اۋعانستاننىڭ «تاليبان» ۇكىمەتى پاكىستان ارمياسىنا قارسى شەكارا ماڭىنداعى بىرنەشە تاۋ ايماعىندا سوققى بەرگەنىن راستادى. بۇل تۋرالى BBC جازدى، دەپ حابارلايدى “ادىرنا”.
اقپاراتقا سايكەس، پاكىستاننىڭ ىشكى ىستەر ءمينيسترى موحسين ناكۆي بۇل شابۋىلداردى «ەشقانداي ارانداتۋسىز جاسالعان اگرەسسيا» دەپ اتاپ، اۋعانستاندى بەيبىت تۇرعىندارعا وق اتتى دەپ ايىپتادى. ول سونداي-اق پاكىستان ءوز ازاماتتارىن قورعاۋ ءۇشىن قاجەتتى شارالار قابىلدايتىنىن مالىمدەدى.
پاكىستان تاراپى «تاليباندى» ءوز ەلىندە لاڭكەستەردى پانالاتىپ وتىر دەپ ايىپتايدى، ال اۋعانستان بۇل ايىپتاۋلاردى ءۇزىلدى-كەسىلدى جوققا شىعارادى.
BBC دەرەگىنشە، ەكى تاراپ وق اتقىش قارۋ مەن ارتيللەريانى قولدانعان. قاقتىعىستار كۋررام اۋدانى مەن ونىڭ اينالاسىنداعى انگۋر-ادا، بادجاۋر، دير، چيترال جانە باحرامچا ايماقتارىندا بولعان. جەرگىلىكتى پوليتسيا قىزمەتكەرلەرىنىڭ ايتۋىنشا، اۋعانستان جاعىنان اۋىر قارۋدان اتقىلاۋ ساعات 22:00 شاماسىندا باستالعان جانە بىرنەشە نۇكتەدە قاتتى اتىس ەستىلگەن.
بۇعان دەيىن «تاليبان» ۇكىمەتى پاكىستاندى اۋعانستاننىڭ ەگەمەندىگىن بۇزدى دەپ ايىپتاعان ەدى. كابۋلدا ەكى جارىلىس ورىن العاننان كەيىن، اۋعان قورعانىس مينيسترلىگى پاكىستان اۆياتسياسى بەيبىت بازاردى بومبالادى دەپ حابارلاعان.
پاكىستان گەنەرالى ءوز كەزەگىندە اۋعانستاننىڭ اۋماعىن تەرروريستەردىڭ شابۋىل جاساۋ بازاسى رەتىندە پايدالانىپ وتىرعانىن ايتقان.
قاقتىعىس اۋعانستان سىرتقى ىستەر ءمينيسترى امير حان مۋتتاكيدىڭ ۇندىستانعا ساپارى كەزىندە ۋشىعىپ وتىر. دەليدە ءۇندى بيلىگى كابۋلداعى ەلشىلىكتى قايتا اشۋ جوسپارىن جاريالاعان بولاتىن.
پاكىستاننىڭ ىشكى ىستەر ءمينيسترى ناكۆي الەۋمەتتىك جەلىدە:
«اۋعانستان وت پەن قان ويىنىن باستاپ وتىر. ول لايىقتى جاۋاپ الادى»، — دەپ جازدى.
ايماقتاعى شيەلەنىسكە ساۋد ارابياسى مەن كاتار الاڭداۋشىلىق ءبىلدىرىپ، ەكى ەلدى سابىر ساقتاۋعا جانە ديالوگ ورناتۋعا شاقىردى.
