وتكەن جىلدىڭ سوڭىندا پەتروپاۆلدا ءىرى اگروونەركاسىپتىك ينۆەستيتسيالىق جوبا – تولىق تسيكلدى ساڭىراۋقۇلاق فەرماسى اشىلعان بولاتىن. ءماجىلىس دەپۋتاتتارى، «AMANAT» پارتياسى فراكتسياسىنىڭ مۇشەلەرى ەركەبۇلان مامبەتوۆ پەن دميتري كولودا جاڭا وندىرىستەگى ەڭبەك جاعدايلارىمەن جانە نىساننىڭ ونەركاسىپتىك الەۋەتىمەن تانىستى.
بىلتىر 20 جەلتوقساندا ىسكە قوسىلعان «Eco Glade» جشس كاسىپورنى جىلىنا 2 400 تونناعا دەيىن agaricus تەكتەس ساڭىراۋقۇلاق پەن 4 000 توننا كومپوست، ياعني شىمتەزەك وندىرۋگە باعدارلانعان. كاسىپورىن 65 ادامدى تۇراقتى جۇمىسپەن قامتىپ وتىر.
دەپۋتاتتار بۇل كاسىپورىن ءوڭىردىڭ قايتا وڭدەۋ سەكتورىن دامىتۋعا جانە ازىق-تۇلىك قاۋىپسىزدىگىن ارتتىرۋعا سەپتىگىن تيگىزەتىنىن اتاپ ءوتتى. جوبا ارنايى ەكونوميكالىق ايماقتىڭ جەڭىلدىكتەرىن پايدالانا وتىرىپ ىسكە اسىرىلۋدا، بۇل ءوندىرىستى جەدەلدەتىپ ىسكە قوسۋعا جانە ينۆەستيتسيالىق شىعىنداردى ازايتۋعا مۇمكىندىك بەردى.
– مۇنداي جوبالار مەملەكەتتىڭ قولداۋىمەن بيزنەستىڭ مۋلتيپليكاتيۆتى اسەر بەرە الاتىندىعىن ايقىن كورسەتىپ وتىر. بۇل جەردەگى ناقتى ناتيجە – قوماقتى ينۆەستيتسيا، زاماناۋي تەحنولوگيا، جاڭا جۇمىس ورىندارى، ءوڭىردىڭ ونەركاسىپتىك ينفراقۇرىلىمىن دامىتۋ. وتاندىق بيزنەستى قولداۋ مەن قايتا وڭدەۋگە ينۆەستيتسيا تارتۋدىڭ ارقاسىندا مەملەكەت باسشىسى ايتقان تۇراقتى ەكونوميكا قالىپتاسىپ كەلەدى، – دەدى دميتري كولودا.
دەپۋتاتتىڭ ايتۋىنشا، مۇنداي وندىرىستەردى ىسكە قوسۋ سولتۇستىك قازاقستان وبلىسىنىڭ قوسىلعان قۇنى جوعارى جوبالاردى ىسكە اسىرۋ الاڭى رەتىندەگى الەۋەتىن كورسەتەدى.
سونداي-اق، ماجىلىسمەندەر كاسىپورىن قىزمەتكەرلەرىنە وڭىرلەردىڭ دەربەستىگىن كۇشەيتۋگە باعىتتالعان جاڭا بيۋدجەت جانە سالىق كودەكستەرى شەڭبەرىندەگى زاڭنامالىق نورمالار تۋرالى ايتىپ بەردى.
ەسكە سالا كەتەيىك، 5-13 قاڭتار ارالىعىندا ماجىلىستەگى «AMANAT»، اۋىل، اق جول، جسدپ، قحپ جانە Respublica ساياسي پارتيالارىنىڭ پارلامەنتتىك فراكتسيالارىنىڭ دەپۋتاتتارى وڭىرلەردى جۇمىس ساپارىمەن ارالاپ ءجۇر. دەپۋتاتتار سايلاۋشىلاردى قابىلدانعان زاڭدار تۋرالى حاباردار ەتەدى، ولاردى جەرگىلىكتى جەرلەردە ىسكە اسىرۋ پراكتيكاسىن زەردەلەيدى جانە ازاماتتاردى تولعاندىراتىن وزەكتى ماسەلەلەر مەن پروبلەمالاردى تىڭدايدى.
