قازاقستان تۇركياعا كومەكتەسۋ ءۇشىن تىكۇشاقتار مەن قۇتقارۋشىلار جىبەردى. بۇل تۋرالى قر توتەنشە جاعدايلار مينيسترلىگىنىڭ رەسمي وكىلى تالعات ءۋالي ءمالىم ەتتى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەمە جاساپ.
قر توتەنشە جاعدايلار مينيسترلىگى مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ورمان ورتتەرىن سوندىرۋگە كومەكتەسۋ ءۇشىن تۇركيا رەسپۋبليكاسىنا "قازاۆياسپاس" اق ەكى مي-8 امت تىكۇشاعىن جانە 16 قۇتقارۋشىدان تۇراتىن جەدەل توپ جىبەردى.
"قازاقستاندىق تىكۇشاقتار بۇگىن ۇشىپ كەتتى جانە ءۇش ەلدىڭ شەكاراسى ارقىلى تۇركيانىڭ مۋگلا قالاسىنا جەتەدى. تجم ءبىرىنشى ۆيتسە-ءمينيسترى يبراگيم كۇلشىمباەۆ جەدەل توپتى نۇر-سۇلتان اۋەجايىندا شىعارىپ سالدى. ءبىزدىڭ قۇتقارۋشىلاردىڭ جەرگىلىكتى بيلىكپەن سول جەردەگى ءوزارا ارەكەتىن قازاقستان رەسپۋبليكاسىنىڭ تۇركياداعى ەلشىلىگى ۇيلەستىرەدى", - دەدى ءۋالي.
سونداي-اق، قازاقستان ورتەنگەن ايماقتارداعى ورمان جامىلعىسىن قالپىنا كەلتىرۋ ءۇشىن گۋمانيتارلىق كومەك كورسەتپەك. وتىرعىزىلعان ورمان قازاقستان مەن تۇركيا حالىقتارىنىڭ دوستىعى مەن باۋىرلاستىعىن بەينەلەيدى.
