قازاقستاندىق JASA TEAM كومانداسىنىڭ مۇشەلەرى ومار اسەربەكوۆ پەن گريگوري ششۋكين الپىدەگى ەڭ كۇردەلى كلاسسيكالىق باعىتتاردىڭ ءبىرىن باعىندىرعان العاشقى قازاقستاندىقتار اتاندى. ولار بەرن الپىلەرىندەگى ەيگەر شىڭىنا (3 970 م) حەكمايەردىڭ كلاسسيكالىق باعىتى ارقىلى كوتەرىلدى، دەپ حابارلايدى «ادىرنا» ءتىلشىسى الماتى قالاسىنىڭ اكىمدىگىنە سىلتەمە جاساپ.
بۇل الەمدىك الپينيزمدەگى ەڭ ايگىلى ءارى تەحنيكالىق جاعىنان كۇردەلى باعىتتاردىڭ ءبىرى. 1935 جىلدان بەرى مۇندا 60-تان استام ادام قازا تاپقان.
شىڭعا كوتەرىلۋ ەكى جارىم كۇنگە سوزىلعان. كوماندا ماۋسىمدا العاش بولىپ جولعا شىققاندىقتان، بۇرىنعى الپينيستەردىڭ ءىزى بولماعان، ولار جول سالىپ، جارتاستاردى قاردان تازارتىپ وتىرعان. ءبىرىنشى كۇنى قابىرعانىڭ ۇشتەن ەكى بولىگىن ءجۇرىپ ءوتىپ، ء«ولىم بيۆۋاگىندا» شاتىرسىز، ساقتاندىرۋ نۇكتەلەرىنە بايلانعان كۇيدە تۇنەپ شىققان. ەكىنشى كۇنى ەڭ كۇردەلى تەحنيكالىق جوعارعى بولىكتى ەڭسەرىپ، شىڭعا جەتتى بىردەن تۇسۋگە كىرىسكەن. ءۇشىنشى كۇنى امان-ەسەن تومەن تۇسكەن.
ەيگەر الپىدەگى «التى ۇلى سولتۇستىك قابىرعانىڭ» قاتارىنا كىرەدى. 2025 جىلى اسەربەكوۆ پەن ششۋكين پتي-دريۋ جانە گراند-جوراس تاۋلارىنىڭ سولتۇستىك قابىرعالارىن دا باعىندىرعان بولاتىن. وسىلايشا ولار ءبىر ماۋسىمدا باعدارلاماداعى ەڭ كۇردەلى ءۇش قابىرعانى ەڭسەرىپ، ارقايسىسىندا العاشقى قازاقستاندىقتار اتاندى.
باعىت تولىق اۆتونومدى ستيلدە، ياعني گيدسىز، شەرپاسىز جانە الدىن الا دايىندىقسىز وتكەن.
ەيگەر اتاۋى نەمىس تىلىنەن اۋدارعاندا «ادام جەگىش» دەگەن ماعىنانى بىلدىرەدى. ونىڭ سولتۇستىك قابىرعاسىندا 1935 جىلدان بەرى كەمىندە 64 الپينيست قازا تاپقان. وسى سەبەپتى ول Mordwand — «قاتەرلى قابىرعا» دەگەن اتاۋعا يە بولعان. حح عاسىرداعى باسپاسوزدە بۇل باعىت ء«ولىم قابىرعاسى» دەگەن اتپەن كەڭىنەن تانىلدى. حەكمايەر باعىتى (6ا ساناتى) جارتاستى جانە مۇزدى رەلەفتە جوعارى دەڭگەيدەگى ورمەلەۋ شەبەرلىگىن، شەكتەۋلى ساقتاندىرۋ جاعدايىندا قوزعالۋ تاجىريبەسىن جانە ۇلكەن فيزيكالىق توزىمدىلىكتى تالاپ ەتەدى. مارشرۋت بويىندا تىك جارتاستار، مۇز الاڭدارى جانە قاتقان مۇز ارالاس كۇردەلى ۋچاسكەلەر كەزەكتەسىپ كەلەدى. بيىكتىك ايىرماسى شامامەن 1800 مەتر. بۇل قابىرعا تاس قۇلاۋى، قار كوشكىنى جانە اۋا رايىنىڭ كەنەت وزگەرۋىمەن دە قاۋىپتى.
