بۇگىن ەلىمىزدە جاڭا اكىمشىلىك راسىمدىك-پروتسەستىك كودەكس كۇشىنە ەندى. وسىنىڭ نەگىزىندە شىمكەنت قالاسىندا جاڭادان قۇرىلعان مامانداندىرىلعان اۋدانارالىق اكىمشىلىك سوت جۇمىسىن باستادى. سوتتىڭ سالتاناتتى اشىلۋ راسىمىنە قالا اكىمى مۇرات ايتەنوۆ پەن قالالىق سوتتىڭ توراعاسى ەربول راحىمبەكوۆ جانە قۇقىق قورعاۋ ورگاندارىنىڭ باسشىلىعى قاتىستى.
قالالىق سوتتا وتكەن جالپى وتىرىستا توراعا ە.راحىمبەكوۆ قر پرەزيدەنتىنىڭ 2021 جىلعى 28 ماۋسىمداعى جارلىعىمەن تاعايىندالعان سوت القاسىنىڭ توراعاسىمەن جانە سۋديالارمەن تانىستىردى. توراعا سۋديالاردى تاعايىندالۋىمەن قۇتتىقتاپ، ولارعا جۇكتەلگەن مىندەتتەردى ادال ءارى جاۋاپكەرشىلىكپەن اتقارۋلارىنا تىلەكتەستىگىن ءبىلدىردى. ءوز كەزەگىندە قالا باسشىسى بۇعان دەيىن قازاقستاندا مۇنداي كودەكس بولماعانىن جانە جاڭا زاڭناما ازاماتتاردىڭ قۇقىعى مەن مۇددەلەرىن قورعاۋعا باعىتتالعانىن اتاپ ءوتتى. اكىمشىلىك راسىمدىك-پروتسەستىك كودەكستە اكىمشىلىك راسىمدەر، جەكە جانە زاڭدى تۇلعالاردىڭ وتىنىشتەرىن قاراۋ ءتارتىبىنىڭ تالاپتارى قامتىلعان. ەندى مەملەكەتتىك ورگاندار مەن ۇيىمدارعا جۇگىنگەن ءاربىر ازاماتتىڭ ءوتىنىشى كودەكس نورمالارىمەن قورعالىپ، ەلىمىزدەگى اكىمشىلىك قۇقىقتىق قاتىناستار جاڭا دەڭگەيگە كوتەرىلدى. اكىمشىلىك سوت شىمكەنت ق، تىنىباەۆ كوشەسى، 42, مەكەنجايىنداعى مامانداندىرىلعان سوتتار عيماراتىندا ورنالاسقان.
نازكەن سكاندار
