تالىپتەردىڭ ايەلدەردىڭ مەدبيكە جانە اكۋشەر ماماندىعى بويىنشا ءبىلىم الۋىنا تىيىم سالۋى سىنعا ۇشىرادى، دەپ حابارلايدى "ادىرنا" ۇلتتىق پورتالى The Guardian-عا سىلتەپ.
اۋعانستانداعى ايەلدەردىڭ مەدبيكە جانە اكۋشەر ماماندىقتارى بويىنشا ءبىلىم الۋىنا تىيىم سالۋ حالىقارالىق قۇقىق قورعاۋ ۇيىمدارى تاراپىنان «ناداندىق ارەكەتى» رەتىندە سىنعا الىندى.
رەسمي تۇردە جاريالانعان جارلىق بولماسا دا، جەرگىلىكتى باق مالىمەتىنشە، بۇل شەشىم «تاليبان» دەنساۋلىق ساقتاۋ مينيسترلىگىنىڭ وتىرىسىندا قابىلدانىپ، ءبىلىم بەرۋ مەكەمەلەرىنە تاراتىلعان. كابۋل مەن باسقا دا ايماقتارداعى ستۋدەنتتەر مەن وقىتۋشىلار ساباقتاردىڭ توقتاتىلعانىن راستادى.
22 جاستاعى مەدبيكە ستۋدەنتى ساحار (ەسىمى وزگەرتىلگەن) بۇل جاڭالىقتى ەستىگەندە جىلاپ جىبەرگەنىن ايتتى.
«بۇل مەنىڭ سوڭعى ءۇمىتىم ەدى»، – دەدى ول.
گەرات پروۆينتسياسىنداعى بىرنەشە ستۋدەنت ايەلدەر وقۋ ورىندارىنىڭ جابىلۋىنا قارسىلىق ءبىلدىرىپ، گۋبەرناتور اكىمشىلىگىنىڭ الدىندا جينالىپ، «ءبىلىم الۋ – ءبىزدىڭ قۇقىمىز!» دەپ ۇرانداتتى.
قۇقىق قورعاۋشىلار مەن حالىقارالىق ۇيىمدار بۇل تىيىمدى سىناپ، ايەلدەردىڭ ءبىلىم الۋ قۇقىعىن بۇزۋدىڭ اۋىر سالدارى بولاتىنىن ەسكەرتۋدە. Amnesty International ۇيىمىنىڭ بەلسەندىسى ساميرا حاميدي بۇل تىيىمدى «اۋعانستان ايەلدەرى مەن قىزدارىنا جاسالعان سوعىس» دەپ اتادى.
«بۇل شەشىم كوپتەگەن اۋعان ايەلدەرىنىڭ ومىرىنە قاۋىپ توندىرەدى. ەلدەگى مادەني داستۇرلەرگە سايكەس، ايەلدەر دارىگەر ەر ادامعا قارالۋعا بارمايدى. ال ايەلدەرگە مەديتسينالىق ءبىلىم الۋعا تىيىم سالۋ – ايەلدەردىڭ دەنساۋلىق ساقتاۋ قىزمەتىنە قول جەتكىزۋىن مۇلدەم شەكتەيدى»، – دەدى حاميدي.
Human Rights Watch ۇيىمىنىڭ وكىلى حيزەر بارر بۇل تىيىمنىڭ اۋىر سالدارى تۋرالى ايتتى.
«ەگەر ايەلدەرگە ەر دارىگەرلەرگە قارالۋعا جانە مەديتسينالىق ءبىلىم الۋعا تىيىم سالىنسا، وندا ايەلدەر دەنساۋلىق ساقتاۋ قىزمەتىنەن ايىرىلىپ، سالدارىنان ءولىم-ءجىتىم كوبەيەدى»، – دەدى ول.
