بۇگىن استانانىڭ "مايسكي" دەپ اتالاتىن ساياجاي ماسسيۆىندە اپالى-ءسىڭلىلى راۋشان جانە نەسىپكۇل ۇياباەۆالار مەن ولاردىڭ باۋىرلارى تۇراتىن جەر ءۇيدى ءسۇردى. تۇرعىندار ءۇيىنىڭ سىرتىنا قازاقستان پرەزيدەنتى نۇرسۇلتان نازارباەۆتىڭ سۋرەتتەرىن جاپسىرىپ تاستاعان. بۇل تۋرالى ازاتتىق راديوسى جازدى، دەپ حابارلايدى “ادىرنا” ۇلتتىق پورتالى.
نەسىپكۇلدىڭ ازاتتىققا ايتۋىنشا، ءساۋىردىڭ ورتاسىندا قازاقستان پرەزيدەنتى نۇرسۇلتان نازارباەۆ ەكسپو-2017 كورمەسى قارساڭىندا "قالا كوركىن بۇزاتىن ەسكى ۇيلەردىڭ" ءالى دە قالعانىنا اشۋلانىپ، سىناعان سوڭ جەرگىلىكتى بيلىك وكىلدەرى ۇيلەرىن بوساتۋدى تالاپ ەتىپ ءجيى كەلە باستاعان.
«50 شارشى مەتر بولاتىن ءۇيىمىزدى 2007 جىلى سالدىق. باۋىرلارىم بار، بارلىعى جەتى ادام تۇرىپ جاتىرمىز. جەر تەلىمىمىزدى مەملەكەت مۇقتاجدىعىنا قاجەت" دەگەن سەبەپپەن الۋ ءۇشىن 2014 جىلدان باستاپ ءۇيدى بوساتۋدى تالاپ ەتە باستادى. سول جىلى وتەماقى رەتىندە 400 دوللار ۇسىنعان. ال بيىل 4 ميلليون 700 مىڭ تەڭگە ۇسىندى. مۇنداي اقشاعا پاتەر ساتىپ الا المايمىز. شەنەۋنىكتەر تىم بولماسا پرەزيدەنتتەن قورقاتىن شىعار دەگەن ويمەن پرەزيدەنتتىڭ سۋرەتىن جاپسىرىپ قويدىق»، - دەيدى نەسىپكۇل ۇياباەۆا.
ول ساياجاي ماسسيۆىندەگى ۇيلەردى ءسۇرۋ تۋرالى سوت شەشىمىن ەسىل اۋداندىق سوتى 2014 جىلى وزدەرىنىڭ سىرتىنان شىعارعانىن، بىراق ول شەشىم قولىنا تيمەگەنىن ايتادى.
"مايسكي" ساياجاي ءماسسيۆى قازىر قورشالىپ تۇر. مۇنداعى ۇيلەردىڭ كوپشىلىگى بۇعان دەيىن سۇرىلگەن، كەيبىرى بوس تۇر. رەسمي مالىمەت بويىنشا، بوساعان اۋماققا الەۋمەتتىك نىسان سالىنباق.
قازاقستان كونستيتۋتسياسىنا ەنگىزىلگەن وزگەرىس بويىنشا، تۇڭعىش پرەزيدەنت نۇرسۇلتان نازارباەۆتىڭ سۋرەتىن بۇلدىرۋگە، جىرتۋعا تىيىم سالىنعان.
