تالىبتەر اۋعانستاننىڭ استاناسىن بارلىق جاعىنان قورشاۋعا العان دەپ حابارلايدى "ادىرنا" ۇلتتىق پورتالى "حابار 24-كە" سىلتەمە جاساپ.
اقش كابۋلداعى ەلشىلىك قىزمەتكەرلەرىن تىكۇشاقپەن شۇعىل كوشىردى. وسىنىڭ الدىندا سودىرلار جالالاباد جانە مازاري-شاريف قالالارىنا باقىلاۋ ورناتقان بولاتىن. شاھارلارداعى ۇكىمەت اسكەرى سوعىسپاي بەرىلە سالعان.
– اقش پرەزيدەنتى بايدەن اسكەرىن الىپ كەتەمىن دەگەن ساتتەن باستاپ، "تاليبان" شابۋىلدى بىردەن كۇشەيتتى. اۋعانستانداعى سوعىستىڭ سەبەپ-سالدارى وتە كۇردەلى. ادامنىڭ قانى سۋشا توگىلىپ جاتىر. بۇل قىرعىن 40 جىلدان بەرى جالعاسىپ كەلەدى. سىرتقى الپاۋىت كۇشتەردىڭ اۋعان جەرىندەگى تارتىسى ازاماتتىق سوعىسقا ۇلاستى. اۋعانستاننىڭ ستراتەگيالىق مۇددەلەردىڭ تۇيىسكەن جەرىندە، ونىڭ ىشىندە ورتالىق ازيادا ورنالاسقانى وزىنە سور بولىپ تۇر. مەنىڭ ويىمشا، ەلدىڭ تاعدىرىن اۋعان حالقى جان-جاقتى كەلىسسوزدەر ارقىلى ءوز قولىنا الۋى ءتيىس. بۇل – ىشكى ماسەلە، — دەيدى اناليتيك راميش سالەمي.
"ادىرنا" ۇلتتىق پورتالى.
