ابايدىڭ كەزىندە ىندەتپەن قالاي كۇرەسكەنىمىزدى بىلەسىزدەر مە؟
(4-ءشى تومدىعىندا)
اباي ءوزىنىڭ ۇلى مەن كەلىنىن وقۋعا شىعارىپ سالۋعا سەمەي قالاسىنا كەلگەندە، بۇل جاقتا سۇمدىق ىندەت تارالىپ حالىق قىرىلىپ جاتادى. اباي ءمان-جايعا قانىعىپ بولعانسوڭ سەمەيدىڭ ورتالىق مەشىتىنىڭ يمامى سارىموللاعا بارىپ، حالىقتىڭ شامادان تىس شوعىرلانىپ جينالماۋىن، كىسى ءولىمى بولعان جەرلەرگە جانازا مەن جەتىسى-قىرقىنا مولدا مەن بىرەر تۋىسقانىنان باسقا ادامداردىڭ قاتىسپاۋى جايلى حالىققا ۇكىم شىعارۋىن سۇرايدى. سەبەبى، مىنا ىندەتتى توقتاتۋدىڭ بىردەن-ءبىر جولى وسى ەكەندىگىن ورىس دوسىنىڭ دوعدىر ايەلىنەن سۇراپ العان ەدى.
جۇما نامازدان سوڭ مەشىت يمامدارى حالىققا "بۇل قۇدايدان كەلگەن سىناق. سوندىقتان، بۇرىنعىدان دا كوبىرەك ءمىناجات جاساپ، قايىر-ساداقالارىن كوبەيتۋدى...." ايتىپ تارقاسا باستاعاندا، سارىموللا ورنىنان تۇرىپ ابايدىڭ ايتقاندارىن حالىققا وسيەت قىلادى. ىندەت تارقاعانشا ەشقانداي ءولىم-جىتىمگە جينالماۋعا، مەشىتكە كەلۋدى دوعارا تۇرۋعا، بارىنشا وقشاۋلانۋعا.
بىراق، سارىموللاعا وزگە مولدالار قارسى كەلىپ "دىننەن، اتا-بابا جولىنان اينىعان، قۇدايدىڭ امىرىنە قارسى شىققان" عا اپارىپ، ءبىر مولداعا بەس مولدا قارسى كەلىپ ايتىسىپ تارقايدى.
بىراق، اباي مەن سارىموللانىڭ سوزدەرى باسىم ءتۇسىپ، حالىق جانازا مەن جەتىسى-قىرقىنا جينالۋدى قويىپ، ولگەن ۇيدەن اس ءىشۋدى دوعارادى.
ءسويتىپ جۇرگەندە سەمەي قالاسىنا اتى شىققان ءبىر بايدىڭ اكەسى ىندەتتەن قايتىس بولىپ، الگى باي "اباي دەگەن كىم ەدى سونشا؟! اتا-بابا جولى، ءداستۇرىم..." دەپ جانازاسىنا مال سويىپ مول داستارحان جايعىزادى. بىراق، اكەسىنىڭ جانازاسىنا وزىنە ەتەنە-جاقىن ونشاقتى باي-باعلاننان باسقا ەشكىم كەلمەي قاتتى ساستىرادى. اكەسىن جەرلەپ كەلىپ، قالعان بەس-التى بايلار وتىرىپ "اكەمىزدى وسىنشالىق ماسقارالىقپەن جەرلەيمىز دەپ كىم ويلاعان! الگى، اباي دەگەن وڭباعاننىڭ شىعارىپ جۇرگەنى... بۇل قورلىعىڭدى ۇمىتپاسپىز! سارىموللا ەكەۋىڭدى مە...!" دەسىپ كىجىنەسىپ، كەك قايتارۋ جاعىن ويلاسىپ وتىرعان جەرىنە كەلىپ توقتادىم.
وووووۋ!
اعايىندار! ءبىز ءالى كۇنگە سول قازاق ەكەنبىز!
وزگەرگەن ەشتەڭەمىز جوق!
ابايدىڭ جازىعى قازاقتى ىندەتتەن امان الىپ قالۋ ءۇشىن شىرىلداعانى ما؟!
وعان قاستىق ويلاسارداي نە جازىعى بار ەدى؟ "كاپىر ورىستىڭ" ايتقان اقىلىن ەلگە جاريالاعانى ما؟
قازىر دە ءدال سولاي جاسىرىنىپ توي جاساپ، ۇستالىپ قالىپ شتراف تولەسەڭ پوليتسيامەن ۇكىمەتتى قارعاپ وتىرعان كەيىپىمىز سول زاماننان وزگەرمەگەن ناداندىعىمىز ەمەسپە؟!
ۆاكتسينا الىپ، توي-جيىندى توقتاتىپ، ىندەتتەن ەلدى امان قالۋدى نەگە ويلانبايمىز؟ ۆاكتسيناتسيادان باسقا ەشقانداي جولى جوق قۇتىلاتىن. سپۋتنيك، باسقا دەپ تاڭدايتىن دا تۇگى جوق. بارلىعى دا ءبىر مەزەتتە دايىن بولعان ۆاكتسينالار.
اباي جولىن وقىساڭىزدار قازاقتى دا، ءوزىڭىزدىڭ بولمىسىڭىزدى دا تانيسىزدار.
رۇستەم اشەتاەۆتىڭ
فەيسبۋك پاراقشاسىنان
