"تاليبان" قوزعالىسى اۋعانستاننىڭ ەڭ ءىرى ەكىنشى قالاسى — قانداعاردىڭ اۋەجايىن زىمىرانمەن شابۋىلدادى دەپ حابارلايدى "ادىرنا" ۇلتتىق پورتالى.
اۋەجاي اكىمشىلىگى مالىمدەگەندەي، زىمىران شابۋىلى كەزىندە ۇشۋ جولاعى زاقىمدانعان، سول سەبەپتى رەيستەر توقتاپ قالعان. قازىر مۇندا جوندەۋ جۇمىستارى ءجۇرىپ جاتىر.
"تاليبان" مەن اۋعان ۇكىمەتىنىڭ كۇشتەرى قانداعاردان بولەك ەلدىڭ ەكى ۇلكەن قالاسى گەرات پەن لاشكار-گاح ءۇشىن دە شايقاسىپ جاتىر. بۇل ءۇش قالانىڭ كىمنىڭ جاعىندا قالاتىنى كابۋل ۇكىمەتىنىڭ تاعدىرىن ايقىنداماق.
31 شىلدە كۇنى "تاليبان" اۋعانستاننىڭ باتىسىنداعى گەراتقا شابۋىل جاسادى. ءبىر كۇننەن سوڭ اۋعان كۇشتەرى تالىبتەردىڭ بەتىن قايتارعانىن مالىمدەدى.
سونداي-اق 31 شىلدەدە لاشكار-گاح قالاسىندا دا اۋىر شايقاس بولدى. بۇدان ەكى كۇن بۇرىن قالانىڭ كەي بولىكتەرىن تالىبتەر باسىپ العان ەدى. ناتيجەسىندەە ءبىر ادام قازا تاۋىپ، ءۇش ادام جاراقاتتانعان.
گيلمەند پروۆينتسياسىنىڭ كەڭەسشىسى ابدۋل ءماجيت ابحۋنزادا "سوعىس الاڭدارىندا بەيبىت تۇرعىنداردىڭ قالىپ قويعانىن" ايتىپ، الاڭداۋشىلىق ءبىلدىردى.
بۇگىنگى كۇنى اۋعانستاندا 20 جىل بويى بولعان حالىقارالىق اسكەري كۇشتەر ەلدەن كەتىپ جاتىر. اقش اسكەرى اۋعانستاننان 11 قىركۇيەككە دەيىن تولىق شىعارىلماق. حالىقارالىق كۇشتەردىڭ قولداۋىنسىز قالعان اۋعان ۇكىمەتى "تاليبانعا" قانشالىق توتەپ بەرە الاتىنى ازىرگە بەلگىسىز.
"ادىرنا" ۇلتتىق پورتالى.
