اقتوبە وبلىسىندا جكو سالدارىنان ءبىر وتباسىنىڭ ءتورت ادامى قايتىس بولدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«16 تامىز كۇنى ساعات 19.15-تە ىرعىز اۋدانى قالىباي كەنتىنىڭ جانىنداعى “سامارا-شىمكەنت” اۆتوجولىندا (اۋدان ورتالىعىنان 90 شاقىرىم جەردە) جول-كولىك وقيعاسى ورىن الىپ، ادام ولىمىنە اكەپ سوقتى. پوليتسيا قىزمەتكەرلەرى شالقار اۋدانىنىڭ تۇرعىنى 39 جاستاعى Nissan X-Trail اۆتوكولىگىنىڭ جۇرگىزۋشىسى اقتوبە قالاسى جاعىنان ىرعىز كەنتى باعىتىندا 1080 شاقىرىمىندا قالىباي اۋىلىنا جاقىن جەردە “سامارا-شىمكەنت” اۆتوجولىمەن ءجۇرىپ كەلە جاتقان قىرعىزستان رەسپۋبليكاسىنىڭ ازاماتىنىڭ باسقارۋىنداعى Volvo FH460 جۇك كولىگىمەن سوقتىعىسقانىن انىقتادى»،– دەلىنگەن حابارلامادا.
جكو سالدارىنان Nissan X-Trail اۆتوكولىگىنىڭ جۇرگىزۋشىسى، 40 جاستاعى زايىبى، 11 جاسار ۇلى العان جاراقاتىنان وقيعا ورنىندا كوز جۇمدى. ال ەرلى-زايىپتىلاردىڭ 5 جاسار ۇلى مەن 10 جاسار قىزى ىرعىز اۋدانىنىڭ ورتالىق اۋرۋحاناسىنا جاتقىزىلدى. وكىنىشكە قاراي، دارىگەرلەر بەس جاستاعى بالانىڭ ءومىرىن امان ساقتاپ قالا المادى.
قر قك 345-بابى 4-بولىگى (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جقە بۇزۋ) بويىنشا سوتقا دەيىنگى تەرگەۋ باستالدى.
«ادىرنا» ۇلتتىق پورتالى
