Bıyl elimizde baspana baǵasymen qatar, ony jaldaý aqysy da kúrt sharyqtap ketti. Sońǵy bir aı ishinde stýdentter jappaı aǵylatyn Almatyda jalǵa beriletin páter quny 2-3 esege deıin ósken. Jastar men olardyń ata-analary mundaı somany qaltalary kótermeıtinin jetkizip, óz narazylyqtaryn áleýmettik jeliler arqyly bildirip jatyr.
4-kýrs stýdenti Qyrmyzy Skendırovanyń aıtýynsha, baǵa men sapa bir-birine proporıonal emes.
«Jaldamaly páter baǵasy eki ese qymbattady. Buryn 80,90 myń teńgege páter tabý qıyn emes-ti. Qazir quryǵanda baǵa 150 myńnan bastalyp, 200,300 myńǵa deıin kete beredi. 20-30 myń shákirtaqyǵa qaraıtyn stýdentter úshin bul aýyr.
Páter ıeleri ózge bıznes ókilderi sııaqty salyq tólemeıtini belgili, alaıda nege sonsha baǵa sharyqtap jatqany túsiniksiz eken. Baǵa men sapa bir-birine proporıonal emes. Kóp páter ıeleri onymen qosa, stýdent dese, at tonyn ala qashady. Oqý jyly bastalǵaly jatyr, al stýdentter oqý jaıyn emes, baspanasyz qalamyn ba dep ýaıymdaýda»,— deıdi arý.
Bul pikirdi ál-Farabı atyndaǵy QazUÝ-dyń stýdenti Elıza Nurahyman da qoldady.
«Jaldamaly páter baǵasy úı jaǵdaıymen múldem sáıkes kelmeıdi. Onyń ornalasýy, aýdany degen krıterıılerge baǵasy saı bolsa ǵoı, shirkin! Qazir kóbi jerdiń bir jerindegi úılerine ákesiniń qunyn suraıdy. Bostandyq, Medeý jáne Almaly aýdandaryndaǵy baǵalardy aıtpaı-aq qoıaıyn. Shyny kerek, eldegi pandemııa eshkimge ońaı tıip jatqan joq. Arman qýyp, úlken qalaǵa endi kelgen jastarǵa tipti qıyn. Halyqta aýyzbirshilik pen meıirimdilik bolýy kerek sııaqty. Bir-birimizdi qoldaýdyń ornyna ashyndyryp jatyrmyz»,– dep óz oıyn bildirdi ol.
Al úı ıeleri baǵanyń qymbattaýy suranystyń kóptiginen ekenin alǵa tartýda.
«Pandemııa biz úshin aýyr soqqy boldy. Ótken jyly tabyssyz qalyp, ıpotekamyzdy tóleı almadyq. Bıyl stýdentter dástúrli oqýǵa kóship, páterge degen suranys artyp otyr. Sáıkesinshe, baǵa da joǵary. Qazir barlyǵy qymbattap ketti ǵoı. Sol sebepti tańǵalýdyń asa qajeti joq. Stýdentterge páter berilgennen soń onyń jaǵdaıy nasharlaıdy. Artynsha jóndeý jumystaryn jasaý kerek. Bizdi de túsinińizder»,— dedi Samat Haırollauly.
Qazirgi tańda stýdentterdiń bul jaǵdaıǵa kóndigip, birigip páter jaldaýdan basqa amaly joq. Sharyqtaǵan baǵa aldaǵy bir-eki aıda túse qoımaıtyny anyq.
Aıta keteıik, jaldamaly páter eń qymbat qalalar tiziminde Almaty, Nur-Sultan, Aqtaý shaharlary kósh bastap tur.
«Adyrna» ulttyq portaly
