بۇگىن، 9 قاڭتار كۇنى ماڭعىستاۋ وبلىسىنىڭ اكىمى نۇرداۋلەت قيلىباي North Caspian Operating Company (NCOC) كومپانياسىنىڭ باسقارۋشى ديرەكتورى دجانكارلو رۋيۋمەن كەزدەسۋ وتكىزدى.
كەزدەسۋ بارىسىندا ماڭعىستاۋ وبلىسىنىڭ الەۋمەتتىك-ەكونوميكالىق دامۋى جانە وڭىردە الەۋمەتتىك ءارى ينفراقۇرىلىمدىق جوبالاردى ىسكە اسىرۋ ماسەلەلەرى قارالدى. اتاپ ايتقاندا، NCOC كومپانياسىنىڭ قولداۋىمەن بيىل بىرقاتار ماڭىزدى باستامالاردى جۇزەگە اسىرۋ جوسپارلانعان. ولاردىڭ قاتارىندا كورنەكتى جازۋشى ءابىش كەكىلباەۆتىڭ تۋعان جەرى – وڭدى اۋىلىن اباتتاندىرۋ، تەڭىز جاعالاۋىن قايتا جاڭعىرتۋ جانە «اقبوتا» ساياباعىن جاڭارتۋ جۇمىستارى بار. سونىمەن قاتار جەدەل مەديتسينالىق كومەك قىزمەتىنىڭ ماتەريالدىق-تەحنيكالىق بازاسىن نىعايتۋ ماقساتىندا سالاعا تولىق جابدىقتالعان 20 جاڭا جەدەل جاردەم كولىگى تاپسىرىلدى.
NCOC كومپانياسىنىڭ باسقارۋشى ديرەكتورى دجانكارلو رۋيۋ كومپانيانىڭ ماڭعىستاۋ وبلىسىنداعى الەۋمەتتىك، ينفراقۇرىلىمدىق جانە ەكولوگيالىق باستامالارعا الداعى ۋاقىتتا دا جان-جاقتى قولداۋ كورسەتۋگە دايىن ەكەنىن ايتتى.
ءوز كەزەگىندە وبلىس اكىمى NCOC كومپانياسىنىڭ ماڭعىستاۋ وڭىرىمەن 25 جىلدان استام ۋاقىت بويى تۇراقتى ىسكەرلىك ارىپتەستىك ورناتىپ، ونىڭ الەۋمەتتىك-ەكونوميكالىق دامۋىنا ەلەۋلى ۇلەس قوسىپ كەلە جاتقانىن اتاپ ءوتتى.
– NCOC – ماڭعىستاۋ وبلىسىنىڭ الەۋمەتتىك-ەكونوميكالىق دامۋىنا سەرپىن بەرگەن جەتەكشى كومپانيالاردىڭ ءبىرى. سوڭعى جىلدارى وڭىردە ماڭىزدى الەۋمەتتىك نىساندار جۇزەگە اسىرىلىپ، پايدالانۋعا بەرىلدى، بۇل اۋماقتىڭ دامۋىنا ايتارلىقتاي اسەر ەتتى. ءبىزدىڭ ورتاق مىندەتىمىز – جەرگىلىكتى تۇرعىنداردىڭ ءومىر ءسۇرۋ ساپاسىن ودان ءارى ارتتىرۋ، – دەپ اتاپ ءوتتى نۇرداۋلەت قيلىباي.
ايتا كەتەيىك، كومپانيا وسى ۋاقىت ىشىندە 100-دەن استام الەۋمەتتىك-ينفراقۇرىلىمدىق جوبانى جۇزەگە اسىرعان. اتاپ ايتقاندا، 2020-2025 جىلدارى اقتاۋ قالاسىندا مودۋلدىك ينفەكتسيالىق اۋرۋحانا، ونكولوگيالىق ديسپانسەر، ستۋدەنتتەرگە ارنالعان جاتاقحانا، سونداي-اق سپورتتىق جانە مادەني نىساندار سالىندى. سونىمەن قاتار كومپانيانىڭ قولداۋىمەن فورت-شەۆچەنكو قالاسىندا جانە وبلىستىڭ اۋىلدىق ەلدى مەكەندەرىندە ءبىلىم بەرۋ نىساندارى بوي كوتەردى.
كەزدەسۋ سوڭىندا تاراپتار ءوزارا ءتيىمدى سەرىكتەستىكتى جالعاستىرۋعا جانە ءوڭىردىڭ تۇراقتى دامۋىنا باعىتتالعان بىرلەسكەن باستامالاردى ىسكە اسىرۋعا نيەتتى ەكەنىن ءبىلدىردى.
