە 11 اقپان كۇنى «پاراسات» جەكە كاسىپكەرلىگىمەن كەلىسىمشارت جاساعان. تەندەر «تىكەلەي ءبىر كوزدەن ساتىپ الۋ» ءتاسىلى ارقىلى وتكەن. كەلىسىمشارتقا سايكەس، «پاراسات» جك بيىلعى 25 جەلتوقسانعا دەيىن «تاپسىرىس بەرۋشىنىڭ 50 تىڭداۋشىسىنا» مەملەكەتتىك تىلدەن ترەنينگتەر وتكىزۋگە ءتيىس. قۇجاتتا «تىڭداۋشىلاردىڭ» ناقتى كىم ەكەنى ايتىلماعان.
- «ماتەريالدىق-تەحنيكالىق قامتاماسىز ەتۋ باسقارماسى» نەگىزىنەن پارلامەنتتىڭ شارۋاشىلىق جۇمىستارىنا جاۋاپتى. سوندىقتان 50 «تىڭداۋشىنىڭ» دەپۋتاتتار ەكەنىن بولجاۋعا بولادى. ونىڭ ۇستىنە، تەندەر تەحسيپاتتاماسىندا ترەنينگ وتكىزىلەتىن ورىن رەتىندە پارلامەنت عيماراتى مەن ءماجىلىس عيماراتىنىڭ مەكەنجايى كورسەتىلگەن.
تەحسيپاتتامادا «قىزمەتتىڭ نەگىزگى ماقساتى – تاپسىرىس بەرۋشىنىڭ تىڭداۋشىلارىنىڭ مەملەكەتتىك ءتىلدى مەڭگەرۋىنە جاعداي جاساۋ» دەپ جازىلعان. سوعان قاراعاندا، دەپۋتاتتارعا مەملەكەتتىك ءتىلدى ۇيرەتۋدى دە مەملەكەت ءوز موينىنا العان سياقتى»، – دەپ بولجايدى تەلەگرام-ارنا يەسى، جۋرناليست ميات كاشىباي.
«ماتەريالدىق-تەحنيكالىق قامتاماسىز ەتۋ باسقارماسى» ءوز «تىڭداۋشىلارىنا» ءتىل ۇيرەتۋ ءۇشىن بيىل عانا قىرۋار قارجى بولمەگەن. مەمساتىپ الۋ پورتالىنداعى اقپاراتقا قاراعاندا، مەكەمە 2016 جىلدان بەرى «تىڭداۋشىلارىنا» ءتىل ۇيرەتۋ ماقساتىندا 14 كەلىسىمشارتتىڭ بارلىعىن «پاراسات» جەكە كاسىپكەرلىگىمەن جاساسقان. ونىڭ ۇستىنە، بارلىق تەندەر «تىكەلەي ءبىر كوزدەن ساتىپ الۋ» ءتاسىلى ارقىلى وتكەن. ياعني، مەكەمە اشىق كونكۋرس وتكىزبەگەن، تەك ءبىر كومپانيامەن كەلىسىمشارت جاساسا بەرگەن. ناتيجەسىندە، «پاراسات» جك 2016 جىلدان بەرى اتالعان مەكەمەدەن 285 ملن تەڭگە جۋىق قارجى العان.
- «پاراسات» جك يەسى – ماقپال مۇرتازاەۆا دەگەن ادام. اشىق دەرەككوزدەردە ول جايلى اقپارات جوق. بىزگە بەلگىلىسى – مۇرتازاەۆا وسى ۋاقىتقا دەيىن تەك «ماتەريالدىق-تەحنيكالىق قامتاماسىز ەتۋ باسقارماسىنا» عانا قىزمەت كورسەتىپ كەلگەن. ويتكەنى پورتالدا باسقا مەكەمەدەن تەندەر العانىن كەزى جوق»، – دەپ تۇيگەن تەلەگرام-ارناداعىلار دەپۋتاتتاردىڭ، جالپى قازاقستان ازاماتتارىنىڭ مەملەكەتتىك ءتىلدى ۇيرەنۋى ءۇشىن بيۋدجەتتەن اقشا بولگەن دۇرىس پا دەگەن سىڭايدا ساۋال قويادى.
"ادىرنا" ۇلتتىق پورتالى
