قاراعاندى وبلىسىندا ءبىلىم بەرۋ مەكەمەلەرىن كەزەڭ-كەزەڭىمەن جاڭارتۋ جۇمىستارى جالعاسۋدا. بيىل وڭىردە 265 ءبىلىم نىسانىندا اعىمداعى جانە كۇردەلى جوندەۋ جۇرگىزىلدى. ونىڭ ىشىندە 180 مەكتەپ، 64 بالاباقشا، 14 قوسىمشا ءبىلىم بەرۋ مەكەمەسى، 6 كوللەدج جانە ەرەكشە ءبىلىم بەرۋ قاجەتتىلىكتەرى بار بالالاردى قولداۋ ورتالىعى قامتىلدى.
كۇردەلى جوندەۋ جۇمىستارى 32 نىساندا، ونىڭ ىشىندە 29 مەكتەپتە جۇرگىزىلۋدە. تاعى 232 ءبىلىم ورداسىندا اعىمداعى جوندەۋ جاسالدى. جاڭعىرتۋ باعدارلاماسىنىڭ باستى ماقساتى – بالالار مەن ۇستازدار ءۇشىن قاۋىپسىز ءارى جايلى جاعداي جاساۋ.
جاڭارتىلعان مەكتەپتەردىڭ قاتارىندا قاراعاندىداعى ساكەن سەيفۋللين اتىنداعى گيمنازيا بار. ول 1962 جىلى №92 ورتا مەكتەپ رەتىندە اشىلعان. قازىر مۇندا شامامەن 750 وقۋشى ءبىلىم الۋدا. جاڭا وقۋ جىلىندا 75 ءبىرىنشى سىنىپ وقۋشىسى قابىلداندى.
– جازدا عيماراتتاعى باسپالداقتار، ەسىكتەر مەن لينولەۋم اۋىستىرىلدى، ەلەكتر جەلىلەرى مەن سانيتارلىق-تەحنيكالىق جابدىقتار جاڭارتىلدى. وتكەن جىلى «قازاقستان حالقىنا» قورىنىڭ باعدارلاماسى اياسىندا حيميا، بيولوگيا جانە فيزيكا كابينەتتەرى جاڭا قۇرالدارمەن جابدىقتالدى، – دەيدى مەكتەپ ديرەكتورى سالتانات ءجۇنىسوۆا. – كەلەسى جىلى فاساد پەن ەلەكتر جۇيەسىن اۋىستىرۋ جوسپارلانعان.
№50 نەگىزگى ورتا مەكتەبىندە دە اۋقىمدى رەكونسترۋكتسيا جۇرگىزىلۋدە. بۇل ءبىلىم ورداسى العاشقى وقۋشىلارىن 1962 جىلى قابىلداعان، بۇگىندە مۇندا 585 بالا وقيدى. بيىل جازدا ەكى جىلدىق جوندەۋ جوباسى باستالدى. قازىردىڭ وزىندە فاسادى، شاتىرى، تەرەزەلەرى جانە ءبىرىنشى قابات ەدەننەن توبەگە دەيىن تولىق جاڭارتىلدى.
– مەكتەبىمىز جاڭعىرتۋ باعدارلاماسىنا ەندى، ءبىرىنشى قاباتتاعى ءۇش باستاۋىش سىنىپ پەن ەڭبەك كابينەتتەرى جاڭا جيھازبەن جابدىقتالدى، – دەيدى مەكتەپ ديرەكتورى جانار بالاپانوۆا. – سونداي-اق سپورتزال مەن اسحانانىڭ رەكونسترۋكتسياسى اياقتالۋعا جاقىن. بۇل جۇمىستار ءبىزدىڭ تۇراقتى باقىلاۋىمىزدا. كەلەر جىلى ەكىنشى جانە ءۇشىنشى قاباتتار جوندەلمەك.
1200-دەن استام بالا ءبىلىم الاتىن №5 قوسىمشا ءبىلىم بەرۋ مەكتەپ-ورتالىعىندا كۇردەلى جوندەۋ كەزەڭ-كەزەڭىمەن جۇزەگە اسىرىلۋدا. 2024 جىلى جىلىتۋ جۇيەسى مەن تەرەزەلەر اۋىستىرىلدى. بيىل فاساد، سپورتزال جانە سانيتارلىق توراپتار جوندەلدى.
– بيىل ءبىز ۇيىرمەلەرگە ارنالعان جاڭا كابينەتتەر مەن ەرەكشە ءبىلىم بەرۋ قاجەتتىلىكتەرى بار بالالارعا ارنالعان سەنسورلىق كابينەت اشتىق، سونىمەن قاتار كىتاپحانانى جاڭارتتىق. كەلەر جىلى قالعان قاباتتاردى جوندەۋ جانە اۋماقتى اباتتاندىرۋ جوسپارلانعان، – دەدى مەكتەپ ديرەكتورى تورعىن نۇرماعامبەتوۆا.
جوبانى 2027 جىلعا دەيىن تولىق اياقتاۋ كوزدەلىپ وتىر.
