اباي وبلىسىنداعى «سەمەي ورمانى» رەزەرۆاتىنداعى ءورت اۋىزدىقتالدى، دەپ حابارلايدى "ادىرنا" ءتىلشىسى.
بورودۋليحا فيليالىنا قاراستى كامىشەنكا ورمانشىلىعى اۋماعىندا شىققان ورمان ءورتى تولىق اۋىزدىقتالعانى حابارلاندى.
ەكولوگيا جانە تابيعي رەسۋرستار مينيسترلىگىنىڭ مالىمەتىنشە، 16 شىلدەدە باستالعان ءورت 18 شىلدە كۇنى ساعات 09:45-تە وقشاۋلاندى.
ءورتتى سوندىرۋگە «سەمەي ورمانى» جانە «ەرتىس ورمانى» مەملەكەتتىك ورمان تابيعي رەزەرۆاتتارىنىڭ قىزمەتكەرلەرى، «قازاۋەورمانقورعاۋ» رمقك، سونداي-اق توتەنشە جاعدايلار، ىشكى ىستەر، قورعانىس مينيسترلىكتەرى، ۇقك مەن جەرگىلىكتى اتقارۋشى ورگانداردىڭ كۇشتەرى جۇمىلدىرىلدى.
جالپى ءتىلسىز جاۋمەن كۇرەسكە 769 ادام، 191 ارنايى تەحنيكا جانە 8 تىكۇشاق تارتىلدى. اۆياتسيا ارقىلى ءورت وشاعىنا 319 رەت سۋ توگىلىپ، بارلىعى 709 توننا سۋ جەتكىزىلگەن.
ەسكە سالايىق، ورمان ءورتى 16 شىلدە كۇنى تاڭەرتەڭ بورودۋليحا فيليالىنىڭ كامىشەنكا ورمانشىلىعىنىڭ 57-كۆارتالىندا تىركەلگەن.
