مەملەكەت باسشىسىنىڭ بۇقارالىق سپورتتى دامىتۋ، بالالارعا سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ تاپسىرماسىنا سايكەس شىمكەنت قالاسىندا ەكى بىردەي زاماناۋي اشىق سپورت الاڭشاسى ەل يگىلىگىنە بەرىلدى.
ونىڭ ءبىرى اباي اۋدانى، سامال 3 شاعىن اۋدانى ىزگىلىك جانە يۋسۋپوۆ كوشەسىنىڭ قيىلىسىندا ورنالاسقان بولسا، ەكىنشىسى ەڭبەكشى اۋدانى، قاراباستاۋ تۇرعىن الابىندا اشىلدى.
قوس بىردەي سپورت نىساندارىنىڭ اشىلۋ راسىمىنە شىمكەنت قالاسىنىڭ اكىمى مۇرات ايتەنوۆ قاتىستى. قالا باسشىسى بۇقارالىق سپورتتى دامىتۋدىڭ نەگىزىندە ساۋ ءارى سانالى ۇرپاقتى، مىقتى ۇلتتى قالىپتاستىراتىنىمىزدى ايتىپ ءوتتى. سونىمەن بىرگە بارشا قالا تۇرعىندارىن سالاۋاتتى ءومىر سالتىن ۇستانۋعا شاقىردى.
كوپ فۋنكتسيونالدى سپورت الاڭشالىرىنىڭ ەكەۋىدە جەكە كاسىپكەر «Eurasian Resources Group» جشس-ءنىڭ جەكە قورى ەسەبىنەن سالىندى. سپورت الاڭشالارىنىڭ قۇرىلىسىنا 13-14,5 ملن تەڭگە كولەمىندە قارجى جۇمسالعان. قۇرىلىسىن جۇرگىزگەن مەردىگەر مەكەمە «فەرروتەكس» جشس-گى. جالپى اۋدانى 324 شارشى مەتردى قۇرايتىن بۇل نىساندا سپورتتىق جابدىقتارمەن جانە دەنە شىنىقتىرۋعا ارنالعان قوندىرعىلارمەن جابدىقتالعان. مۇندا سپورتتىڭ ۆولەيبول، باسكەتبول فۋتبول تۇرىمەن جانە ستريت ۆوركاۋتپەن اينالىسۋعا بولادى.
بۇقارالىق سپورتتى دامىتۋ بويىنشا اتقارىلعان جۇمىستار جايىن ايتىپ وتكەن اباي اۋدان اكىمى ب.پارمانوۆ 2014 جىلدان بەرى اۋداندا جالپى 222 اۋلا اباتتاندىرىلىپ، 58 سپورت الاڭشاسى سالىنعانىن جەتكىزدى.
سونىمەن قاتار، اباي اۋدانىندا قالا اكىمىنىڭ تۇرعىنداردىڭ بۇقارالىق سپورتپەن اينالىسۋى مەن قولايلى ءومىر سۇرۋىنە جاعداي جاساۋ تۋرالى بەرگەن تاپسىرماسىنا سايكەس وسى جىلى بالالار جانە سپورت الاڭشالارىن ورناتۋ جۇمىستارىنا 1 ملرد 389 ملن.تەڭگە قارجى بولىنگەن. بۇل قارجىلار 21 كوپقاباتتى تۇرعىن ءۇي اۋلالارىن اباتتاندىرۋعا، 12 سپورت الاڭشالارىن اعىمداعى جوندەۋگە، 35 سپورت الاڭشالارىن ورناتۋعا جۇمسالادى. سونىمەن قاتار، اۋداندا «شىمكەنت قايىرىمدى قالا» قورى ارقىلى دەمەۋشىلىك ەسەبىنەن 4 سپورت الاڭشاسى ورناتىلعان.
سپورت الاڭشاسىن تانىستىرۋ بارىسىندا ەڭبەكشى اۋدانىنىڭ اكىمى د.ەسىلبەك 2011-2020 جىلدار ارالىعىندا اۋدان اۋماعىندا 85 الاڭشا قۇرىلعانىن جانە وسى جىلى 15 سپورت الاڭشاسىن قۇرۋ جوسپارلانىپ جاتقانىن باياندادى.
قاراباستاۋ تۇرعىن الابىندا 8932 حالىق تۇرادى. ونىڭ ىشىندە جالپى بالالار سانى 3370.
شىمكەنت قالاسىنىڭ اكىمدىگى
