اقتوبە وبلىسى شالقار اۋدانىنىڭ تۇرعىنى بولعان ەشماعانبەتوۆا تۇرعىندارعا ماسساج، حيدجاما، سۇلىك سالۋ سياقتى ەمدىك قىزمەتتەر كورسەتەدى. العاش رەت «Zhas Project» جوباسى اياسىندا 1 ملن تەڭگە قايتارىمسىز گرانت ۇتىپ الىپ، ماسساجشى ماماندىعىن مەڭگەرگەن ول بۇگىندە ءوز ءىسىن اشىپ، ەڭبەك ەتۋدە.
بولعان قازىر شالقار قالاسىندا جەرگىلىكتى كاسىپكەر ايبانۋ قوجاباەۆانىڭ «Tuz-em» تۇزدى ەم ورتالىعىنان كابينەت جالعا الىپ، تۇرعىندارعا ەمدىك قىزمەتتەر كورسەتۋدە.
كۇنىنە كەم دەگەندە 5-6 ادامدى قابىلدايدى. ولاردىڭ اراسىندا ەرەسەكتەر دە، بالالار دا بار. ءبىر كۇندىك ماسساجدىڭ (حيدجاما، سۇلىك سالۋ) قۇنى — 4 مىڭ تەڭگە.
— مەنىڭ ماسساجشى ماماندىعىن مەڭگەرۋگە دەگەن قىزىعۋشىلىعىم «Zhas Project» جوباسىنان باستالدى. وسى جوباعا قاتىسۋشى جاستاردىڭ قولداۋىمەن، اۋداندىق جاستار رەسۋرستىق ورتالىعى ماماندارىنىڭ اقىل-كەڭەسىمەن وسى باعىت بويىنشا ءوز كاسىبىمدى اشۋعا بەل بايلادىم. سودان جوباعا قاتىسىپ، گرانت ۇتىپ، اقتوبە قالاسىنداعى «بالا-ماسساج» ورتالىعىندا ەكى اي بويى وقۋ كۋرسىنان ءوتتىم. سودان سەرتيفيكات الىپ، اۋدان ورتالىعىنا كەلىپ، كابينەت اشتىم. بىلتىر جەلتوقسان ايىندا «اتامەكەن» كاسىپكەرلەر پالاتاسى اۋداندىق فيليالىنىڭ ارنايى گرانتىن جەڭىپ الدىم. وعان كابينەتىمە قاجەتتى جابدىقتار ساتىپ الدىم. قازىر اۋدان تۇرعىندارىنا ماسساج، حيدجاما جاساپ، سۇلىك سالامىن. بيىلعى جىلى كەلۋشىلەردىڭ سانى ارتۋدا. ەرەسەكتەر دە، بالالار دا ريزا. شاعىم ايتىپ كەلگەندەر بولعان جوق. ءوز ءىسىمدى ەرەكشە جاقسى كورەمىن، — دەيدى بولعان.
ونىڭ ايتۋىنشا، كارانتين كەزىندە تۇرعىندار اراسىندا ماسساج، حيدجاما جاساتۋعا كەلۋشىلەردىڭ قاتارى كوبەيگەن. سەبەبى ماسساج وستەوحاندروز، سكاليوز، پروترۋزيا، ومىرتقاارالىق جارىق، قان قىسىمىنىڭ كوتەرىلۋى نە تومەندەۋى، باس اۋرۋى سياقتى اۋرۋلاردىڭ الدىن الادى. بۇل دەرتتىڭ بارلىعى دا يممۋنيتەتتىڭ تومەندەۋىنەن بولادى. سوندىقتان مەديتسينادا ەرەسەك ادامدار ءۇش ايدا ءبىر كۋرس (10 كۇن) ماسساج الىپ، دەنساۋلىعىنا قاراۋى كەرەك. سونداي-اق ماسساجدىڭ بالالار دەنساۋلىعىنا پايداسى مول.
