بيىل ەلىمىزدە باسپانا باعاسىمەن قاتار، ونى جالداۋ اقىسى دا كۇرت شارىقتاپ كەتتى. سوڭعى ءبىر اي ىشىندە ستۋدەنتتەر جاپپاي اعىلاتىن الماتىدا جالعا بەرىلەتىن پاتەر قۇنى 2-3 ەسەگە دەيىن وسكەن. جاستار مەن ولاردىڭ اتا-انالارى مۇنداي سومانى قالتالارى كوتەرمەيتىنىن جەتكىزىپ، ءوز نارازىلىقتارىن الەۋمەتتىك جەلىلەر ارقىلى ءبىلدىرىپ جاتىر.
4-كۋرس ستۋدەنتى قىرمىزى سكەنديروۆانىڭ ايتۋىنشا، باعا مەن ساپا ءبىر-بىرىنە پروپورتسيونال ەمەس.
«جالدامالى پاتەر باعاسى ەكى ەسە قىمباتتادى. بۇرىن 80,90 مىڭ تەڭگەگە پاتەر تابۋ قيىن ەمەس-ءتى. قازىر قۇرىعاندا باعا 150 مىڭنان باستالىپ، 200,300 مىڭعا دەيىن كەتە بەرەدى. 20-30 مىڭ شاكىرتاقىعا قارايتىن ستۋدەنتتەر ءۇشىن بۇل اۋىر.
پاتەر يەلەرى وزگە بيزنەس وكىلدەرى سياقتى سالىق تولەمەيتىنى بەلگىلى، الايدا نەگە سونشا باعا شارىقتاپ جاتقانى تۇسىنىكسىز ەكەن. باعا مەن ساپا ءبىر-بىرىنە پروپورتسيونال ەمەس. كوپ پاتەر يەلەرى ونىمەن قوسا، ستۋدەنت دەسە، ات تونىن الا قاشادى. وقۋ جىلى باستالعالى جاتىر، ال ستۋدەنتتەر وقۋ جايىن ەمەس، باسپاناسىز قالامىن با دەپ ۋايىمداۋدا»،— دەيدى ارۋ.
بۇل پىكىردى ءال-فارابي اتىنداعى قازۇۋ-دىڭ ستۋدەنتى ەليزا نۇراحىمان دا قولدادى.
«جالدامالى پاتەر باعاسى ءۇي جاعدايىمەن مۇلدەم سايكەس كەلمەيدى. ونىڭ ورنالاسۋى، اۋدانى دەگەن كريتەريلەرگە باعاسى ساي بولسا عوي، شىركىن! قازىر كوبى جەردىڭ ءبىر جەرىندەگى ۇيلەرىنە اكەسىنىڭ قۇنىن سۇرايدى. بوستاندىق، مەدەۋ جانە المالى اۋداندارىنداعى باعالاردى ايتپاي-اق قويايىن. شىنى كەرەك، ەلدەگى پاندەميا ەشكىمگە وڭاي ءتيىپ جاتقان جوق. ارمان قۋىپ، ۇلكەن قالاعا ەندى كەلگەن جاستارعا ءتىپتى قيىن. حالىقتا اۋىزبىرشىلىك پەن مەيىرىمدىلىك بولۋى كەرەك سياقتى. ءبىر-ءبىرىمىزدى قولداۋدىڭ ورنىنا اشىندىرىپ جاتىرمىز»،– دەپ ءوز ويىن ءبىلدىردى ول.
ال ءۇي يەلەرى باعانىڭ قىمباتتاۋى سۇرانىستىڭ كوپتىگىنەن ەكەنىن العا تارتۋدا.
«پاندەميا ءبىز ءۇشىن اۋىر سوققى بولدى. وتكەن جىلى تابىسسىز قالىپ، يپوتەكامىزدى تولەي المادىق. بيىل ستۋدەنتتەر ءداستۇرلى وقۋعا كوشىپ، پاتەرگە دەگەن سۇرانىس ارتىپ وتىر. سايكەسىنشە، باعا دا جوعارى. قازىر بارلىعى قىمباتتاپ كەتتى عوي. سول سەبەپتى تاڭعالۋدىڭ اسا قاجەتى جوق. ستۋدەنتتەرگە پاتەر بەرىلگەننەن سوڭ ونىڭ جاعدايى ناشارلايدى. ارتىنشا جوندەۋ جۇمىستارىن جاساۋ كەرەك. ءبىزدى دە تۇسىنىڭىزدەر»،— دەدى سامات حايروللاۇلى.
قازىرگى تاڭدا ستۋدەنتتەردىڭ بۇل جاعدايعا كوندىگىپ، بىرىگىپ پاتەر جالداۋدان باسقا امالى جوق. شارىقتاعان باعا الداعى ءبىر-ەكى ايدا تۇسە قويمايتىنى انىق.
ايتا كەتەيىك، جالدامالى پاتەر ەڭ قىمبات قالالار تىزىمىندە الماتى، نۇر-سۇلتان، اقتاۋ شاھارلارى كوش باستاپ تۇر.
«ادىرنا» ۇلتتىق پورتالى
