اكتەر، قر ەڭبەك سىڭىرگەن قايراتكەرى بەكجان تۇرىس «ەۋرازيا» ءبىرىنشى ارناسىنا بەرگەن سۇحباتىندا وتكەن ومىرىندەگى قاتەلىكتەرى مەن وكىنىشتەرى جايلى اشىپ ايتتى.
بالا كۇنىنەن انگە اۋەس، كۇيگە قۇمار بولىپ وسكەن اكتەر، تەاتر ساحناسىندا 20 جىل ۇزدىكسىز شالدىڭ ءرولىن سومداعان. اسكەرگە بارىپ، قيىر شىعىستىڭ «ۇزدىك سولداتى» اتانعان. ساحنادان قورقامىن جانە وعان ەسسىز عاشىقپىن دەگەن اكتەر العاشقى ماحابباتىنا نەلىكتەن قولى جەتپەي قالعانىن ايتتى.
«مەكتەپتە وقىپ جۇرگەن جىلدارى «ۇلان» دەگەن انسامبل بولدى. سول توپتىڭ گۇلزيرا دەگەن ءانشى قىزىنا عاشىق بولدىم. ونىڭ قۇربىسى بانۋدان تالاي حاتتار بەرىپ جىبەرگەم، بىراق ءبارى جاۋاپسىز قالدى. ءوزىم قاسىنا بارىپ سەزىمىمدى جەتكىزۋگە باتىلىم بارمادى. كەيدە جازعان حاتتارىم جەتپەي قالىپ جاتتى. اسكەرگە كەتكەن كەزدە دە حات جازۋدى توقتاتقان ەمەسپىن. ول كەزدە مەن اۋىلدان كەلگەن قارا بالا ەدىم. قالانىڭ نازىك قىزى مەنى مەنسىنبەدى. اسكەردەن كەلگەن كەزدە دە العاشقى ماحابباتىمدى ىزدەدىم. بىراق ول تۇرمىسقا شىعىپ كەتكەن ەكەن. مەن بۇل حابارعا سەنبەدىم. كوزىممەن كورمەسەم سەنبەيمىن دەپ ىزدەپ باردىم. گۇلزيرانىڭ تۇرمىستا ەكەنىن كوزىممەن كورىپ، كوڭىل سۋىتتىم»،-دەدى اكتەر.
«ول كەزدە ماعان كەلەتىن حاتتار كوپ ەدى. مەن كوبىنە جاۋاپ جازبايتىنمىن. ءوزى كەلىپ، سەزىمىن اشىق بىلدىرە المادى. ماعان ەشقاشان اشىق ايتقان ەمەس. ءبىر كۇنى مەنىڭ تۋعان كۇنىمە گۇل الىپ كەلگەن كەزدە ۇيالعانىمنان تىعىلىپ قالدىم. اكەمە مەنى ۇيدە جوق دەپ ايتشى دەگەنىم ەسىمدە...»،-دەپ اكتەردىڭ العاشقى ماحابباتى گۇزيرا قاسىمجانوۆا ەسىنە الدى.
5 جاسىندا اكەسىنەن ايىرىلىپ، اتاسى مەن اعاسىنىڭ تاربيەسىمەن ءوسىپ، اناسىنىڭ قامقورلىعىندا بولعان اكتەردىڭ اتا-اناسىنا دەگەن ساعىنىشى ەشقاشان باسىلماعان. بۇرىنعى مەن بۇگىنگى زاماندى سالىستىرىپ، ەكى كەزەڭدەگى ارتىقشىلىقتار مەن كەمشىلىكتەردى بىلاي دەپ باياندادى...
«ول كەزدە بىزدە بارلىعى دا شىنايى ەدى. قازىر عوي ول, ىزگىلىكتى جوعالتىپ، ماحابباتقا قۇلدىقتىڭ قامىتىن كيگىزىپ قويدىق. اقشانىڭ قولىن سۇيگىزىپ، ويسىز بەن مۇڭسىزدىڭ الدىندا ماڭدايىن جەرگە تيگىزىپ، باردىڭ قولجاۋلىعى، جوقتىڭ قوبىزدى مۇڭى ەتىپ قويدىق. ماحابباتتى ۇمىتقان قوعام باقىتسىز ۇرپاق تاربيەلەيدى دەگەن ءسوز بار عوي، مەن سونىمەن تولىق كەلىسەمىن. سول سەبەپتى قازىرگى جاستار ويسىز ۇيلەنىپ، مۇڭسىز اجىراسادى. ولاردىڭ بالالارى ناركومان، نەمەرەلەرى نەرۆنىي بولادى!»،-دەپ تاربيەگە توقتالسا...
«ال سوۆەت كەزەڭىن كورگەن ادامداردىڭ بارلىعى دەسەم قاتەلەسپەيتىن شىعارمىن، ءتىپتى 90 پايىزى ىشىمدىكتى اينالىپ وتە المادى. بۇل سول زاماننىڭ كەم تۇسى. ونىڭ ىشىندە مەن دە بارمىن. جۇمىسقا اۋزىمنان ىشىمدىكتىڭ ءيىسى شىعىپ بارعان كەزدەر دە بولدى. قۇدايدى قۇبىلادان ەمەس ىشىمدىك قۇمىراسىنان ىزدەدىك. موينىمىزعا ازاپتىڭ شىنجىرىن تاققالى، تاعدىردىڭ تالاي تاۋقىمەتىن تارتقالى، شايتانمەن جىن قاققالى، كاپىرستان-زىمىستان ءدىننىڭ جولىن جاپقالى نە ىستەمەدىك دەيسىز، ءبارىن ىستەدىك. بىزگە قاراپ بوي تۇزەپ كەلە جاتقان ۇرپاققا قاتەلىكتەرىمىزدى ايتىپ، بىزدە بولعان وكىنىشتەرىمىزدى جاساماۋلارىنا ءجون سىلتەپ وتىرۋ دۇرىس دەپ ويلايمىن»،- دەدى بەكجان تۇرىس.
