ەكى بالا زارداپ شەككەن ويىن الاڭىنداعى اپاتتان كەيىن ءاليحان بوكەيحان اۋدانىنىڭ اكىم ورىنباسارى قىزمەتىنەن بوساتىلادى، - دەپ حابارلايدى "ادىرنا" ءتىلشىسى.
جەدەل كەڭەستە قاراعاندى وبلىسىنىڭ اكىمى ەرماعانبەت بولەكپاەۆ ءتيىستى تاپسىرما بەردى. سونداي-اق قۇقىق قورعاۋ ورگاندارىنا دۇرىس ورناتىلماعان كوگالدى قويعان مەردىگەردىڭ ارەكەتىنە قۇقىقتىق باعا بەرۋدى تاپسىردى.
"وتكەن اپتادا بىزدە توتەنشە جاعداي بولدى. ۇلكەندەردىڭ سالعىرتتىعىنان ەكى بالا زارداپ شەكتى. قاراعاندى قالاسىنىڭ اكىمىنە وسى سالاعا جاۋاپتى ءاليحان بوكەيحان اۋدانىنىڭ اكىمىنىڭ ورىنباسارى قىزمەتىنەن بوساتۋدى تاپسىرامىن. مەن بىرنەشە رەت ەسكەرتكەنمىن. ويىن الاڭدارىن جوندەۋدە – ەڭ الدىمەن قاۋىپسىزدىك تۋرالى ويلانۋ كەرەك. ەشتەڭە قۇلاپ قالماس ءۇشىن، قاۋىپتىڭ الدىن الۋ ءۇشىن ءبارىن ءجىتى تەكسەرۋ كەرەك. مەردىگەرلەردىڭ اسىعىس ەكەنىن، اقشا تاپقىسى كەلەتىنىن كورىپ وتىرمىز، ال كەيبىرەۋلەرى ونىڭ ىشىندە ءبىزدىڭ ارىپتەستەردىڭ بۇعان كوز جۇما قاراعانىن بايقاپ وتىرمىز»، - دەدى ەرماعانبەت بولەكپاەۆ.
سونداي-اق، ەرماعانبەت بولەكپاەۆ بالالاردىڭ ويىن الاڭدارى مەن اۋلا اۋماقتارىن اباتتاندىرۋ ەرەجەلەرىن قايتا قاراۋدى ۇسىندى.
"جاساندى گازوننىڭ ورنىنا نەگە تارتاندى جامىلعىنى قولدانباسقا. وسىنىڭ بارلىعىن زەرتتەپ، وزگەرتۋ كەرەك. ءبىزدىڭ ماقساتىمىز - قاۋىپسىز بالالىق شاقتى قامتاماسىز ەتۋ. بۇل ماسەلەلەردى تەزىرەك شەشۋ كەرەك", - دەپ قوستى بولەكپاەۆ.
ەسكە سالايىق، قاراعاندىدا 19 ماۋسىمدا قاتتى جەل بالالار ويناپ جۇرگەن ويىن الاڭىن جۇلىپ كەتكەن بولاتىن. وقيعا سالدارىنان ەكى بالا اۋىر جاراقات الدى. ولاردىڭ بىرەۋى جانساقتاۋ بولىمىنە ءتۇسىپ، كەيىن حيرۋرگتەر بريگاداسى وتا جاسادى.
توتەنشە جاعدايدان كەيىن قاراعاندى قالاسىنىڭ اكىمى مەيرام قوجۋحوۆ بۇل بالالار الاڭىنىڭ ءالى ىسكە قوسىلماعانىن ايتتى. سونداي-اق قالاداعى بالالار ويىن الاڭدارىنىڭ جاعدايىن تەكسەرۋدى تاپسىردى.
"ادىرنا" ۇلتتىق پورتالى
ۇقساس جاڭالىقتار
