قازاقستاننىڭ ەڭبەك سىڭىرگەن قايراتكەرى، بەلگىلى كومپوزيتور، مارقۇم ارمان دۇيسەنوۆتىڭ جۇبايى ايسۇلۋ ايدانقىزى پرەزيدەنت قاسىم-جومارت توقاەۆتىڭ اتىنا اشىق ۇندەۋ جولداپ، الماتى قالاسى سوتتارىنداعى ادىلەتسىزدىككە نازار اۋدارۋدى سۇرادى، دەپ حابارلايدى «ادىرنا».
ايسۇلۋ ايدانقىزىنىڭ ايتۋىنشا، 2024 جىلدىڭ 7 قازانىندا 21 جاستاعى ۇلى دۇيسەن ابىلاي ءوز پاتەرىندە ەكى قولى بايلاۋلى، اياعى جەردە تۇرعان كۇيدە، موينىن سۇيەپ بايلاپ كەتكەن كۇيدە تابىلعان.
وتباسىنىڭ مالىمەتىنشە، ءىستى تەرگەۋ بارىسىندا بىرقاتار ماڭىزدى دەرەكتەر انىقتالعانىمەن، تەرگەۋ ءالى اياقتالماعان.
2025 جىلدىڭ 24 قازانىندا الماتىداعى بوستاندىق اۋداندىق سوتى ايسۇلۋ ايدانقىزىن، 13 جاسار ۇلىن جانە 83 جاستاعى اكەسىن تۇرىپ جاتقان پاتەرىنەن شىعارۋ تۋرالى شەشىم قابىلداعان.
ايسۇلۋ ايدانقىزى بۇل شەشىمدى زاڭسىز دەپ ەسەپتەيدى.
«پاتەر ءۇشىن داۋلاسقان تۇلعا مۇقاش سانجار ۇلىم ابىلايدىڭ ولىمىنە بايلانىستى جۇرگىزىلىپ جاتقان تەرگەۋ بارىسىندا «مەن ابىلايعا تەك قارىز اقشا بەرگەنمىن، پاتەردى كەپىل ەتىپ الدىم» - دەپ انىق كورسەتكەن. وسى تۋرالى تەرگەۋ سوتىنىڭ 2024 جىلعى 15 قازان جانە 2025 جىلعى 30 شىلدەدەگى قاۋلىلارىندا بەكىتىلگەن. دەمەك، سوت، ساتىپ الۋ كەلىسىم شارتىن جارامسىز دەپ تانۋى ءتيىس ەدى. مارقۇم ابىلاي مەن مۇقاشتىڭ ەكەۋارا ۋاتساپتارىندا، سوڭعى تەك 65 ملن. تەڭگەنى وتە جوعارى پايىزبەن بەرگەنى راستالدى. ياعني مارقۇمدى، ونى ءوزى ءۇشىن مۇلدە ءتيىمسىز اۋىر ءمان-جايلاردىڭ سالدارىنان جاساۋعا ءماجبۇر بولعان مامىلەنى جاساعان دەۋگە جەتكىلىكتى نەگىزدەر بار. زاڭ بويىنشا - جارامسىز مامىلە.
داۋگەر مۇقاشتىڭ 65 ميلليونمەن، نارىق قۇنى 140 ملن. تەڭگە تۇراتىن پاتەردى يەمدەنۋ ايلاسى باستاپقىدان بولعانى كوزگە كورىنىپ تۇر. الايدا، سوت قىلمىستىق ءىس قۇجاتتارىن مۇلدە سۇراتپاي، ولاردى زەرتتەمەي، بىرجاقتى شەشىم شىعاردى . ودان بولەك، زاڭدى تالاپ بار – قىلمىستىق ءىس تەرگەلىپ جاتقان كەزدە، ازاماتتىق داۋ توقتاتىلۋى ءتيىس. بۇگىنگە دەيىن ۇلىم ابىلايدىڭ ولىمىنە قاتىستى تەرگەۋ اياقتالعان جوق»، دەدى ايسۇلۋ.
ايسۇلۋ ايدانقىزى قر پرەزيدەنتىنەن ۇلىنىڭ ولىمىنە قاتىستى تەرگەۋدىڭ ءادىل جۇرگىزىلۋىن، ازاماتتىق ءىستىڭ زاڭ تالاپتارىنا سايكەس قايتا قارالۋىن، سوتتارداعى بىرجاقتىلىققا جول بەرمەۋدى قامتاماسىز ەتۋدى سۇراپ وتىر.
ول بۇل جاعدايدىڭ تەك ءوزىنىڭ وتباسىنىڭ ەمەس، جالپى ازاماتتاردىڭ سوتقا دەگەن سەنىمى ءۇشىن ماڭىزدى ەكەنىن ايتادى.