— قازىرگى تاڭدا ادام اعزاسى ءدارى-دارمەكتەردەگى حيميالىق زاتتارعا تاۋەلدى. اعزانى تازارتۋ ءۇشىن ارتىق قاندى الدىرۋ كەرەك. حيدجاما پروتسەدۋراسى قان اينالىمىن جاقسارتىپ، ارتىق قاننان ارىلتادى. حيدجاما – ەجەلگى ءداستۇرلى مەديتسينانىڭ ءبىر ءتۇرى. بۇل ەمنىڭ ماقساتى – ادام اعزاسىنداعى ەت پەن تەرىنىڭ اراسىنداعى ارام قاندى شىعارۋ. اتالعان پروتسەدۋرا اۋرۋدىڭ ءتۇرى مەن دياگنوزىنا بايلانىستى جاسالادى. ونى جاساعاندا ادام دەنەسىندەگى ارنايى نۇكتەلەردى ءدال تاۋىپ، جاساۋ كەرەك. سوندا عانا دۇرىس ەم بولادى. سوڭعى جىلدارى حيدجاما ءادىسى جوعارى سۇرانىسقا يە. وعان ادامنىڭ اۋرۋشاڭ، يممۋنيتەتىنىڭ تومەن بولۋى، تاماقتانۋى مەن ەكولوگيانىڭ دا اسەرى بار. قازىر الەمدە جۇرەك-قان تامىرلارى اۋرۋلارىنان كوز جۇماتىندار كوبەيگەن. عالىمدار قان الىپ ەمدەۋدىڭ ينفاركت بولۋ قاۋپىن تومەندەتەتىنىن دالەلدەپ وتىر. ال سۇلىكتىڭ پايداسىنا كەلسەك، ول قان ۇيۋدىڭ الدىن الادى، ىسىكتەردى قايتارادى، ليمفالىق جانە كۇرەتامىرلىق اعىمدى جاقسارتادى. ءاربىر ادام 2-3 جىل سايىن سۇلىك سالدىرىپ تۇرۋى كەرەك. مۇنىڭ دا ادام اعزاسىنا پايداسى بار، — دەيدى ول.
بولعان الداعى ۋاقىتتا ماسساجشى ماماندىعى بويىنشا جوعارى ءبىلىم الىپ، قازىر ۇلكەن سۇرانىسقا يە تاي ماسساجىن ۇيرەنگىسى كەلەدى. سونداي-اق ەمدەۋ ورتالىعىن اشۋدى ارماندايدى.
— قازىر ءبىزدىڭ اۋدانداعى «Tuz-em» ورتالىعىن جۇرتتىڭ كوبى بىلەدى. بۇل جەرگە كەلىپ، ەم الۋشىلار كوپ. وسى تۇرعىدا ماعان كومەك كورسەتىپ، قولداۋ بىلدىرگەن ايبانۋ قوجاباەۆاعا، شالقار اۋداندىق جاستار رەسۋرستىق ورتالىعىنىڭ باسشىسى جاننا ابدەنوۆاعا العىسىم شەكسىز. سونداي-اق ماعان ۇنەمى قولداۋ كورسەتىپ وتىراتىن وتباسىما، جولداسىمنىڭ اتا-اناسىنا ەرەكشە ريزاشىلىعىمدى ايتامىن.
مەن اتا-انامنان ەرتە ايىرىلدىم. وتباسىمىزدا التى قىزبىز. كەنجەسى — مەن. قازىر بارلىعىنىڭ ءوز وتباسىلارى بار. ءومىردىڭ كوپ قيىندىعىن كورسەك تە، بۇگىندە ءار سالادا ابىرويلى ەڭبەك ەتىپ ءجۇرمىز. قازىرگى قول جەتكىزگەن جەتىستىگىم ءۇشىن ماعان جاناشىرلىق تانىتقان بارلىق جاندارعا ريزامىن، — دەيدى ول.
اۋىلداستارىنىڭ العىسىنا بولەنىپ جۇرگەن بولعان ەشماعانبەتوۆانىڭ العا قويعان ماقساتى ايقىن، جوسپارى كوپ. جاس تا بولسا ءوز ەڭبەگىمەن زور جەتىستىككە جەتىپ جۇرگەن ماسساجشى قىزعا ءبىز دە تولاعاي تابىستار تىلەيمىز.
داناگۇل بايمۇقاش،
«ادىرنا» ۇلتتىق پورتالى.
